جاڭا بۋىن تورگە شىقتى

0 113

پارلامەنت سەناتىندا «مەملەكەتتىك جاستار ساياساتى تۋرالى» زاڭدى ىسكە اسىرۋ جانە جاستار جىلىن وتكىزۋ اياسىندا مەملەكەتتىك ورگانداردىڭ، قوعامدىق جانە ۇكىمەتتىك ەمەس ۇيىمداردىڭ الدىندا تۇرعان مىندەتتەرگە ارنالعان دوڭگەلەك ۇستەل ءماجىلىسى بولدى.


جيىندا ءسوز العان سەنات توراعاسى قاسىم-جومارت توقاەۆ ەلباسى جاريا ەتكەن جاستار جىلىنىڭ ەڭ باستى ماقساتى – وسكەلەڭ ۇرپاقتىڭ بارىنشا ساپالى ءومىر سۇرۋىنە قاجەتتى جاعداي جاساۋ، جاستار – بۇل مەملەكەتىمىزدىڭ كۇش-قۋاتىن ەسەلەيتىن ەڭ نەگىزگى، مىقتى بۋىن ەكەنىن اتاپ ءوتتى.
سەنات توراعاسى مەملەكەت باسشىسىنىڭ باس­تاماسىنداعى جاستار ساياساتى جونىندەگى جاڭا اۋقىمدى جوبالاردى ىسكە اسىرۋ ماسەلەلەرىنە توقتالىپ، جاستاردىڭ جۇمىسسىزدىعىن جويۋدىڭ باستى مۇمكىندىكتەرى شاعىن جانە ورتا بيزنەس سالاسىندا ەكەنىنە نازار اۋداردى. توراعانىڭ پىكىرىنشە، جاستار اراسىنداعى كاسىپكەرلىكتى دامىتۋ باعىتىندا تۋريزم كەلەشەگى زور سالا بولۋى ءتيىس. ول وسىعان وراي تۋريزم سالاسى بويىنشا بىلىكتى مامانداردىڭ ازدىعىن ەسكەرە وتىرىپ، ەلىمىزدىڭ جوعارى وقۋ ورىندارىندا تۋريزم جانە قوناقۇي بيزنەسى فاكۋلتەتتەرىن كەڭىنەن اشۋدى ۇسىندى. جانە جاستاردى پارلامەنت پەن جەرگىلىكتى وكىلەتتى ورگانداردىڭ جۇمىسىنا كەڭىنەن تارتۋ جانە بەلسەندى جاڭا بۋىن وكىلدەرىن قولداۋعا شاقىردى.
سونداي-اق قاسىم-جومارت كەمەلۇلى مەكتەپتەردە ورىن العان، قوعامنىڭ نارازىلىعىن تۋدىرىپ وتىرعان كۇش كورسەتۋ، قورقىتۋ مەن قورلىق كورسەتۋ ارەكەتتەرىنە وراي جاستاردىڭ قۇقىقتىق جانە ادامگەرشىلىك تاربيەسىنە دە ماڭىز بەردى. «مەكتەپتەردە ورىن الىپ وتىرعان زورلىق-زومبىلىق جاعدايلارى – بۇل بارلىق مەملەكەتتىك ورگانداردىڭ جۇمىسىنداعى كەمشىلىك ەكەنىن مويىنداۋ قاجەت. بۇل ماسەلەگە كوز جۇمىپ قاراۋعا بولمايدى. وسى تۇيتكىلدىڭ شىعۋ سەبەپتەرىن انىقتاپ، مەكتەپتەردى جايلاعان قورقىنىش پەن ۇرەيدەن تۇبەگەيلى قۇتىلۋ ءۇشىن ناقتى شارالار قولدانۋ كەرەك. بۇل مۇعالىمدەردىڭ، اتا-انالار مەن جاستار ۇيىمدارىنىڭ، بارلىق دەڭگەيدەگى اكىمدەردىڭ جانە تۇتاس قوعامنىڭ الدىنداعى ماڭىزدى مىندەتكە اينالۋى ءتيىس» دەدى.
سونىمەن قاتار ءماجىلىس­تە اسا ماڭىزدى ماسەلە – جاستاردىڭ دىنگە دەگەن كوزقاراسى تۋرالى دا ايتىلدى. «ەلىمىزدەگى ءاربىر جاس ازامات، ءوزىنىڭ ءدىني سەنىمىنەن تىس مەملەكەتكە، ونىڭ زاڭدارى مەن نىشاندارىنا قۇرمەتپەن قاراۋى ءتيىس. مەكتەپتەردەگى ءجۇرىس-تۇرىس ادەبى جانە كيىم كيۋ ۇلگىسى حالىقارالىق تاجىريبەنى، ەڭ باستىسى، حالقىمىزدىڭ ۇلتتىق داستۇرلەرىن نەگىزگە الۋى كەرەك. بۇگىنگى تاڭدا ءدىني سەنىمىنە بولا بالالاردى ءبىلىم الۋ مۇمكىندىگىنەن ايىرىپ، ولاردىڭ ءبىلىم كوزدەرىنەن قول ۇزۋىنە ءماجبۇر بولعان جاعدايلار ورىن الىپ وتىر» دەدى سەنات توراعاسى. ول وسى كۇردەلى ماسەلە جونىندە كەلىسىلگەن جانە ورىندى شەشىم تابۋ ءۇشىن پارلامەنت پەن ۇكىمەتتى بىرلەسىپ جۇمىس ىستەۋگە شاقىردى.

پىكىر جازۋ

پوچتاڭىز جاريالانبايدى

16 − fourteen =