САРАБДАЛ САЯСАТТЫҢ САЛТАНАТЫ

Қазақстанда қоғамдық келісім мен бірлікті сақтауға, түрлі ұлт өкілдерінің мәдениеті мен тілін, рухани­ құндылықтарын дамытуға барлық жағдай жасалуда. Оған әлемдік қауымдастық қызығушылық танытты.­ Бұл тату-тәтті өмір сүрудің озық үлгісі деп, дүние жүзі мойындаған мемлекетімізде жүргізіліп келе жатқан сарабдал саясаттың жасампаз­ сипатының бір көрінісі екенін мақтан етуіміз керек.

Біз Елбасының көрегендігімен адамзат баласының бейбіт қатар өмір сүруінің негізін қалайтын тату­лық пен бірлік деп аталатын құн­ды­лық­тарын баянды ету арқылы жаңа қоғамы­мыз­дың іргетасын қаладық.

Еліміздегі этникалық топтардың аза­маттық-құқықтық дәрежесі бар. Оларға аз санды халықтың өкілі деп­ емес, елі­міздің толыққанды мүшесі, Қазақ­­станның тең құқылы аза­маты деп қараймыз. Бұл – елі­міз­дің ұлт сая­сатындағы берік ұста­ны­мы. Кең ма­ғы­на­сында, мұны мем­­ле­кет құру­шы қазақ халқының ғасыр­­лар­дан келе жатқан дархан пейілі­мен, қалыптасқан дәстүрімен байланыстыруға болады.

Жалпы, мейірімділік пен сүйіс­пен­ші­лік, ұлтаралық төзімділік орныққаны дұрыс. Бәріміз бір үйдің баласындай өмір сүруіміз керек. Және олай өмір сүруге де болатынына көзіміз жетіп отыр.

Асылы, адам мен оның өмірінен артық ештеңе жоқ. Қоғам мүшесі шыққан тегіне, әлеуметтiк жағдайы­на, жынысына, нәсiлiне, ұлтына, тiлiне, нанымына, өзге де айырмаларына байланысты кемсiтілмейді. Оны Ата заңымызда бекіттік.

Елбасы биылғы Жолдауында: «Өзара алауыздық пен жан-жаққа тартқан берекесіздік талай елдің тағ­ды^­­рын құрдымға жіберген. Тіршілік тезіне төтеп бере алмай, жер бетінен ұлт ретінде жойылып кеткен елдер қаншама» деген еді. Шынында да, біз тарих тағылымдарынан, өзгелердің қате істерінен, жаза басқан жерінен сабақ алуымыз керек.

Бірнеше күннен кейін Ассам­блея­ның кезекті сессиясы ел Президенті Нұрсұлтан Назарбаевтың төраға­лы­ғымен «Қазақстан-2050» стратегиясы: бейбітшілік, руханият және келісім мәдениеті» деген тақы­рып­пен өтпек.

Расында да, мұны Ассамблея­ жұмы­­сы­­ның даму сатысы, уақытпен сара­­ла­нып келген жаңа белесі деп қарау­­ға болады. Осы жылдар ара­сында Қазақстанда тілдер мен ұлт­тық мә­де­ниет­терді, салт-дәстүр­лер­ді қайта жаңғырту және насихаттау жұмыстарына мән беріл­ді. Ұлт­ара­лық татулық пен келісім­ді ны­ғай­­ту істері байыпталды. Ал­да­ғы уақытта қазақстандық және ұлттық отан­сүй­гіштік сезімді қалыптас­ты­руда мәдени ділімізді қанықтыра білудің жолы күн тәртібінен түспейтін мәселе болуы тиіс.

Шалатай МЫРЗАХМЕТОВ, Мәжіліс депутаты