ТМД-да ТЕҢДЕСІ ЖОҚ

0 111

Елорданың төрінен бой түзеген Әзірет Сұлтан мешітінің ел игілігіне ұсынылуы, тіпті, әлем мұсылмандарын ризадар етті! Аса көркем келбетті ғибадат сарайы тұңғыш түндігін серпігенде, Арқа төсіне Алланың мейірімі мен нұры шашылғандай әсерге түстік. 

Руха­ни орын он үш гектар жерді алып жатыр, мешіттің жалпы аумағы он жеті мың жеті жүз шар­шы метрді құрайды. Мешіт жобасы қазақ­тың дәс­түрлі ою-өрнектері мен ұлттық нақыш­тағы сәндік элементтері қолданыла отырып, клас­си­ка­лық ислам үлгісінде жасалды. Сондай-ақ, қа­быр­ғала­рында Құран аяттары мен пайғам­ба­рымыздың (с.ғ.с.) хадистері жазылған. Жоба же­текшісі Шефик Искендероғлының айтуын­ша, құрылысқа қажетті материалдар әлем­нің он бір елінен жеткізілген. Көбіне табиғи мате­риалдар пайдаланылған.

Ауқымы мен ажары жөнінен Орта Азия-да ал­дыңғы орында, ТМД мен елімізде теңдесі кем­де-кем мешіт­тің есігі ашылуын халық көптен күт­кен-тін. Елбасы Нұрсұлтан Назарбаев үш жыл бұрын ғиба­дат­хананың естелік құтысын қойған­нан бастап, нысанның құрылысын наза­­рын­да ұстаған. Сондықтан, салтанатты сарай­­дың көз сүйсін­дірмеуі мүмкін емес. Күллі мұсыл­­манға шүкір­шілік айтқызып, сәулетімен талай­дың таң­дайын қақтырған Астанадағы Жарат­­қан­ның үйінің ашылуы Ұлу жылының еншісіне бұйырыпты.

Үш қабаттан тұратын ғибадатханада бір мезгілде бес мың, мұсылман мерекелерінде он мың адамға дейін намаз оқи алады. Төрт мұна­расы бар мешіт қазіргі әлемдік сәулет өнерінің барлық талаптарына сай жасалған. Әрқайсысы жетпіс жеті метр биіктікті бағындырады. Бас күмбездің биіктігі – елу бір, диаметрі жиырма сегіз метрді орап жатыр. Мұнда неке қию рәсімін өткізетін бөлмелер, Құран оқу залдары, мешіт қызметкерлерінің бөлмесі, кітапхана, жүз отыз орындық бес дәрісхана бар.

Мешіттің бас имамы Қайрат Жо­лдыбайұлы ру­хани орданың деңгейіне сай жұмыс жасауға әу бастан күш салды. Иләһи термелер бай­қауын жариялады. Мұсылман мерекелерін­де, әсіре­се, Ораза айындағы «ауызашар» рәсімін­де Ас­­та­на жұртшылығын бір дастархан төрі­не сый­­­­­ды­рып, ой-пікірлеріне құлақ асты. Ме­шіт тір­­­­ші­лі­­гі­нен, Ис­лам елдері жаңалықтары­нан, ша­ри­ғат жолдарынан үн қататын www.muslim.kz сайты көпшілікке жол тартты. Оқыр­ман кө­кейіндегі кез келген сауалын сайт арқылы Әзірет Сұлтан мешітінің бас имамы, ғалым Қайрат Жолдыбайұлына жолдап, көңілге қонымды жауап ала алады.

Асхат РАЙҚҰЛ

Пікір жазу

Почтаңыз жарияланбайды

two × 3 =