«Астана ақшамы»
Ел жүрегі – елорда шежіресі

Ұлы даланың інжу-маржаны

0 236

Астанадағы «Спутник-Қазақстан» мультимедиялық баспа­сөз орталы­ғын­да өткен брифинг-телекөпірде отандық және ресейлік сарапшылар Нұр­сұлтан Назарбаевтың «Тәуелсіздік дәуірі» атты кітабын талқылап, өз ой-пі­кірлерімен бөлісті. Сол күні Мәскеу қаласында Елбасының «Тәуелсіздік дә­уірі» кітабының тұсаукесері және Қазақстанның елордасы Астананың 20 жылдығына арналған «Астана – Ұлы даланың інжу-маржаны» атты фо­то­көрме өтті. «Рухани жаңғыру» аясында өткен іс-шараны Қазақстан Рес­­­публикасы Тұңғыш Президенті – Елбасының Қоры Қазақстан Рес­публикасының Ресей Федерациясындағы елшілігінің қолдауымен өткізді.Екі шара – Елбасы кітабының тұ­саукесері мен «Астана – Ұлы даланың інжу-мар­жаны» фотокөрмесі бірге ұйым­дас­тырылды. Ал Мәскеу қала­сын­да басталған фотокөрме Мад­рид, Париж, Лондон, Берлин қалаларында және Қытай астанасы – Бейжіңде жал­ғасады. Шара қонақтарына (ресейлік танымал мемлекеттік және қоғам қайрат­керлері) ел астанасында 20 жылдың ішінде салынған түрлі құрылыстардың 60-тан астам фотокартинасы ұсынылды. Картиналар арасынан әлемдік бірегей мәдениет нысандарын көруге болады: атап айтқанда, ғаламның 90 эпикалық ғимаратының қа­тарына енген Астананың басты бренді – «Бәйтерек», ЭКСПО-қалашықтағы диаметрі 80 метр сфера нысанын­дағы ерекше ғимарат – «Нұр-Әлем», әлемнің ең әдемі 10 прези­денттік сарайларының тізіміне кірген Қазақстан Республикасы Президентінің «Ақ Орда» резиденциясы. Сондай-ақ, белгілі британдық сәулетші Норман Фостердің жобасы бойынша салынған елорданың бірегей құрылыстары: Бейбітшілік және келісім сарайы, Гиннестің рекорд кітабына енгізілген, шатыр нысанындағы әлемдегі ең үлкен ғимарат – «Хан Шатыр» сауда-ойын-сауық кешені және «Назарбаев орталығы» бар.
Мәскеудегі тұсаукесерде сөз сөйлеген Қазақстан Республикасы Тұңғыш Президенті – Елбасы қоры атқарушы ди­ректорының орынбасары Игорь Рогов: «Тә­уелсіздік дәуірі» кітабының стратегиялық бағыттары жас­­­тарға арналған. Бүгінгі да­мыған Қазақстанның басты же­тістіктерін зерттеу арқылы Нұрсұлтан Назарбаев жастарды жүріп өткен тарихи жолды бағалауға, одан сабақ алуға және жаңа табыстарға жетуге шақырады. Елбасы кітабының бір ерекшелігі, қазақстандықтармен қатар шетел оқырмандарына да, яғни кең ауқымды аудиторияға бағытталған» деп мәлімдеді.
ҚР Тұңғыш Президенті – Елбасы қорының жанындағы Әлемдік экономика және саясат институтының директоры Ержан Салтыбаевтың пікірінше, «Қазақстан» атты мемлекеттік жоба авторының мықты елді құру тұжырымдамасын өз атынан баяндауы айрықша маңызға ие. «Тәуелсіздік дәуірі» кітабының негізгі тұжырымдарына түйін жасайтын болсақ, ол Қазақстанның жүйелі және тұрақты даму жо­лын көрсетеді. Тәуелсіз Қазақ­станның дамуының жаңаша тарихы әрдайым зерттеушілердің, сарапшылардың және жур­налистер­дің назарын аударып келеді. Зерттеушілер қарқынды дамып келе жатқан жас мем­лекеттің табыстарына әртүрлі баға беруде. Кейбіреулер оны «қазақстандық ғажайып», «Назарбаев моделі» десе, басқалары «қазақстандық жол» деп те атайды. Осылайша, Қазақстанның даму формуласын айқындауға деген ұмтылысты байқаймыз. Осыған орай, көптеген бірегей, сондай-ақ, шетелдік әдебиеттер басылып шықты. Соның ішінде Ресейдің белгілі саясаттанушылары мен экономистері де Қазақстанға өздерінің авторлық және ұжымдық монографияларын арнады. Алайда бұлардың бәрін сол мемлекетті құрған адамның өз кітабынан оқу ана­ғұрлым қызықты және маңызды» деді ол телекөпірде.
Телекөпірге Мәскеу қаласынан Игорь Рогов және ресейлік сарапшылар – Ингушетияның тұңғыш президенті, Кеңес Ода­ғының батыры Руслан Аушев, Ресей Федерациясы президентінің халықаралық мәдени ынты­мақ­тастық жөніндегі арнайы өкілі Михаил Швыдкой және басқа да ресейлік саясаткерлер қатысты. Ал Астана қаласынан ҚР Сыртқы істер министрінің орынбасары Ғалымжан Қойшыбаев, ҚР Тұңғыш Президенті – Елбасы қоры жанындағы Әлемдік саясат және экономика институтының директоры Ержан Салтыбаев, ҚР Білім және ғылым ми­нистрлігі жанындағы Мемлекет тарихы институтының директоры Бүркітбай Аяған, «ҚР Президентінің телерадиокешені» КЕАҚ бас директоры Ерлан Бекхожин, Л.Гумилев атындағы Еуразия ұлттық университетінің Қазақстан халқы ассамблеясы кафедрасының меңгерушісі Анатолий Башмаков өз пікірлерін ортаға салды.

Төлен ТІЛЕУБАЙ

Пікір жазу

Почтаңыз жарияланбайды