СӘБИЛЕР ҚУАНҒАН КҮН

0 150

Қалалық Мамандандырылған балалар үйінде «Армысың, әз-Наурыз! Қуан, сәби!» атты мерекелік шара өтіп, ата-ана қамқорлығынсыз қалған екі бүлдіршіннің тұсауы кесілді. 

16-1

Кішкентай Кәусар мен Арманға өнегелі жолы бұйыр­сын деп, тұсау кесу рәсімін орын­дауға қазақстандық денс­аулық сақтау қызметкерлері кәсіподағының Астана қала­сындағы филиалының төрағасы Бақытжан Тәжібай мен 40 жыл бойы білім саласында қызмет етіп, тәрбие жолында 3 балабақша салдырған астаналық Дина Смайылқызы шақырылды.

Сондай-ақ, қонақтар назарына аға тәрбиеші Гаухар Әбсейітованың жетекшілігімен ұйымдастырылған концерттік бағдарлама ұсынылды. Қазақ­тың ұлттық киімін киген бүлдіршіндер былдырлап өлең оқыды, хормен ән салып, топпен би биледі.

«Балалар осы күндері ерек­ше тіл алғыш болып, Наурызға қуана-қуана дайындалды, сый­лықтарды асыға күтті. Адам­шылыққа тәрбиеленуі үшін бала жастайынан мейірімге бөленіп өскені жөн. Осы тұрғыда сәби­лердің тағдырына алаңдап, қайырымдылық көмектерін аямайтын ізгі жандарға алғыс білдіреміз» деді жоғарыда аталған мекеменің бас дәрігері Ләйлә Закарьянова. Мейрам қарсаңындағы іс-шараны меценаттар мен бала асырап алу­ға ниетті ата-аналар тама­шалап, өнерпаздарға түрлі ойыншықтарды тарту етті.

Қазіргі уа­қыт­та Астана қаласы Ма­ман­дандырылған балалар үйінде 76 бала тәрбиеленуде. Оның 29-ы – тастанды болса, 22-сі белгіленген тәртіппен мүгедек деп танылған. Ал, 23 сәби отбасы жағдайына байланысты бұл жерге уақытша орналастырылған.

Мәдина ЖАҚЫП

Материалды “Астана ақшамы” газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.

Пікір жазу

Почтаңыз жарияланбайды

three × 1 =