Säkendi ardaqtağan keş

0 26

Ortalıqtandırılğan kitaphanalar jüyesine qarastı №5 balalar kitaphanasında Qazaqstannıñ eñbek siñirgen qayratkeri, belgili änşi, önertanwşı Serik Ospanovpen kezdesw ötti. Bul şara dawılpaz aqın, körnekti memleket jäne qoğam qayratkeri Säken Seyfwllïnniñ 125 jıldığına arnaldı.Serik ağamız da Säken atamız twğan Jañaarqada ömirge kelgen. Bala küninen aytwlı aqındı közi körgen awıldağı käriqulaq qarïyalardıñ äñgimesin tıñdap ösken ören özi de jas şağınan önerge ıntıq bolıp, dombıramen Säken änderin aytıp, elge tanıldı.
Keş barısında Serik Käribayulı Säken Seyfwllïnniñ ömiri men şığarmaşılığı twralı tağılımdı äñgime örbitip, aqınnıñ köpşilik bile qoymaytın qırların aytıp berdi. Qayratkerdiñ murasın indete zerttey jürip, zayıbı Nazgül Sapïyanovamen birge «Säken Seyfwllïn – ult rwhanïya­tınıñ köşbasşısı» attı kitap jazıp, aqınnıñ 16 jaña änin halqımen qayta qawıştırdı. Sonımen birge keş ïesi jïnalğandarğa ataqtı balwan, sazger Balwan Şolaq twralı da tamaşa estelik ayttı. Aytpaqşı, bïıl änşiniñ «Balwan Şolaqtıñ ömiri men mwzıkalıq murası» attı jïnağı jarıq körgen.
Änşi Säken men Balwan Şolaqtıñ änderin tamıljıtıp orındap, köpşiliktiñ köñilin körkem küyge böledi. Sonday-aq keşte tarïh ğılımdarınıñ kandïdatı, professor Däwrenbek Eskekbaev, Ospan Süleymenov sekildi azamattar Serik Käribayulınıñ änşiligi men önertanwşılığı jayında jılı lebizderin bildirdi.
– Men Serikti biraz jıldardan beri bilemin. Önerine tänti azamattıñ birimin desem boladı. Ol än aytıp qana qoymay, zerttewşilikpen de zerdeli aynalısıp jür. Säken ağamızdıñ mwzıkalıq murası twralı tolımdı eñbek jazdı. Balwan Şolaq jayındağı kitabın da qızığıp oqıdım. Serik – san qırlı darın ekendigin moyındatqan azamat, – dedi bilim berw isiniñ üzdigi Ospan Süleymenov.

 

Pikir jazw

Poçtañız jarïyalanbaydı