جانداربەكتىڭ جۇلدىزى جاندى

0 143

IMG_8883بۇرناعى كۇنى «كونگرەسس حولل» سارايىندا تاۋەلسىزدىك كۇنىنە ارنالعان «جىرىڭ بولىپ توگىلەمىن، ەلىم!» اتتى رەسپۋبليكالىق اقىندار ايتىسى ءوتتى. مادەنيەت جانە اقپارات مينيسترلىگى ۇيىمداستىرعان، «نۇر وتان» پارتياسى قولداۋ كورسەتكەن ايتىسكەرلەر دوداسىنا 10 اقىن قاتىستى. بۇل ايتىستىڭ بۇدان بۇرىنعى ايتىستاردان ەرەكشەلىگى كوپ بولدى. العاشقى ەرەكشەلىك: «ءسوز بارىمتاسىنا» تۇسكەن اقىنداردىڭ ايتىس ساحناسىنداعى ءبىر جىلعى جەتىستىكتەرى ەسەپكە الىندى.

باقساق، بىلتىرعى تاۋەلسىزدىگىمىزدى ۇلىقتاعان «ءبىزدىڭ ەل وسىنداي!» ايتىسىنان وسى كۇندەرگە دەيىن اقىندار 19 رەت ءسوز قاعىستىرىپتى. «Kazaitys» سايتى سول ايتىستاردى سارالاپ، ۇزدىك ون اقىننىڭ رەيتينگىسىن تۇزگەن. رەيتينگتىڭ ۇشار باسىنا 17 ۇپاي جيناعان سارا توقتامىسوۆا جايعاسسا، ەڭ تومەنگى جاعىنا جاقسىلىق ورىنباسار مەن قانات مىرزاحان ورنالاسقان. مىنە، وسىنداعى توعىز اقىن جانە ءبىرجان بايتۋوۆتىڭ ورنىنا جاس پەرى جانداربەك بۇلعاقوۆ بەس جۇپ قۇرىپ، باس جۇلدە – «التىن دومبىرانى» يەلەنەمىز دەپ بار ونەرلەرىن ورتاعا سالدى.

ەكىنشى ەرەكشەلىك – قاتىسۋشى اقىندار كورەرمەندەرگە ارناپ ءبىر-ءبىر شۋماقتان توگىپ جىبەرگەننەن كەيىن ساحناعا كوتەرىلگەن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك: «پارتيامىز ءوزىنىڭ جاڭا ساياسي دوكتريناسىندا ۇلتتىق ءداستۇرىمىزدى، ءتول مادەنيەتىمىزدى، رۋحانياتىمىزدى وتە بيىك ورىنعا قويىپ وتىر. ايتىستىڭ تابيعاتى پارتيانىڭ ۇستانىمدارىمەن ۇقساس. ءبىز دە پروبلەمالارىمىزدى ارقاشان اشىق ايتىپ، ولاردى شەشۋگە تىرىسامىز. وتكەن ايتىستا «نۇر وتان» پارتياسىنان سايلانعان دەپۋتاتتار بولعان. سول جەردە اقىندار ءبىراز سىن ايتتى، كوپ ماسەلەنى كوتەردى، ونىڭ بارلىعىن حالىق قالاۋلىلارى قولعا الىپ، قازىر شەشىپ جاتىر» دەپ بەلگىلى مەملەكەت جانە قوعام قايراتكەرى مىرزاتاي جولداسبەكوۆ پەن ايتىستى وتىز جىل بويى ورگە سۇيرەپ كەلە جاتقان ءجۇرسىن ەرماننىڭ يىقتارىنا شاپان جاپتى.

ءبىرىنشى جۇپتا جانداربەك بۇلعاقوۆ پەن «التىن دومبىرانىڭ» بىلتىرعى يەگەرى مۇحتار نيازوۆ ءسوز قاعىستىردى. مۇحتاردىڭ جانداربەككە ءا دەگەننەن باعىتتالعان «قاراقۇرتتاي ءتىلىڭنىڭ ۋىتى بار، الايدا، قارا قويعا ۋىتىڭ وتپەيدى» دەگەن ءسوزى ايتۋشىنىڭ ءوزىن قاقپانعا ءتۇسىردى. جانداربەك ونى وسى سوزىنەن ۇستاپ: «وزىڭدەي تالاي قويدى سويعان ەدىك… «التىن دومبىرا» ۇتاتىن قانداي قويسىڭ؟ ساۋاتتى ءسوز ورسەڭشى ويدان ءورىپ» دەپ جاۋاپ بەردى. ءارى قاراي دا جانداربەكتىڭ ونەرى مۇحتاردىكىنەن ءبىر باس جوعارى ەكەنى كورىنىپ تۇردى. ارنايى تاپسىرما – «وتىرىك ولەڭ ايتىسىندا» دا جانداربەكتىڭ سوزدەرى سالماقتىلاۋ بولدى. ناتيجەسىندە پارلامەنت ءماجىلىسىنىڭ دەپۋتاتى، مەملەكەتتىك سىيلىقتىڭ لاۋرەاتى، جازۋشى الدان سمايىل باستاعان قازىلار القاسى جانداربەككە بىرىڭعاي «10» ۇپاي كوتەرىپ، فينالعا جولداما بەردى.

الماتىلىق قانات مىرزاحان مەن قاراعاندىلىق ديدار قاميەۆتىڭ تارتىسىندا ەكىنشىسى باسىم ءتۇستى. ول تۇسىنىكتى دە: ديدار ءبىراز ايتىستارعا قاتىسىپ، ءتىس قاققان اقىنعا اينالدى دەپ ايتۋعا بولادى. قانات «حابار» ارناسىنىڭ «جاستار جىرلايدى» ايتىسىندا جەڭىمپاز اتانسا دا، ايتارلىقتاي جەڭىستەرگە جەتكەن جوق. دەگەنمەن، بولاشاعىنان ءۇمىت كۇتۋگە بولاتىنىن تانىتتى. بۇل جۇپقا تاپسىرما رەتىندە «قايىم ايتىس» جاساۋ مىندەتتەلسە، ەكەۋى دە ۇيقاستاردى قيىننان قيىستىرىپ، تاپسىرمانى الىپ شىقتى.

«ايتىستىڭ كيللەرى» اتانعان بەكارىس شويبەكوۆ پەن جاقسىلىق ورىنباسار ەل مۇڭىن تولعادى. اسىرەسە، جاقسىلىق ورالماندارعا 5 جىلعا دەيىن ازاماتتىق بەرىلمەيدى دەگەن زاڭ جوباسىن سىنعا الىپ، جوعارى جاققا دات ايتتى. ونى قوستاعان بەكارىس ادەتتەگىشە سالماقتى ايتىس جاساپ، اراسىندا ءسوزىن ازىلمەن دە كومكەردى. ماسەلەن، تاپسىرما رەتىندە بەرىلگەن – تار كوپىردە ءسۇزىسىپ قالعان ەكى قوشقاردىڭ سۋرەتىنە سيپاتتاما بەرگەندە: «كۇندە كۇندەس ايگۇل مەن التىناي دا ساحنادا تابىستى عوي، «تۋكا» مەن ۋاليبەك ەڭ سوڭىندا قاۋىشتى عوي» دەپ زالعا جينالعانداردى دۋ كۇلدىردى.

سارا توقتامىسوۆا مەن قىزىلوردالىق نۇرمات مانسۇروۆ حالىقتىڭ ويىندا جۇرگەن تاستاندى بالالار، جولداعى جەمقورلىق، دەموگرافيا، تاعى سونداي كوكەيتەستى ماسەلەلەردى قوزعادى. ساراعا قارسىلاستارى ۇنەمى «قىرعىز ماقامىمەن ايتىساسىڭ» دەپ تيىسكەنىندەي نۇرمات تا وسىنى ايتا كەلىپ: «قازىرگى قازاق ەستراداسىنداعى «شوق قىزدار»، «قىزىل ورىك» سەكىلدى اندەردى قىرعىزدان ۇرلاۋ ءۇردىسى سەنەن باستالعان جوق پا؟» دەپ تۇيرەپ ءوتتى. وعان سارا: «قىرعىز-قازاق ءبىر تۋعان، كەنەننىڭ باسىن كوتەرتكەن بۇل ماقامنان حالىقتىڭ زارى سەزىلەدى، سوندىقتان تاڭدادىم» دەپ جاۋاپ بەرىپ، ءجۇرسىننىڭ كەزىندەگى ايتىسكەرلەردىڭ ارقايسىسىندا جەكە ماقام بولسىن دەگەن تالابىن ەسكە سالىپ ءوتتى. ارنايى تاپسىرما – «ءبىز ءۇشىن نە قىمبات، نە ارزان؟» دەگەن سۇراققا نۇرماتتىڭ جاۋاپتارى ۇتىمدىلاۋ بولدى.

سوڭعى بەسىنشى جۇپتى بالعىنبەك يماشەۆ پەن اينۇر تۇرسىنباەۆا قۇرادى. بۇل ەكەۋى العاشقى رەت 1993 جىلى وقۋشىلار ايتىسىندا ايتىسقان ەكەن. شورابەك ايداروۆتىڭ ماقامىنا سالعان بالعىنبەك سونى مەڭزەپ اينۇردى «جيىرما جىلعى پودرۋجكام» دەپ اتادى. اينۇر دا قالىس قالماي، بالعىنبەكتى «مودنىي مولدا» دەپ اتاسا، بالعىنبەك تە: «اينۇر مەنى دەپ وتىر «مودنىي مولدا»، باسقا تەڭەۋ تاپپادى «جادنىي كوبرا» دەپ ەسە جىبەرگەن جوق. جالپى، وسىنداي ەكەۋارا ازىلگە قۇرىلعان ايتىس جاساعان ولار ەڭ سوڭىندا ءبىر-بىرىنە جۇمباق جاسىردى.

اقتىق سايىسقا قازىلار بالعىنبەك، نۇرمات، ديدار، جانداربەك سەكىلدى ءتورت اقىندى شىعاردى. ولار بۇعان دەيىن ەل كورمەگەن جەتىسۋ داستۇرىندەگى «قۇلمامبەت ايتىسىن» جاسادى. ياعني، ءبىر مەزەتتە تورتەۋى دە ساحناعا شىعىپ، كەزەكپە-كەزەك ايتىستى. ولاردىڭ ايتقان سوزدەرىن ىشتەي باعالاعان قازىلار باس بايگەگە جانداربەك بۇلعاقوۆتى لايىق دەپ تاپتى. «التىن دومبىرا» مەن 3 ملن تەڭگە اقشالاي سىيلىقتى وعان بىلتىرعى جەڭىمپاز مۇحتار نيازوۆ پەن«نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك جانە مادەنيەت جانە اقپارات مينيسترلىگى مادەنيەت كوميتەتىنىڭ توراعاسى تىلەۋعالي قىشقاشباەۆ تاپسىردى. ءبىرىنشى ورىن مەن 2 ملن تەڭگە ديدار قاميەۆتىڭ قانجىعاسىندا كەتتى. ەكىنشى ورىنعا تىگىلگەن 1 ملن تەڭگە نۇرمات مانسۇروۆقا تابىستالدى. ءۇشىنشى ورىن جۇلدەسى 750 مىڭ تەڭگەنى بالعىنبەك يماشەۆ ولجالادى. وزگە اقىندارعا 500 مىڭ تەڭگەدەن بەرىلدى. سونداي-اق، مۇحتار نيازوۆقا «Kazaitys» سايتى تىككەن ەسەنقۇل جاقىپبەكوۆ اتىنداعى ارنايى جۇلدە تاپسىرىلدى.

IMG_8804

پىكىر جازۋ

پوچتاڭىز جاريالانبايدى

sixteen − 2 =