Төрт жинағын тарту етті

Ұлттық академиялық кітапханаға белгілі қаламгер Баянғали Әлімжанов жаңа жарық көрген төрт жинағын тарту етті.

Сөз зергерінің бұл кітаптары ақындық шабытпен жа­зылған. Айталық, «Әлем әуендері» атты еңбегіне жер бетінде ғұмыр кешіп жатқан халықтарға арналған жырлары жинақталған. Мұндағы мү­сіндей құйылған мінсіз өлең­дер оқырманды бірден үйіріп әкетеді. «Қырғызым, бірге туғаным…» аталған келесі жинағына қаны мен жаны бір көрші айырқалпақты ағайынға арнаған өлең-жырлары, қыр­ғыз ақындарымен айтыстары, «Манас» жырына қатысты ойлы сұхбаттары енген.
Суреткердің «Мейірімді Ас­қар» деген үш тілде шыққан үшінші кітабы – жеткіншектерге әдейілеп жазған қызық­ты ертегіден тұрады. Мұны қазақ балалар әдебиетіне қосылған тамаша туынды деп бағалауға болады.
Ал жазушының сиясы әлі кеуіп үлгірмеген «Сказ столетнего степняка» атты роман-аңызында өткен ғасырдағы халқымыз бастан кешкен зобалаң шындығы көркем тілмен астарлы өрілген.
Сондай-ақ, жиын барысында ақын, публицист Қорғанбек Аманжол мұраттас қаламдасына арнаған өлеңін оқып, ізгі лебізін білдірді. Кітапхана басшысы міндетін атқарушысы Нұржан Жолдыбалинов та авторға алғысын айтты.