تىزىمدە – 361 كاسىپورىن

0 91

پرەمەر-مينيستر اسقار ءماميننىڭ توراعالىعىمەن وتكەن ەكونوميكانى جاڭعىرتۋ جونىندەگى مەملەكەتتىك كوميسسيا وتىرىسىندا قازاقستانداعى جۇيە قۇرۋشى كاسىپورىنداردى مەملەكەتتىك قولداۋ شارالارى قارالدى. ۇكىمەتتىڭ رەسمي سايتى حابارلاعانداي، ۇلتتىق ەكونوميكا ءمينيسترى رۋسلان دالەنوۆ جۇيە قۇرۋشى كاسىپورىنداردىڭ ءتيىستى ءتىزىمىنىڭ جوباسىن تانىستىردى. تىزىمگە قۇرىلىس، كولىك، ەنەرگەتيكا، ساۋدا، جىلجىمايتىن مۇلىكتى جالعا الۋ، تاۋ-كەن ءوندىرىسى جانە وڭدەۋ ونەركاسىبى سالالارىنداعى 361 كاسىپورىن ەنگىزىلگەن.
مەملەكەتتىك قولداۋ شارالارى رەتىندە نەسيەلەر بويىنشا مەملەكەتتىك كەپىل­دىكتەردى ۇسىنۋ، جەڭىلدىكتى وتىمدىلىككە قول جەتكىزۋ، سالىق تولەۋدى كەيىنگە قالدىرۋ، ققس قايتارۋ پروتسەسىن جەڭىلدەتۋ ءارى جەدەلدەتۋ، بارلىق رۇقسات بەرۋ قۇجاتتارى مەن مەملەكەتتىك قىزمەتتەردى ۇسىنۋدى جەدەلدەتۋ قاراستىرىلادى.
جۇيە قۇرۋشى كاسىپورىندار ءوز كەزەگىندە جالاقى تولەنەتىن جۇمىس ورىندارىن ساقتاۋعا، وتاندىق وندىرۋشىلەردىڭ تاۋارلارى مەن كورسەتىلەتىن قىزمەتتەرىن ساتىپ الۋعا (بولعان جاعدايدا), قولدانىستاعى كەلىسىمشارتتار اياسىندا ۋاقىتىلى تولەمدەردى قامتاماسىز ەتۋگە، اشىق اقپارات بەرۋگە، 2019-2020 جىلدار ءۇشىن توپ-مەنەدجمەنتكە ديۆيدەندتىك تولەمدەر مەن بونۋستاردى الىپ تاستاۋعا مىندەتتەلەدى.
سونىمەن قاتار، وتىرىستا ازاماتتىق اۆياتسيا سۋبەكتىلەرىنە سالىق جەڭىلدىكتەرى مەن ارتىقشىلىقتارىن بەرۋ، مەملەكەتتىك قولداۋدىڭ باسقا دا شارالارى، اۋىل شارۋا­شىلىعى مەن ماشينا جاساۋ سالالارىنداعى ءىرى كاسىپورىنداردىڭ وپەراتسيالىق قىزمەتىنىڭ قازىرگى ماسەلەلەرى جانە ت.ب. قارالدى.

پىكىر جازۋ

پوچتاڭىز جاريالانبايدى

five × five =