Шет аймақтар шағын аудандарға айналады

0 22

Нұр-Сұлтан қаласының әкімі Алтай Көлгінов Instagram парақшасында қаланың тұрғын үй алаптарының қалай дамып жатқаны туралы жазды.«Елорданың абаттандырылған аудандары мен шеткері аймақтардың арасындағы айырмашылықты жою үшін жүйелі жұмыс жүргізіп жатырмыз. Біртіндеп шеткері аймақтар ыңғайлы шағын аудандарға айналмақ. Қалада барлығы 16 елді мекен бар. Елорданың әрбір төртінші тұрғыны елді мекенде тұрады.
Ал жол жұмыстарына тоқталатын болсақ, биыл 100-ден астам көше салып, жөндеуді жоспарлап отырмыз. Сонымен қатар биыл 37 көшеде жөндеу жұмыстары жүргізілді. Өткен жылдағыдай қаланың ескі бөлігіне, елді мекендерге, қозғалыс қарқындылығы жоғары әлеуметтік нысандар мен көшелерге апаратын жолдарға баса назар аударамыз.
Өткен жылы елді мекендерде 100-ден астам, ал жалпы қала бо­йынша 170-тен астам көшеге асфальт төселді. Елді мекендерде 345 км орамішілік газ тарату желілері салынды. Жылыту маусымында (2020-2021 жж.) Железнодорожный, Көктал-2, Агроқалашықтың бір бөлігінің тұрғындары газға қосылу мүмкіндігін алды. Жаңа жылыту маусымында газға қосылу мүмкіндігін Оңтүстік-Шығыс, Промышленный, Көктал-1, Агроқалашық елді мекендерінің тұрғындары алады. Сонымен қатар елді мекендерде 13,5 км инженерлік желілер, 5 км-ден астам кәріз бен су құбыры, 3 км-ден астам нөсер кәрізі салынды. Алдағы жылдары Nur Otan партиясының сайлауалды бағдарламасына сәйкес тағы 130 км сумен жабдықтау және су бұру желілерін, 85 км нөсер кәрізін, қосалқы станса мен 177 км электр­мен жабдықтау желілерін, 23 км жылумен жабдықтау желілерін, 3 кешен нөсер кәріздерін тазарту құрылыстарын саламыз.
Өткен жылы 40 қоғамдық кеңістік абаттандырылды. Қарау­сыз қалған жерлер қазір жергілікті тұрғындардың жақсы көретін орындарына айналды. Тағы да 50 саябақ пен сквер құру, 120 км астам велосипед жолдарын салу және т. б. жоспарда бар.
Екі мектеп салынды. Мысалы, Мичурино елді мекенінде бұрын бірде-бір мектеп болған жоқ. Балалар бейімделген бөлмеде оқыды. Шеткері аймақтарда тағы 6 мектеп салу, бірқатар медициналық орталықтар ашу, әлеуметтік қолжетімді тұрғын үй салу жоспарда бар. Өндіріс, Көктал, Ильинка, Железнодорожный елді мекендерінде дене шынықтыру-сауықтыру кешендерінің құрылысын жүргізіп жатырмыз. Онда спортпен шұғылдануға арналған кабинеттерден басқа қарт адамдарға арналған қызығушылық клубтары, ХҚКО, полиция пункттері, пошта бөлімшелері және т. б. орналасады. Оларды биыл ашамыз.
Біздің мақсатымыз – елорданың шеткері аймақтарын жайлы шағын аудандарға айналдыру. Тұрғындарға қажет барлық әлеуметтік нысандар, тиісті инфрақұрылым мен демалыс орындары бар. Осы бағыттардың барлығын елордамыз дамып келе жатқан «Нұр-Сұлтан – жайлы қала» мастер-жоспарына енгіздік» деді бас қала әкімі.

Пікір жазу

Почтаңыз жарияланбайды

3 × one =