«Жап-жаңа жыл»

«Астана» телеарнасының алқалы  әлеуметке  мерекелік тартуы бар. Арнаның төл туындысы – «Жап-жаңа жыл»  деп  аталады.  «ADAM Media Group» продюсерлігімен  «Астана»  арнасының бірлескен мерекелік мәзірі 31 желтоқсан күні көрерменге жол тартады.

Бұл – арна тарихындағы жаңа­жылдық кешке арналған алғашқы төлтума өнім. Отбасылық мере­келік бағдарламаға елдің елеулі тұлғалары қатысып, оларға тап­қырлықты талап ететін сұрақтар қойылады.

Барша ел бұл бағдарламада сүйік­­­ті кино, өнер және спорт саң­­лақтарын көріп, олардың дүйім ел білмейтін қырын тамашаламақ. Бел­гілі адамның беймәлім қасиетін танып, білу кімге болсын қызықты емес пе?!

Әзірге белгілісі, биылғы жыл­дың халық алдындағы басты кейіп­керлері – Лондон төрінде атой салған Серік Сәпиев пен Ольга Рыпакова думанды кештің қонағы болып, мерекенің ажарын аша түспек. Олар өздерінің тапқырлығын ортаға салып сыналады. Сол сияқты Лондон олимпиадасында зіл темірді еркін еңсеріп, ел абыройын еселеген Илья Ильин де бар. Спорт әлемінде аты шыққан саңлақтар қонақ кәдеге өз өнерлерін тарту етпек екен. Көрермендер әлемдегі ең жас гроссмейстер – Жансая Әбдімәлікті де көріп, оның жүрекжарды тілегін тыңдай алады.

Биыл қазақ киносының қоржы­ны болмысы бөлек туындымен толық­қаны баршамызға белгілі. Ол – Ақан Сатаевтың «Жаужүрек мың бала» фильмі. Киноның басты кейіп­керлері – Асылхан Төлепов пен Аян Өтепбергенов. Қос актер бұл күні Оскар сый­лығын «иеленеді». Сондай-ақ, қоғам­да біраз көзқарас тудырған «Шал» фильмінің актері, күні кеше ғана баспаналы болған Ербол Тоғызақов студия қонағы болмақ. Оның ақжарма тілегін естігісі келгендер төрт сағаттық бағдарламаны жіберіп алмауы керек. Мерекелік бағдарлама ән мен әзілсіз өтсін бе? Әрине, жоқ. Бағдарлама барысында әуез­ді әнімен әзілді кештің көркін келтіретін эстрада жұлдыздары да бой көрсетеді. Олардың қатарында «Жігіттер»тобы мен Карина Абдуллина, Қарагөз Тілеубекова, Алмас Кішкенбаев, Айқын Төлеп­бергенов сынды танымал әртістер бар.

Айнұр САНАБЕК