JANDARBEKTİÑ JULDIZI JANDI

0 143

IMG_8883Burnağı küni «Kongress holl» sarayında Täwelsizdik künine arnalğan «Jırıñ bolıp tögilemin, elim!» attı respwblïkalıq aqındar aytısı ötti. Mädenïet jäne aqparat mïnïstrligi uyımdastırğan, «Nur Otan» partïyası qoldaw körsetken aytıskerler dodasına 10 aqın qatıstı. Bul aytıstıñ budan burınğı aytıstardan erekşeligi köp boldı. Alğaşqı erekşelik: «Söz barımtasına» tüsken aqındardıñ aytıs sahnasındağı bir jılğı jetistikteri esepke alındı.

Baqsaq, bıltırğı täwelsizdigimizdi ulıqtağan «Bizdiñ el osınday!» aytısınan osı künderge deyin aqındar 19 ret söz qağıstırıptı. «Kazaitys» saytı sol aytıstardı saralap, üzdik on aqınnıñ reytïngisin tüzgen. Reytïngtiñ uşar basına 17 upay jïnağan Sara Toqtamısova jayğassa, eñ tömengi jağına Jaqsılıq Orınbasar men Qanat Mırzahan ornalasqan. Mine, osındağı toğız aqın jäne Birjan Baytwovtıñ ornına jas peri Jandarbek Bulğaqov bes jup qurıp, bas jülde – «Altın dombıranı» ïelenemiz dep bar önerlerin ortağa saldı.

Ekinşi erekşelik – qatıswşı aqındar körermenderge arnap bir-bir şwmaqtan tögip jibergennen keyin sahnağa köterilgen «Nur Otan» partïyası Törağasınıñ birinşi orınbasarı Bawırjan Baybek: «Partïyamız öziniñ jaña sayasï doktrïnasında ulttıq dästürimizdi, töl mädenïetimizdi, rwhanïyatımızdı öte bïik orınğa qoyıp otır. Aytıstıñ tabïğatı partïyanıñ ustanımdarımen uqsas. Biz de problemalarımızdı ärqaşan aşıq aytıp, olardı şeşwge tırısamız. Ötken aytısta «Nur Otan» partïyasınan saylanğan depwtattar bolğan. Sol jerde aqındar biraz sın ayttı, köp mäseleni köterdi, onıñ barlığın halıq qalawlıları qolğa alıp, qazir şeşip jatır» dep belgili memleket jäne qoğam qayratkeri Mırzatay Joldasbekov pen aytıstı otız jıl boyı örge süyrep kele jatqan Jürsin Ermannıñ ïıqtarına şapan japtı.

Birinşi jupta Jandarbek Bulğaqov pen «Altın dombıranıñ» bıltırğı ïegeri Muhtar Nïyazov söz qağıstırdı. Muhtardıñ Jandarbekke ä degennen bağıttalğan «Qaraqurttay tiliñniñ wıtı bar, alayda, qara qoyğa wıtıñ ötpeydi» degen sözi aytwşınıñ özin qaqpanğa tüsirdi. Jandarbek onı osı sözinen ustap: «Öziñdey talay qoydı soyğan edik… «Altın dombıra» utatın qanday qoysıñ? Sawattı söz örseñşi oydan örip» dep jawap berdi. Äri qaray da Jandarbektiñ öneri Muhtardikinen bir bas joğarı ekeni körinip turdı. Arnayı tapsırma – «Ötirik öleñ aytısında» da Jandarbektiñ sözderi salmaqtılaw boldı. Nätïjesinde Parlament Mäjilisiniñ depwtatı, Memlekettik sıylıqtıñ lawreatı, jazwşı Aldan Smayıl bastağan qazılar alqası Jandarbekke birıñğay «10» upay köterip, fïnalğa joldama berdi.

Almatılıq Qanat Mırzahan men qarağandılıq Dïdar Qamïevtiñ tartısında ekinşisi basım tüsti. Ol tüsinikti de: Dïdar biraz aytıstarğa qatısıp, tis qaqqan aqınğa aynaldı dep aytwğa boladı. Qanat «Habar» arnasınıñ «Jastar jırlaydı» aytısında jeñimpaz atansa da, aytarlıqtay jeñisterge jetken joq. Degenmen, bolaşağınan ümit kütwge bolatının tanıttı. Bul jupqa tapsırma retinde «Qayım aytıs» jasaw mindettelse, ekewi de uyqastardı qïınnan qïıstırıp, tapsırmanı alıp şıqtı.

«Aytıstıñ kïlleri» atanğan Bekarıs Şoybekov pen Jaqsılıq Orınbasar el muñın tolğadı. Äsirese, Jaqsılıq oralmandarğa 5 jılğa deyin azamattıq berilmeydi degen zañ jobasın sınğa alıp, joğarı jaqqa dat ayttı. Onı qostağan Bekarıs ädettegişe salmaqtı aytıs jasap, arasında sözin äzilmen de kömkerdi. Mäselen, tapsırma retinde berilgen – tar köpirde süzisip qalğan eki qoşqardıñ swretine sïpattama bergende: «Künde kündes Aygül men Altınay da sahnada tabıstı ğoy, «Twka» men Wälïbek eñ soñında qawıştı ğoy» dep zalğa jïnalğandardı dw küldirdi.

Sara Toqtamısova men qızılordalıq Nurmat Mansurov halıqtıñ oyında jürgen tastandı balalar, joldağı jemqorlıq, demografïya, tağı sonday kökeytesti mäselelerdi qozğadı. Sarağa qarsılastarı ünemi «qırğız maqamımen aytısasıñ» dep tïiskenindey Nurmat ta osını ayta kelip: «Qazirgi qazaq estradasındağı «Şoq qızdar», «Qızıl örik» sekildi änderdi qırğızdan urlaw ürdisi senen bastalğan joq pa?» dep tüyrep ötti. Oğan Sara: «Qırğız-qazaq bir twğan, Kenenniñ basın kötertken bul maqamnan halıqtıñ zarı seziledi, sondıqtan tañdadım» dep jawap berip, Jürsinniñ kezindegi aytıskerlerdiñ ärqaysısında jeke maqam bolsın degen talabın eske salıp ötti. Arnayı tapsırma – «Biz üşin ne qımbat, ne arzan?» degen suraqqa Nurmattıñ jawaptarı utımdılaw boldı.

Soñğı besinşi juptı Balğınbek Ïmaşev pen Aynur Tursınbaeva quradı. Bul ekewi alğaşqı ret 1993 jılı oqwşılar aytısında aytısqan eken. Şorabek Aydarovtıñ maqamına salğan Balğınbek sonı meñzep Aynurdı «jïırma jılğı podrwjkam» dep atadı. Aynur da qalıs qalmay, Balğınbekti «modnıy molda» dep atasa, Balğınbek te: «Aynur meni dep otır «modnıy molda», Basqa teñew tappadı «jadnıy kobra» dep ese jibergen joq. Jalpı, osınday ekewara äzilge qurılğan aytıs jasağan olar eñ soñında bir-birine jumbaq jasırdı.

Aqtıq sayısqa qazılar Balğınbek, Nurmat, Dïdar, Jandarbek sekildi tört aqındı şığardı. Olar buğan deyin el körmegen Jetisw dästürindegi «Qulmambet aytısın» jasadı. YAğnï, bir mezette törtewi de sahnağa şığıp, kezekpe-kezek aytıstı. Olardıñ aytqan sözderin iştey bağalağan qazılar bas bäygege Jandarbek Bulğaqovtı layıq dep taptı. «Altın dombıra» men 3 mln teñge aqşalay sıylıqtı oğan bıltırğı jeñimpaz Muhtar Nïyazov pen«Nur Otan» partïyası Törağasınıñ birinşi orınbasarı Bawırjan Baybek jäne Mädenïet jäne aqparat mïnïstrligi Mädenïet komïtetiniñ törağası Tilewğalï Qışqaşbaev tapsırdı. Birinşi orın men 2 mln teñge Dïdar Qamïevtiñ qanjığasında ketti. Ekinşi orınğa tigilgen 1 mln teñge Nurmat Mansurovqa tabıstaldı. Üşinşi orın jüldesi 750 mıñ teñgeni Balğınbek Ïmaşev oljaladı. Özge aqındarğa 500 mıñ teñgeden berildi. Sonday-aq, Muhtar Nïyazovqa «Kazaitys» saytı tikken Esenqul Jaqıpbekov atındağı arnayı jülde tapsırıldı.

IMG_8804

Pikir jazw

Poçtañız jarïyalanbaydı

14 + 3 =