ТАРИХТЫҢ ТАМАША БЕТТЕРІ

Елбасы Нұрсұлтан Әбішұлы Назарбаевтың әлемдік беделі мен еліміздің жасампаз бағдарламасы арқасында Астана қаласында 2017 жылы өтетін халықаралық көрмені өткізу мәртебесіне иеленуі бәрімізді қатты қуантты. Қоғамның белсенді мүшелері мұғалімдер үшін 2017 ерекше жыл болатыны белгілі.

Бүгінгі 5-сынып оқушылары 2017 жылы ерікті волонтерлер болып, елімізді танытуға ересектермен бірге ат салысады деп үміттенемін. Қоғамда зор сер­піліс пен дәуіріміздің тағы бір тамаша тарихи беттері ашылмақ.

Мен тәуелсіздіктің алғашқы жылы Тұңғыш Президентіміз Нұрсұлтан Назарбаевпен Алматы қаласында өткен «Қарқара – 93» атты халықаралық көрмеде кездескенімді есіме алдым. Әсем қала Алматыда тұңғыш рет ұйымдастырылған «Атакент» көрме павильондарында енді ғана азаттығын алған елімізге жүздеген елдер өздерінің ең жаңа өнімдерін әкелді. Сол жылы мен Германия мемлекеті Гете институтының шет елдерде неміс тілінен сабақ беретін мұғалімдеріне арналған оқу грантын жеңіп алып, неміс елімен танысып келген шағым еді. Істе­ріне тиянақты, тәртіпті, жаңашыл елдің жоба­сында менің құжаттарым сақталып қалған екен. Халық­аралық көрме алдында Германиядан телефон соғып, менің Қазақстанның оңтүстік астанасы Алматыда өтетін көрмеде аудармашы болуыма ұсыныс жасалын­ды. Мен келісімімді бердім. Бірақ жүрегімде азда­ған қор­қыныш болғаны рас. 1 аптаға созылған көр­меге ерекше дайындық болды. Германия елінен кел­ген алдыңғы қатарлы бизнес өкілдері үшін не­міс­ше, орысша және қазақша таза сөйлейтін ел аза­мат­тары болғанын қалаған олар маған өз өнімдері тура­лы деректер беріп, дайындалуды тапсырды.

Халықаралық «Қарқара – 93» көрмесінің ең жауапты күні көрменің ашылуы мен оған Елбасының қатысып, аралап көруі болатын. Мен бұл сәтті еш­қа­шан ұмыт­паймын. Таңертеңгі сағат 10 мен 11 арасында Елбасы көрмеге келді. Жанындағы өкі­мет басындағы көмекшілері мен іскер қауым қоше­метпен қарсы алды. Нұрсұлтан Әбішұлы Германия елінен келген қонақтардың өнімдерін түгелдей асық­пай аралап көрді. Әрқайсысына сұрақтар қойды. Мен қазақшадан немісшеге, немісшеден орысшаға аударма жасап, қызмет еттім. Донауверт қаласынан келген Т.Демирель атты мырзаның фирмасы мен өнімдерін қарап болған соң:

– Сіздің Түркия президенті С.Демирель мырзаға қандай қатысыңыз бар? Ол кісіде сіздің жасыңыздағы баласы жоқ еді ғой? – деп сұрақ қойды. Германияда 40 жылдан астам уақыт тұратын Демирель, өзі­нің алыс ағайындас туыс екенін, өзі Германия мемле­кетін соғыстан кейін көтеруге кеткен түрік ұлтының өкілі екенін айтты. Неміс елінен келген іскерлер мен бизнес өкілдері Н.Назарбаевтың неміс елі па­вильон­дарын аралап, сөйлескендеріне риза болып, көптеген суреттерге түсірді. Сол кездің бір дана суретін мен отбасылық мұрағатымда сақтап келемін. Елімізді әлемге танытумен қатар Елбасымыз жастар мен хал­қы­мыздың болашағына жасаған жаңа бір зор қа­дамы екенін көзбен көріп, құлақпен естіп, қол­мен жасау керектігіне қалайша мақтанбайсың? Еліміз­ге, халқы­мызға бей­біт­шілік тілей отырып, осы шараға әрқай­сысымыз атса­лысуымыз керек- ақ деп ойлаймын.

Мағрифа СЕЙТБАТТАЛОВА