قۇرمەتتى قۇرىلىسشى

0 219

ارقانىڭ ارداقتى ازاماتتارىنىڭ ءبىرى، «استاناقۇرىلىسسەرۆيس» جشس عىلىمي-تەحنيكالىق قۇرىلىس ساپاسىن قامتاماسىز ەتۋ ءبولىمىنىڭ ينجەنەرى مايدان كومەكۇلى قۇسايىنوۆتىڭ ەسىمى بۇگىندە وسى وڭىردەگى جاقسىلار مەن جايساڭداردىڭ قاتارىندا اتالىپ ءجۇر. ويتكەنى، ول – قازاقستاننىڭ قۇرمەتتى قۇرىلىسشىسى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەس­سورى، قۇرىلىس جونىندەگى كوپتەگەن كىتاپتاردىڭ اۆتورى عانا ەمەس، سو­نىمەن بىرگە «مەموريالدى ايماق» ىزدەستىرۋ وتريادىنىڭ كومانديرى، ەڭ باستىسى، «استانا تاڭداۋى-2012» كونكۋرسىنىڭ جەڭىمپازى.

جاسى جەتپىستى القىمداسا دا، ول تىم تىڭ. تىلىمىز–تاسقا. جاستار­دان ءبىر ەلى قالىسار ەمەس. قۇرمەتتى دەمالىسقا شىعۋعا دا اسىقپايدى. سەبەبى، ەلباسى ايتقانداي، ەل يگىلىگى جولىندا اتقاراتىن اۋقىمدى ىستەرى ءالى دە جەتەرلىك.

ەركە ەسىلدىڭ جاعاسىندا جاڭاشا ساۋلەتتىك ناقىشپەن بوي تۇزەپ جاتقان اسەم قالانىڭ سۇلۋ بەينەسى الى­ستان كوز تارتىپ، كوڭىل باۋرايدى. سوندىقتان، ونىڭ ەرتەڭىنە بارلىق قازاقستاندىقتار ۇلكەن ۇمىتپەن قاراپ، بۇكىل الەم قىزىعا كوز تىگۋدە. ال، وسىنداعى بارلىق ماڭىزدى نىساندار: مەملەكەتتىك، ۇكىمەتتىك عيماراتتار، سپورت جانە تۇرعىن ءۇي كەشەندەرى، كوپتەگەن ساۋدا ورتالىقتارى وسى مايدان اعامىزدىڭ «قولىنان»، ياعني ساپا ساراپتاماسىنان ءوتتى.

قاراعاندىداعى پوليتەحنيكالىق ينستيتۋتتى تامامداعان جاس مامان العاشقى ەڭبەك جولىن پاۆلودار قالاسىنىڭ يندۋستريالدىق ينستيتۋ­تىندا «قۇرىلىس ءتارتىبى» پانىنەن ءدارىس وقۋدان باستايدى. ءۇش جىل­دان سوڭ تسەلينوگرادتىق ستۋدەنت­تەرگە ساباق بەرە باستاعان مايدان كومەكۇلى 1981 جىلى لەنينگرادتاعى ينجەنەرلىك-قۇرىلىس ينستيتۋتىنىڭ اسپيرانتۋراسىن ءبىتىرىپ، تەحنيكا عىلىمىنىڭ كانديداتى عىلىمي اتاعىن الىپ، تۋعان قالاسىنا ورالادى.

– ەلوردا جاڭا سالىنا باستاعان تۇستا ءبىز جاڭارتىلعان الەمدىك تەح­نولوگيالارمەن تانىسا باستادىق. مەن سول كەزدە ونى يگەرۋگە قاتىستىم. سول تۇستىڭ وزىندە-اق ستۋدەنتتەرىمدى نەمىستىڭ جانە فرانتسۋزدىڭ قۇرىلعىلارىمەن تانىستىرىپ، اپتا سايىن ولاردى قۇرىلىس الاڭدارىنا الىپ شىعىپ، بارلىق پروتسەستى كوزدەرىمەن كورۋگە مۇمكىندىكتەر تۋعىزدىم. جاس ەلوردامىزدى مىنە، بۇگىندە ءدال سولار سالىپ جاتىر، – دەيدى «استاناقۇرىلىسسەرۆيس» جشس-ءنىڭ ينجەنەرى مايدان قۇسايىنوۆ.

2002 جىلى ول رەسەي فەدەراتسياسىنىڭ ەلشىلىگىن سالۋعا كىرىسەدى. ءدال سول كەزدە، ەلشىلىك عيماراتىنىڭ قۇرىلىسىن باستاماس بۇرىن ول قالا ساۋلەتى بويىنشا قانشاما ادەبيەتتەرمەن تانىسىپ، ەلوردانىڭ قۇرىلىسىندا وزىنشە ءىز قالدىرۋعا كىرىسىپ كەتەدى. سونىڭ ارقاسىندا بۇگىندە استانانىڭ كەلبەتىندە ۇلتتىق ناقىش بايقالادى.

– ءال-فارابي بابامىزدىڭ ەڭبەكتەرىندە ونىڭ قۇرىلىس سالاسىنا قاتىستى ەكسپەريمەنتتەرى تۋرالى دا ايتىلعان. دەگەنمەن، كوپشىلىك ول كىسىنىڭ قۇرىلىسشى دا بولعانىنان بەيحابار. نەگىزى ول الەمدەگى ەڭ بەرىك، كليماتتىق جاعدايلارعا ءتوزىمدى عاجايىپ قاقپالار مەن كۇمبەزدەردى سالعان ەكەن. كوپتەگەن تۇرعىن ءۇي كەشەندەرىنە ولار ەرەكشە ءسان بەرىپ تۇر. ماسەلەن، پرەزيدەنتتىڭ ەسكى رەزيدەنتسياسىنىڭ قۇرىلىسىندا ەۋروپالىق ستيل باسىم بول­سا، اقوردادا ءال-فارابي كۇمبەزى جارقىراپ تۇر. دەمەك، قالا باستاپقىدا كۋروكاۆا جوسپارلاعانداي ەۋروپالىق ەرەكشەلىكتەرمەن ەمەس، قازىرگى كۇندە ۇلتتىق ناقىشتارى بار وزىندىك قايتالانباس كەلبەتىمەن ايشىقتالىپ، اجارلانىپ كەلەدى، – دەيدى م.قۇسايىنوۆ.

مايدان كومەكۇلى جاڭا قۇرىلىس الاڭدارىندا بارلىق جۇمىستىڭ ساپالى اتقارىلۋىنا جاۋاپ بەرەدى. سوندىقتان دا، بۇل جەرلەردەگى كىشكەنتاي عانا كەمشىلىكتىڭ قانشاما قيىندىقتارعا اكەلىپ سوعۋى مۇمكىن ەكەنىن ول جاقسى بىلەدى. ءوزى قۇرىلىس سالاسىنداعى ساپانى باقىلاۋ بويىن­شا كوميسسيانىڭ مۇشەسى.

ءوز ماماندىعىن جەتە مەڭگەرگەن، وزىنە دە، وزگەگە دە تالاپ قويا بىلەتىن ىسكەر جاندى باسشىلار دا باعالاي بىلەدى. «ماكەڭنىڭ تاجىريبەسى – كومپانيامىز ءۇشىن باعا جەتپەس بايلىق. ول بىلگەندەرىن كەيىنگىلەرگە ۇيرەتىپ كەلەدى جانە مۇنىڭ ءبارىن شىن كوڭىلىمەن ىستەيدى. قاي جاعىنان الىپ قاراساق تا، ول اسا ءپرينتسيپشىل ادام. «استانا تاڭداۋى» كونكۋرسى بارىسىندا ءبىز ۇجىم بولىپ سول كىسىگە داۋىس بەردىك. ويتكەنى، ءبىز مايدان كومەكۇلىنىڭ ەلوردامىزداعى ەڭ تاڭداۋلى ازاماتتاردىڭ ءبىرى ەكەنىنە ەش كۇمان كەلتىرگەن ەمەسپىز»، – دەيدى «استاناقۇرىلىسسەرۆيس» جشس-ءنىڭ ديرەكتورى جۇماعالي قۇسايىنوۆ.

ءوزىنىڭ ءومىر سوقپاعىندا سىيلاستىق پەن دوستىقتىڭ ۇلاعاتىن ۇلىقتاپ، ۇلكەنگە قۇرمەت، كىشىگە ىزەت بولارلىق قاسيەتىمەن دارالانىپ جۇرگەن اعامىزدى استانالىقتار دا شىن مانىندە ماقتان تۇتادى. «استا­نا تاڭداۋى-2012» كونكۋرسىنىڭ جەڭىمپازى اتانۋى دا سوندىقتان بولسا كەرەك.

گۇلبارشىن وكەشقىزى 

پىكىر جازۋ

پوچتاڭىز جاريالانبايدى

two × 4 =