تۇيتكىلدى ماسەلەلەرمەن تانىستى

0 176

كەشە نۇر-سۇلتان قالاسى ءماسليحات دەپۋتاتتارى ەلورداداعى بىرقاتار ءبىلىم بەرۋ مەكەمەلەرى مەن سپورت نىساندارىن ارالادى. تەك وتىرىستاردا عانا تالقىلاي بەرمەي مەكەمەلەردەگى جاعدايدى ءوز كوزدەرىمەن كورگەن دەپۋتاتتار تۇيتكىلدى ماسەلەلەرمەن تەرەڭىنەن تانىستى.
ەلورداداعى ەرتەدەن كەلە جاتقان مۇعالىمدەردى دايىندايتىن قارا شاڭىراق گۋمانيتارلىق كوللەدجدىڭ تاريحى 1944 جىلداردان باستالادى. اتالعان ءبىلىم ورداسىنان وسى ۋاقىتقا دەيىن تالاي مىقتى پەداگوگتار ءبىلىم الىپ، ەلىمىزدىڭ تۇكپىر-تۇكپىرىندە قىزمەت ەتىپ ءجۇر. سول كەزدەگى وبلىستىق يسپولكومىنىڭ ەڭبەكشى دەپۋتاتتارى شەشىمى بويىنشا قۇرىلعان ءبىلىم ورداسى اقمولاداعى قازاق-ورىس تىلدەرىندە وقىتاتىن بىردەن-ءبىر پەدۋچيليششە ەدى. 2019 جىلدان بەرى گۋمانيتارلىق كوللەدج استانا حالىقارالىق ۋنيۆەرسيتەتىنىڭ قاراماعىنا سەنىمگەرلىك باسقارۋعا بەرىلدى. مەملەكەت پەن جەكەلەگەن تۇلعالاردىڭ بىرلەسە باسقارۋىنان گۇلدەنەرمىز دەگەن وقىتۋشىلار مەن ستۋدەنتتەردىڭ ارمانى جەلگە ۇشىپتى. ءبىلىم باسقارماسىنا ستۋدەنتتەر شاكىرتاقىلارىنىڭ ۋاقتىلى تۇسپەيتىنىن ايتىپ ءجيى شاعىمدانسا، ۇستازدار جاعى ەڭبەك­اقىلارىنىڭ ءالى وسپەگەنىن ايتىپ نارازىلىق تانىتۋدا. دەپۋتاتتار كەلەدى دەگەندى ەستىپ ءبىر توپ پەداگوگ كوللەدج الدىنا جينالىپتى. «ءبىز – بۇرىنعى گۋمانيتارلىق كوللەدجدىڭ وقىتۋشىلارىمىز. مەملەكەتتىڭ سەنىمگەرلىك باسقارۋمەن بەرگەنىنە قارسى ەمەسپىز. بىراق سوڭعى ءبىر جىلدىڭ ىشىندە وقىتۋشىلاردىڭ جاعدايى جاقسارىپ جاتقان جوق، كەرىسىنشە ناشارلاپ كەتتى. قازاقستاننىڭ بۇكىل پەداگوگتەرىنە تيەسىلى 25 پايىزدى بىزگە قوسپاي وتىر. استانا حالىقارالىق ۋنيۆەرسيتەتىنىڭ باسشىلىعىنان نەگە ەكەنىن سۇراساق، سەنىمگەرلىك باسقارۋعا بەرىلگەن وقۋ ورنى وندايعا جاتپايدى دەيدى. بىراق مۇعالىمدەرگە قولداۋ پرەزيدەنتتىڭ تاپسىرىسىمەن بەرىلىپ جاتىر عوي. ءبىز دە بارلىق پەداگوگتارمەن قاتار ەڭبەك ەتىپ جاتىرمىز. ال جىل ىشىندە ءبىز بۇرىن الىپ كەلگەن ەڭبەكاقىمىزعا زار بولىپ قالدىق. ءبىزدىڭ بىلۋىمىزشە، سەنىمگەرلىك باسقارۋعا جاعدايى تومەن وقۋ ورىندارىن بەرەدى. ارى قاراي جاقسارسىن دەپ. گۋمانيتارلىق كوللەدجدىڭ جاعدايى سەنىمگەرلىك باسقارۋعا دەيىن دە جاقسى بولدى. ماتەريالدىق جاعدايدىڭ ءبارى بۇرىننان جاسالعان. ءبىز جاقسارۋدىڭ ورنىنا ناشارلاپ كەتتىك. جىلدا بەرىلەتىن پرەميا دا بيىل جوق» دەيدى وقىتۋشىلار قاۋىمى.
استانا حالىقارالىق ۋنيۆەرسيتەتى ءماسليحات دەپۋتاتتارىنان مۇعالىمدەردىڭ ەڭبەكاقىسىن قالپىنا كەلتىرۋگە كومەك بەرۋىن سۇراپ وتىر. ال ءماسليحات دەپۋتاتتارى: «ءبىز سىزدەردى ەستىدىك. بارلىق ماسەلەنى اقىلمەن شەشەيىك» دەپ پەداگوگتاردى سابىرعا شاقىردى. بۇل ماسەلە الداعى ۋاقىتتا ءماسليحات وتىرىسىندا قايتا قارالماق.
كەلەسى نىسان – «Abadan» بالاباقشاسى. سوڭعى ۇلگىدە سالىنعان ءۇش قاباتتى بالاباقشانىڭ وقىتۋ جۇيەسى دە ەرەكشە. بالالاردى شىعارماشىلىققا باۋلۋ ارقىلى ساباق وتەدى. 360 بالاعا ارنالىپ سالىنعان مەكەمەدە قازىرگى تاڭدا 180 بالا ءبىلىم الۋدا. دەگەنمەن بالاباقشانىڭ دا ءوز قيىندىقتارى بار. «مەملەكەتتىك جەكە سەرىكتەستىك اياسىندا 2018 جىلى بالاباقشا قۇرىلىسى باستالعان ەدى. جىل ىشىندە اياقتالۋى ءتيىس نىسان ءۇش جىلعا سوزىلىپ، 2020 جىلدىڭ سوڭىندا عانا پايدالانۋعا بەرىلدى. مەملەكەتتىك سەرىكتەستەرىمىز ينفراقۇرلىم مەن ەلەكتر جەلىسىمەن قامتاماسىز ەتە الماعاندىقتان، قۇرىلىس ۇزاققا سوزىلدى. ءتىپتى بالاباقشا ورنالاسقان جەر تەلىمى دە تولىقتاي باسىمىزعا وتپەي وتىر. بالاباقشا تولىقتاي سالىنىپ ءبىتۋى ءۇشىن نەسيە دە الدىم. قازىر مەكەمە ءوز قۇنىن تولىق وتەي الماعاندىقتان، ءبىلىم باسقارماسىنان قولداۋ كورسەتۋىن سۇرايمىز» دەدى كاسىپكەر الماس ساتىلعانوۆ.
بۇدان ءارى ءماسليحات دەپۋتاتتارى مۇمكىندىگى شەكتەۋلى قالا تۇرعىندارىنا ارنالعان «تارلان» مۇز ارەناسىندا، پاراليمپيادالىق جاتتىعۋ ورتالىعىندا بولدى. «بۇگىن ءبىز گۋمانيتارلىق كوللەدجدىڭ، بالاباقشانىڭ جانە سپورت نىساندارىنىڭ جۇمىسىمەن تانىسۋدى ماقسات ەتتىك. بارلىق جاعدايدى جان-جاقتى قاراپ الداعى ۋاقىتتا شەشۋگە تىرىساتىن بولامىز. مەملەكەتتىك جەكە سەرىكتەستىكتىڭ كۇشىمەن سالىنعان «Abadan» بالاباقشاسىنا ترانسفورماتور كەرەك بولسا، پاراليمپياداشىلارىمىزعا سپورتتىق قۇرالدار جەتىسپەي جاتىر. بيۋدجەتتەن بولىنگەن اقشانىڭ ءتيىمدى جۇمسالۋىن قاداعالايتىن بولامىز» دەدى ءماسليحات دەپۋتاتى ەرلان داكەنوۆ.

كوكتەم قارقىن

پىكىر جازۋ

پوچتاڭىز جاريالانبايدى

5 × 4 =