Sädibektiñ semseri

0 382

«1998 jıldıñ aqpan ayı. Alğaşqılardıñ biri bolıp ulı köşten qalmay, Almatıdan jaña astanamız Aqmola qalasına kelgen kezim. Kün-tün demey, jarğaq qulağım jastıqqa tïmey atqarıp jürgen qızmetim elordamız – Aqmola qalası äkiminiñ baspasöz hatşısı-baspasöz qızmetiniñ jetekşisi. Jaña astanağa qonıstanğan barlıq buqaralıq aqparat quraldarımen tığız qarım-qatınas jasawdağı maqsatımız elordamızdıñ märtebesin asırıp, bedelin köterw bolatın».Elge belgili azamat, Qazaqstannıñ eñbek siñirgen qayratkeri, ultqa sübeli sözde­rimen ğana emes, is­terimen qızmet etip jürgen Sädibek Tügeldiñ bir esteligi osılay bastaladı. Ïä, arada däl jïırma eki jıl ötse de, bäri keşegidey köz aldında sayrap tur.
Qay isti bolmasın aldımen bastaw qïın. Ulı Abay bul twralı «İstiñ qalay bitkenine emes, qalay bastalğanına qarap bağala» dep twra aytqan. Sädibek Tügel jañadan qurılıp jatqan şaharda, jay qala emes, eldiñ bas qalasında jan-jaqqa aqparat taratw isin jolğa qoya bildi.
Halıq kez kelgen oqïğağa BAQ-ta jazılğan maqalanı oqıp, bağa beretini ötirik emes. Jwrnalïstïkanıñ qoğamğa ıqpalı küşti. Bir maqalamen jaqsı isti joqqa şığarıp nemese tükke turmaytın närseni jarqıratıp, jaynatıp körsetwge boladı. Sol sïyaqtı kez kelgen mekemeniñ ïmïdji de bul twralı taratılğan aqparatqa tikeley täweldi. Ğasırlar toğısında astananıñ märtebesi men bedeli Sädibek Tügeldiñ jumısına baylanıstı boldı. Ol özine tapsırılğan isti abıroymen alıp şığa aldı. Onıñ atsalıswımen elorda baspasöziniñ negizi qalandı. Astanalıq aqparat keñistigi qalıptasıp, halıqaralıq baspasöz ortalığı aşıldı.
Baspasöz qızmeti jetekşisiniñ bir mindeti – jwrnalïstermen tığız qarım-qatınasta bolw. Sol waqıtta şındıq twın bïik ustap, eşqaşan jıqpağan marqum Jumatay Sabırjanulı jasınday jarqıldadı. Köziqaraqtı oqırmandar biledi, jwrnalïst jazğan sın maqalalarınıñ bir şeti äkimdikke tïip jatatın. Qazir osınday şınşıl qalamgermen Sädibek Tügel qalay til tabıstı eken degen oy twadı. Al bul ekewi janjaldaspay, kerispey jumıs istegenine kümänimiz joq. Buğan Sädibek Tügeldiñ «Olardıñ esimderi – bizdiñ jüregimizde» attı tamaşa jobası dälel. Astananıñ ösip-örkendewine elewli üles qosqan jwrnalïsterdi eske alw keşi mazmunında ötetin bul joba osı waqıtqa deyin tört ret uyımdastırıldı. Onıñ alğaşqısında Aqselew Seydimbek, Dükeş Bayımbetov, Vladïmïr Koçenov, Talğat İlimjan, ­Rafael' Jumabaev, Oktyabr' Älibekov, Jomart Äbdihalıq, Vladïmïr Boyko, Madrïd Rısbekov, Şakïzada Qut­tayaqov, Almas Joltaev, Oleg Kvyatkovskïy, Birjan Belqara sındı belgili qalamgerlermen qatar Jumatay Sabırjanulınıñ da jarqın beynesi jañğırdı.
Ör Altay men erke Ertis boyında jılqışılar brïgadasınıñ brïgadïri Tügel Qumarulı men kolhoz jumısşısı Märïyanıñ şañırağında jetinşi bala bolıp dünïege keldi. «Jeti» qazaqta qasïetti san sanaladı. Onıñ üstine közin aşqanınan ultımız erekşe qasterleytin jarıqtıq jılqı janwarın körip östi. «Qazaqtıñ qazanatı, qaydasıñ?» dep şarq uratını, Aqan seriniñ tulparı – Qulagerge eskertkiş ornatwı, Ulttıq at sportı federacïyasınıñ qurılwına ıqpal etwi sodan. Osıdan şïrek ğasır burın sol kezdegi Jastar isi, twrïzm jäne sport mïnïstri Birğanım Äytimovağa hat jazwınıñ arqasında osı federacïya qurıldı. Ulttıq müddege, ulttı ulıqtawğa kelgende qolındağı qarwı – qalamın oñdı-soldı siltedi. Bala kezinde äkesi Tügel «Qarındasıñ Saltanatqa qorğan bol» degen ırımmen qanjar da sıylağan. Qazir bul Sädibektiñ semserine aynaldı. Al astana bağın jandırıp, juldızın jarqırattı.
«Tağdırdıñ qalawımen mağan jaña astananıñ tuñğış baspasöz hatşısı bolw baqıtı buyırdı. Bes jarım jıl qaynağan qazannıñ, tarïhï oqïğalardıñ epïcentrinde jürdim. Keremet jobalardıñ jüzege aswınıñ bası-qasında bolıp, qalanıñ jetistikteri men jeñisterine kwä bolğan janmın» deytin, kezinde Parlament Senatında da jawaptı qızmet atqarğan keyipkerimiz qazir birneşe nemere süyip otır.
Astana qalamına qanat bitirip, qalamger retinde qalıptaswına da ıqpal etti. Qolı qalt etse, elorda tarïhı men tağdırın şığarmaşılığına arqaw etedi. Osı waqıtqa de­yin «Kök kümbezdi Astana», «Astana – gorod solneçnoy meçtı», «Astana – jeruyığı elimniñ», «Astana – trïwmf stranı», «Astana – el jüregi», «Astana – serdce stranı», «Alğaşqı astanalıqtar», «Pervoprohodcı Astanı», «Astana baspasöziniñ şejiresi», «Letopïs' stolïçnoy pressı», «Astana hïkayaları» attı kitaptarı jarıq kördi. «Tuñğış» attı p'esası elordanıñ birinşi künderinen bastap jïırma jılğa jwıq tarïhı twralı sır şertedi. «Astana hïkaya­ları» attı kitaptı da jazıp jatır. Odan üzindiler jwrnaldarda basıldı. Al jarıq körgen twındılarınıñ işinde şoqtığı bïigi – «Alğaşqı astanalıqtar» encïklopedïyalıq jïnağı. Oğan Elbası ­Nursultan Nazarbaev bastağan 186 alğaşqı astanalıqtıñ anketaları men estelikteri basıldı. Bul joba ayasında 500-den asa adamnıñ anketası jïnaqtaldı. «Tügel Medïa» medïaholdïnginiñ quramında birneşe basılım şığıp jatqanınan da jurt habardar bolwı kerek. Ötken jılı «Ulı dala qırandarı» respwblïkalıq qozğalısı atınan Prezïdent saylawına tüskende de ulttıq müddeni közdedi.
Kez kelgen memlekettiñ tübine jemqorlıq jetedi dep esepteydi. Qazir osı keseldi tüp tamırımen joyu bağıtında eñbektenip jatır. Osıdan eki aydan asa waqıt burın Nur-Sultan qalası Sıbaylas jemqorlıqqa qarsı is-qïmıl departamenti janınan aqparattıq ügit-nasïhat ştabı qurıldı. Onıñ jetekşisi – Sädibek Tügel. Qolğa alğan är isin urşıqşa üyiretin isker azamatqa bul qızmetinde de jemis tileymiz!

Pikir jazw

Poçtañız jarïyalanbaydı

8 − five =