ۇلەسكەرلەر ماسەلەسىن شەشۋگە بارلىق تاراپتار قاتىسادى

0 58

كەشە ەلوردا اكىمى التاي كولگىنوۆ قالادا جۇرگىزىلىپ جاتقان كۇردەلى جوندەۋ جۇمىستارىمەن تانىسىپ، پروبلەمالىق قۇرىلىس نىساندارىن ارالاپ، ۇلەسكەرلەرمەن اڭگىمەلەستى.

قالا باسشىسى ە49 كوشەسىندەگى №4 ۋچاسكەدە ورنالاسقان «التىن شار WEST» كوپپاتەرلى تۇرعىن ءۇي كەشەنى ۇلەسكەرلەرىنىڭ ماسەلەلەرىن تىڭدادى. بۇل ءۇيدىڭ 774 پاتەرى «نۇرلى جەر» باعدارلاماسى بويىنشا، قالعان 714 پاتەر كەلىسىمشارت بويىنشا سالىنۋعا ءتيىس. بۇگىندە مۇندا ءبىرىنشى كورپۋستىڭ پاتەرلەرىن تازالاۋ جۇمىستارى جالعاسۋدا،ەكىنشى كورپۋستىڭ شاتىرىن ورناتۋ، ءۇشىنشى كورپۋستىڭ ىرگەتاس پليتالارىن گيدرووقشاۋلاۋ جۇمىستارى جۇرگىزىلۋدە. قۇرىلىس جۇمىستارىن اياقتاۋدى جانە زاڭدى يەلەرىنە پاتەر بەرۋدى سوزاتىن نەگىزگى پروبلەما – تۇرعىن ءۇي كەشەنى ورنالاسقان جەر بانكتىڭ كەپى­لىندە تۇر. قازىر ونى قايتارۋ بو­يىنشا كەلىسسوزدەر جۇرگىزىلۋدە. التاي كولگىنوۆ سونداي-اق ە22 كوشەسىندەگى ە51 جانە ە49 كوشەلەرىنىڭ ارالىعىنداعى «سەمەينىي» تك قۇرىلىسىندا دا بولدى. وعان 190 ۇلەسكەر ءوز قاراجاتىن سالعان، بارلىق پاتەرلەر بۇرىننان ساتىلعان. قازىر قۇرىلىس نىسانىنىڭ جالپى دايىندىعى 90 پايىزدى قۇرايدى. ءۇي سالۋ بارىسىندا قۇرىلىس ساپاسىنا قاتىس­تى كەمشىلىكتەر انىقتالدى، اباتتاندىرۋ، كىرمە جولدار، جولدار جانە ت. ب. ماسەلەلەر شەشىلمەگەن. تۇرعىندار ءۇشىن باستى ماسەلەسى قۇرىلىس نىساندارىن تاپسىرۋ مەرزىمدەرىنىڭ ساقتالماۋى بىرنەشە رەت ورىن العان. جۇمىستار باياۋ قارقىنمەن جۇرگىزىلۋدە. سونداي-اق، قالا اكىمى تۇرعىن ۇيلەردى پايدالانۋعا بەرۋ مەرزىمدەرىن ساقتاۋ، سونداي-اق ۇلەسكەرلەر الدىنداعى بارلىق مىندەتتەمەلەردى ورىنداۋ ءۇشىن اكىمدىك بارلىق قاجەتتى شارالاردى قولداناتىنىن اتاپ ءوتتى. «بارلىعى تەك اكىمدىككە عانا بايلانىستى ەمەس. قازىر بارلىق تاراپتاردى جيناپ، ءىس-قيمىل جوسپارىن بەكىتۋ قاجەت بولادى» دەپ تۇيىندەدى التاي كولگىنوۆ ۇلەس­كەرلەرمەن اڭگىمەسىن.

 

پىكىر جازۋ

پوچتاڭىز جاريالانبايدى

10 + 17 =