شۇعىلا ءان شىرقادى

0 378

شۇعىلا

«قازاقستان» ورتالىق كونتسەرت زالىندا بۇگىنگى بي ونەرىنىڭ ايتۋلى وكىلى شۇعىلا ساپارعاليقىزىنىڭ «قازاعىم، بارىم سەن ءۇشىن…» اتتى جەكە شىعارماشىلىق كەشى ءوتتى. بۇرىن بۋىنسىز بيشىلىگىمەن تانىلعان شۇعىلا بۇل جولى انشىلىگىمەن دە كوزگە ءتۇستى.

«ۇكىلى ارۋ»، «بورتەنىڭ ءبيى»، «اي نۇرى» سياقتى بيلەرىمەن بارشاعا تانىمال ونەر يەسىنىڭ كەشىنە كورەرمەندەر كوپ كەلدى. ونىڭ قويىلىمدىق بيلەرى ونەرسۇيەر قاۋىمدى ءتانتى ەتتى. كەشتەگى ءان مەن بي، ونى تولىقتىرىپ وتىرعان ەكرانداعى كورىنىستەر جينالعانداردى ادەمى اسەرگە بولەدى.

سونداي-اق، شۇعىلا وپەرا انشىلەرىمەن بىرگە يتاليا كلاسسيكالارىنان ۇزىندىلەر ورىنداپ، تاعى ءبىر تالانتىن تانىتتى. پاتريوتتىق، ليريكالىق، زاماناۋي اندەردى قينالماي شىرقاعان بي شەبەرى تۇرىكتىڭ ءانىن ءوز تىلىندە ورىنداپ، تاجىكتىڭ ءانىن قىتايشا تامىلجىتتى. ءوزىنىڭ ايتۋىنشا، ونەر ادامىنىڭ ءان مەن ءبيدى قاتار الىپ جۇرۋگە شاماسى جەتەدى.

وسى كەشتەگى تاعى ءبىر ەرەكشە كورىنىس بيشىدەن ءتالىم-تاربيە الىپ جاتقان شاكىرتتەرىنىڭ ونەر كورسەتۋى بولدى. جاستارىنا قاراماي، ءبيشى قىزداردىڭ وزدەرىنىڭ قويىلىمدارىنا ۇلكەن جاۋاپكەرشىلىكپەن قاراعاندارى بايقالدى. ولاردىڭ قيمىلدارى، تالپىنىستارى وزدەرىنە جاراسىپ-اق تۇردى.

ال، ءبيشى شۇعىلا ساپارعاليقىزى ءوز كەزەگىندە بولاشاق جوسپارلارىمەن ءبولىستى. «الداعى ۋاقىتتا ەلىمىزدىڭ ءىشى-سىرتىندا كوپتەگەن كەشتەرىم وتپەكشى. وعان قوسا، كۇز ايىندا تۇڭعىش ءان جيناعىمدى حالىققا ۇسىنامىن»، – دەيدى ول.

كورەرمەندى سۇلۋلىققا ەلىتتىرىپ، بىردە ويعا شومعىزىپ، بىردە دەلەبە قوزدىرعان باعدارلاما ەلوردالىقتارعا ەرەكشە ۇنادى. بۇعان ونەر جۇلدىزىنا ارنالعان قۇشاق-قۇشاق گۇلدەر مەن بيسۇيەر قاۋىمنىڭ ىستىق ىقىلاسى دالەل.

ەركەجان ساتىمبەك

پىكىر جازۋ

پوچتاڭىز جاريالانبايدى

3 × 3 =