Сынақтан сүрінгендер қызметінен босатылды

Оңал БЕКЕЕВ, ҚР ІІМ «Мамандандырылған күзет қызметі басқармасы» бастығының орынбасары – кадр жұмысы басқармасының бастығы

– Оңал Ботайұлы, Елбасының Жарлығына сәйкес құқық қорғау органдары қызметкерлерін кезектен тыс аттестаттау нәтижесі қандай өзгерістер әкелді?

– Елбасы тапсырмасына сәйкес, ішкі істер органдары қызметкерлерін кезектен тыс аттестаттау кезең-кезеңімен жүзеге асырылғаны белгілі. Мамандандырылған күзет қызметі басқармасының 11 мыңға жуық қызметкерлері түгел сынақтан өтті. Нәтижесінде 263 қызметкер жоғары лауазымды қызметке ұсы­ны­лып, кадр­лық резервке алынды. 9370 адам қызметіне сай болса, 179-ы қызметіне лайық болмай, атқарып отырған лауазымдарынан төмендетілді. 307 қызметкер басқа лауазымға ауыстырылса, 663 адам қызметтен босатылды. Осылайша, кезектен тыс аттестаттау барысында білімі мен біліктілігі сәйкес келген азаматтар іріктелді.

– Мекеме қызметкерлерінің ең басты міндеті қандай?

– Басты атқаратын міндетіміз – аса маңызды мемлекеттік стратегиялық нысандардың және орталық, әкім­ші­лік, мемлекеттік органдардың қа­уіп­сіздігін қамтамасыз ету болып та­былады.

– Елбасы Жолдауында айтыл­ған міндеттерді жүзеге асыру үшін­ нақты қандай шаралар қолға алын­ды?

– Өздеріңізге белгілі, елімізде бүгінгі таңда құқық қорғау жү­йе­сін ары қарай жаңғырту бағ­дар­­ла­­малары әзірленуде. Бұл бағ­дар­лама Мемлекет басшысының «Қа­зақстан-2050» Стратегиясы: қа­лыптасқан мемлекеттің жаңа сая­си бағыты» атты Жолдауында ай­қындалған міндеттерге сәйкес әзір­­ленетін болады.
Жалпы сынақ көрсеткендей, қызметкерлердің біліктілігін арттыру қажеттілігі, алдағы жұмыс бағыттарын жүргізу мәселелері қолға алынды. Осы ретте тәжірибе жаттығулары мен қызметкерлердің кәсіби даярлығын арттыру жұмыс­та­рына басымдық беріле бастады.

– Сынақтан сүрінген қызметк­ерлер­дің орнын кім басады?

– Қазіргі таңда республика бойынша 1500-ге жуық бос лауазым орындары бар. Сондықтан жоғары білімді, спорттық бейімі, ішкі істер органдарының барлық талаптарына сәйкес келетін білікті азаматтар, жұмысқа қабылдануға өтініш берсе болады.
Өйткені, Елбасы атап өткендей, мемлекеттің құқық қорғау қызметі одан әрі дамытуды және жетілдіруді талап етеді. Осы міндеттерді шешу үшін құқық тәртібі органдарын нығайту, олардың жұмыстарының нысандары мен әдістерін жетілдіру ғана емес, сонымен қатар кадр саясатының тұрақтылығын қамта­ма­сыз ету, құқық қорғау органдары қызметкерлерінің біліктілігі мен тәртібіне талапты күшейту қажет.

– Рахмет!

 Гүлмира АЙМАҒАНБЕТ