©2020 استانا اقشامى
كوكشەتاۋ قالاسىندا جالپى ءبىلىم بەرەتىن پاندەر بويىنشا ۇيىمداستىرىلعان رەسپۋبليكالىق وليمپيادا ءوز مارەسىنە جەتتى. ەلىمىزدىڭ بارلىق وڭىرلەرىنەن جينالعان 735 وقۋشى بەس كۇن بويى باسەكەگە ءتۇستى. ولاردىڭ ىشىندە ءبىزدىڭ بالالار دا بار. استانالىق ۇل-قىزدار قاتارلاستارىنان قالسىن با؟! العىرلىقتارىن دالەلدەپ، جۇلدەلى ورىنداردى قورجىنعا كوپتەپ توعىتتى.
سايىستىڭ ىرىكتەۋ كەزەڭدەرى كۇزدە باستالعان-دى. مەكتەپىشىلىك، قالالىق، اۋداندىق، وبلىستىق دەڭگەيدەگى تۋرلاردا ۇزىن سانى 350 مىڭعا جۋىق وقۋشى باق سىنادى. اقتىق جارىسقا ماتەماتيكا، فيزيكا، حيميا، بيولوگيا، گەوگرافيا جانە ينفورماتيكا پاندەرىنەن وزا شاپقان شاكىرتتەر ءوتتى.
كىلەڭ ازۋلى قارسىلاستاردى شاڭ قاپتىرىپ، الدىڭعى قاتاردان كورىنۋ وڭاي شارۋا ەمەس. ايتسە دە، باس قالانىڭ ۇلاندارى بۇل اسۋدى باعىندىردى. بەس التىن، ون ءبىر كۇمىس جانە ون التى قولا مەدالدى ەنشىلەگەن ەلوردا وقۋشىلارى جالپىكوماندالىق ەسەپتە ءبىرىنشى ورىنعا تابان تىرەدى. وسىلايشا جاراتىلىستانۋ-پوليتەحنيكالىق باعىتتاعى ەڭ ۇزدىك توپ اتاندى. سونىمەن قاتار، ارالارىنداعى ەكى شاكىرت الماتى قالاسىنداعى حالىقارالىق اقپاراتتىق تەحنولوگيالار ۋنيۆەرسيتەتىنىڭ گرانتىن جەڭىپ الدى.