Үкімет отырысында экология және табиғи ресурстар министрі Ерлан Нысанбаев еліміздің табиғи аумақтарына ел азаматтары мен шетелдік қонақтардың қызығушылығы артып келе жатқанын айтты. Оның айтуынша, 2024 жылы ерекше қорғалатын табиғи аумақтарға 2,8 млн адам келген, ал 2025 жылы бұл көрсеткіш 3,7 млн адамға жетті. Осылайша, өсім 900 мыңға жуық келушіні құрады. Бүгінгі таңда негізгі әлеует ұлттық саябақтарда шоғырланған, олардың аумағында 179 туристік маршрут және 42 экологиялық соқпақ бар, деп хабарлайды astana-akshamy.kz.
Бұдан басқа, Мемлекет басшысының «Таза Қазақстан» бастамасын жүзеге асыру шеңберінде өңірлерде қалдықтармен дұрыс жұмыс істеу мәдениетін қалыптастыруға бағытталған «Таза туризм» бағдарламасы жүргізілуде. Шарын және Көлсай көлдері Ұлттық парктерінде сәтті сынақтан өткеннен кейін жоба Іле-Алатау, Алтынемел, Қарқаралы, Сайрам-Өгем, Көкшетау, Баянауыл және Бурабайда кеңейтілді.
