SWDIÑ QATERİN QAPERDEN ŞIĞARMAÑIZ

0 168

qutqarwşılar

Jaz bolsa Esildiñ ön boyında seyil qurıp, swğa qarmaq salıp balıq awlap, kök maysağa jayğasıp tınıstap, özenniñ swına şomılıp jatqandardıñ sanı bir tolastağan emes. Şomılw mawsımımen birge qawip-qaterdiñ de eselene tüsetini belgili. Biz osı orayda Astana qalası Tötenşe jağdaylar departamentiniñ «Swda qutqarw qızmeti» memlekettik mekemesiniñ bastığı Ermek Älibekovten jaña mawsımğa dayındıq barısı jöninde bilgen edik.

– Resmï türde şomılw mawsımı aşılsa da, swdıñ äli bolsa da salqındığı bar. Onıñ adam ömirine qanşalıqtı qawpi bar?

– Salqın swğa şomılwdıñ, äsirese süñgigende adamnıñ qan tamırları jïırılıp, bulşıq etteri kürt tartıladı. Sonday jağdayda adam esinen tanıp, tınısı bitelip, jüregi toqtap qalwı mümkin. Deni saw, şınıqqan adamdardıñ qawipsiz şomılwı üşin swdıñ temperatwrası +18°S, awa temperatwrası +22°S bolw kerek. Bïılğı jaz salqındaw bolıp turğan sebepti Esilge şomılwğa äli erterek der edim.

– «Swğa ketken tal qarmaydı» degen söz bolsa da, tehnïkanıñ küşi men mamandardıñ biliktigi adam qutqarwda bastı orın aladı ğoy. Qızmettiñ tehnïkalıq bazası qalay jabdıqtalğan?

– Elordada jağajayda demalw qawipsizdigin baqılawmen Astana qalasınıñ TJD Swda qutqarw qızmeti aynalısadı. Bïılğı jaz mawsımına 13 motorlı qayıq saqaday say tur. Sonımen qatar, tört jedel avtokölik pen ştattağı on süñgwir kündiz-tüni Esildiñ boyın qadağalaydı.

– Saymanıñız say bolsa da qater qaydan keledi dep oylaysız?

– Demalwşılar köp jağday­da şomı­latın jerge köñil awdar­maydı. Eñ bastısı, arnayı jabdıqtalğan, swğa tüswge ruqsat etilgen orındı tañdaw kerek. YAğnï, qutqarw­şılar patrwl'dik jasaytın jağajaylar men arnayı belgi­len­gen orındarda ğana şomılw qajettigin qaperden şığaradı. Onıñ saldarı qayğılı oqïğalarğa alıp keldi. Ötken jılı qala awmağında 25 adam swdan qutqarıldı. Onıñ üşewi – balalar. Segiz adam swdan ajal taptı. Statïstïkağa süyensek, zardap şekkenderdiñ jalpı sanınıñ 70-75 payızı 30 jasqa deyingi jastar bolsa, 20 payızı – balalar men jasöspirimder.

– Jaña şomılw mawsımında tötenşe jağdaylar boldı ma?

– Eki jigitti qutqarıp, alğaşqı medïcïnalıq kömek körsetildi. Al, mamırdıñ orta şeninde tıyım salınğan jerde şomılğan bir adam swğa batıp ketti. Ayta keteyik, qayğılı oqïğalardıñ basım böligi mas küyde şomılıp, swda şomılwdıñ erejelerin bilmewdiñ nemese saqtamawdıñ saldarınan orın aladı.

– Onda oqırmandardı bas­tı erejelermen tanıstıra ketseñiz.

– Swğa tüskende jağajaydağı şektelgen belgiden asıp ketwge bolmaydı. Şomılwğa jabdıq­talmağan jäne tıyım salınğan orındarda şomılwdıñ qaterli ekenin este saqtañızdar. Jürginşi jäne kölik köpirinen swğa sekirw qawipti.

Qala awmağında qalalıq jağa­jayda swğa tüswge ruqsat etilgen. Osında kişkentay balalarğa arnalğan arnayı qorşalğan, swı tayaz jer barın esteriñizge salayın. Ömirleriñizdi qaterge tikpey, qawipsizdik erejelerin saqtañızdar.

Aygül WAYSOVA

Pikir jazw

Poçtañız jarïyalanbaydı

ten + 4 =