ۇرىس دالاسىنان كەلگەن ءۇشبۋ حات

0 418

1

جەڭىسپەن ورالامىز

ءبىز ءجۇرمىز حالىق ءۇشىن قان مايداندا،
كۇندە ءولىم، دامىل جوق شىبىن جاندا.
اياماي كەۋدەدەگى جانىمىزدى،
سارقىلعانشا ەڭ سوڭعى قاسىق قان دا…

قۇربان قىپ وتان ءۇشىن جاس ءومىردى،
شايقاسپەن وتكىزدىك ءبىز نەشە كۇندى؟
قورعاۋعا اتتانعان سوڭ تۋعان جەردى،
دۇشپانعا جىبەرمەيمىز ەسەمىزدى.

جان انا، اق ءسۇتىڭدى اقتاۋ ءۇشىن،
فاشيستەر توپىراعىمدى باسپاۋ ءۇشىن،
توسامىز كەۋدەمىزدى سانسىز وققا –
وتانىم، نامىسىڭدى ساقتاۋ ءۇشىن.

تانىتتى سوعىس تالاي باتىرلاردى،
ءۇن قاتقان نەبىر شەشەن، اقىنداردى.
ساعىنىپ، جۇدەمەڭدەر، تۋعان ەلىم،
جەڭىسپەن ورالار كۇن جاقىن قالدى!

بۇل – اقمولا ءوڭىرىنىڭ تۋماسى، ۇلى وتان سوعىسىنىڭ ارداگەرى تۇياق كامەلوۆتىڭ مايدان دالاسىنان قورعالجىن اۋداندىق گازەتىنە جولداعان ولەڭى. ۇرىستىڭ العاشقى كۇندەرىنەن-اق العى شەپتە سوعىسقان قازاق جاۋىنگەرى 1919 جىلى تۋىپ، 1964 جىلى ومىردەن وزعان.

تۇياق باياندىۇلى ۋليانوۆسك قالاسىنداعى تانك ۋچيليششەسىن ءتامامداپ، تانك كومانديرى، روتا ستارشيناسى، لەيتەنانت شەندەرىن يەلەنگەن. ۋكراينا مايدانىندا 103-گۆارديالىق اۋىر تانك پولكىندە بولىپ، ماسكەۋ تۇبىندەگى شايقاستا ەرلىك كورسەتتى. ول جوعارعى باس قولباسشى يوسيف ءستاليننىڭ تىكەلەي باقىلاۋىنداعى يس-1, يس-2 قۇپيا بروندالعان اۋىر تانكتەرىمەن سوعىسا ءجۇرىپ، جاۋدى بەرلينگە دەيىن تىسقىردى. ال مۇنداي تەمىر تاباندى قارۋ تەك سەنىمدى ساربازعا عانا بەرىلەتىنى انىق. ويتكەنى، بۇل تانك پولكى تەك ءستاليننىڭ بۇيرىعىمەن عانا اسكەري قيمىلدارعا باراتىن.

تۇياق كامەلوۆ ەلگە ورالعاننان كەيىن، تۋعان اۋىلىنداعى سابىندى ورتا مەكتەبىنىڭ ىرگەسىن قالاپ، ءوزى ديرەكتور قىزمەتىن اتقاردى. بۇگىندە اۋىلداعى كوشەلەردىڭ ءبىرى وسى كىسىنىڭ اتىندا.

جالعىز تۇياقۇلى

پىكىر جازۋ

پوچتاڭىز جاريالانبايدى

four + 6 =