САЛАМАТТЫ ӨМІР САПА ӨЛШЕМІ

Қай халық қалаулысы болса да жыл мерзімінде ел игілі үшін көп іс тындыруға тырысады. Жалпы, қалалық мәслихаттың депутаттары төрт топқа бөлінген. Мен соның әлеуметтік және ұлттық мәдени даму мәселелері жөніндегі тұрақты комиссиясының құрамындамын.

Қалалық сайлау комиссиясының төрағасы ретінде он жылдан астам уақыттан бері қоғамдық жұмыспен де айналысып келемін әрі мәслихаттың екінші шақы­рылымына депутат болып сайлануыма байланысты әрине, халық қалаулыларының жұмыс шеңберін, оның маңызын өте жақсы білемін. Өткен жылы қалалық мәслихат өзінің жұмысын әлеуметтік-мәдени сала қыз­ме­тімен танысудан бастаған болатын. Мұның өзі  елордамызда осы салаға айрықша көңіл бөлініп отырғанын аңғартады. Бұл ретте біз, қалалық мәслихаттың бір топ депутаттары елордадағы мәдениет, денсаулық сақтау мекемелерін аралап, соның хал-ахуалымен, алда тұрған проблемаларымен жақы­нырақ таныстық.

Сонымен бірге тұрақты ко­миссиялардың біріккен отырыс­тарында бюджет құрылымы,  құқық тәртібі, құ­рылыс, экология және экономика мәселелері де талқыланады. Көңілге қуаныш ұялататыны, депу­таттардың ұсыныстары көбіне әкімшілік тарапынан қолдауға ие болып жатады. Оның бір айғағы, соңғы уақытта Астанада емдеу меке­­мелерінің қатары артуда. Олар жаңа заман талаптарына сай емдеу құралдарымен, заманауи техно­логиямен түгелдей жаб­дық­талған. Тек, ендігі бір міндет, сол емдеу мекемелерінде қызмет істейтін білікті мамандарды даяр­лау болса, бүгінде мен осы іске атсалысып жүрмін.

Қала тұрғыны әрі әлеуметтік сала қызметкері ретінде мен аста­налықтардың жалпы мәде­ниетіне алаңдаймын. Өйткені, Астана барлық жағынан да өзгелерге үлгі болуға тиіс. Осы орайда денсаулық сақтау саласындағы ең бір қажетті талап – саламатты өмір салтын сақтау. Мемлекеттік «Саламатты Қазақстан» бағдарламасын бас­шылыққа ала отырып, осы мәсе­леге көбірек көңіл бөліп келеміз.

Елбасы Н.Назарбаев та өзінің «Қазақстан-2050: бір мүдде, бір мақсат, бір болашақ» Жолдауында осы мәселеге  кеңінен тоқталғаны белгілі. Өйкені, ұлт саулығы, оның деңгейі мен дәрежесін көтеру – ел қауіп­сіз­дігінің бір кепілі. Бұл мәселені шешуде әрине тек қана денсаулық сақтау саласының мамандары, білім беру мекемелері ғана емес, баршамыз бірлесіп күш жұ­мыл­дыруымыз керек.

Қаршыға ҚҰЛМҰҚАНОВ,

Астана қаласы оқу-клиникалық орталығы денсаулық сақтау жүйесіндегі басқару жұмысы жөніндегі мектептің жетекшісі, қалалық мәслихаттың депутаты