Qorşağan ortanı qorğaw qay deñgeyde?

0 57

Elordada 12 ülken gülbaqtıñ jobası äzirlenip jatır. Alayda bul jobalardı bïıl jüzege asırw üşin qarjı bölinwi kerek. Nur-Sultan qalası mäslïhatınıñ qurılıs, ekologïya, kölik, sawda jäne turğın üy-kommwnaldıq şarwaşılıq mäseleleri jönindegi turaqtı komïssïyanıñ otırısında munı aytqan qalalıq Qorşağan ortanı qorğaw jäne tabïğattı paydalanw basqarmasınıñ basşısı Älïya Qojabaeva byudjetti aldağı naqtılaw kezinde osı jobalardı qoldawdı ötindi.

AĞAŞTARDIÑ JERSİNWİ – 61 PAYIZ

Onıñ sözinen uqqanımız, atalmış basqarmanıñ osı jılğa josparları az emes. Mäselen, bïıl «Üzdiksiz kögaldandırw» jobası äzirlenbek. Buğan qosa, qala tarïhında tuñğış ret ïnternet-platformada jasıl jelektiñ elektrondı bazası dayındalmaq. Onda ağaştardı tügendew, pasporttaw jäne patologïyalıq zerttew mälimetteri ornalastırılmaq. Bul joba da qarjılandırwdı qajet etedi. Al osınday platforma qalağa qajet. Qalalıq Tekserw komïssïyası men respwblïkalıq Esep komïteti de ünemi tïisti basqarma nazarın osığan awdaradı.
– Ötken jılı Ekologïya, geologïya jäne tabïğï reswrstar mïnïstrligimen birlesip elordanı kögaldandırw jäne «jasıl awmaqtı» qurw josparın äzirledik. Jalpı bıltır 100 mıñnan astam ağaş pen 330 mıñ köşet otırğız­dıq. Qalanıñ qatal klïmatına qaramastan, ağaştardıñ jersinw körsetkişin 61 payızğa jetkizdik. Al «jasıl beldewde» bul körsetkiş, tipti 92 payızğa jetti. Osı jılı 300 mıñnan asa ağaş pen 3 mıñ buta, «jasıl beldewde» 4 mïllïonnan asa köşet otırğızwdı josparlap otırmız, – dedi Ä.Qojabaeva.
Jalpı osı waqıtqa deyin qalada mïllïonnan asa, al «jasıl beldewde» 15 mïllïonnan astam ağaş otırğızılğan. Biraq «jasıl beldewge» jawaptı «Astana-Ormanı» JŞS «Astana» älewmettik-käsipkerlik korporacïyası balansına berilgen eken. Qorşağan ortanı qorğaw jäne tabïğattı paydalanw basqarmasınıñ basşısı bul käsiporındı atalmış basqarmanıñ qaramağına berw kerek dep esepteydi. Munıñ sebebi, «jasıl beldewdegi» ağaştardıñ bir böligine osı basqarma jawaptı. Jumıstar jüyeli bolwı üşin «Astana-Ormanı» da bul basqarmağa qaraw kerek.

ATPEN SERWENDEW SOQPAĞI SALINADI

– Qalağa estetïkalıq kelbet berw, turğındarğa ekologïyalıq jaylı jağday qamtamasız etw, otbasımen bos waqıttı tïimdi ötkizw üşin sırılıp jatqan eski, apattı üylerdiñ orındarında saya­baqtar men gülbaqtar qurılısı jürgizilip jatır. Ötken jılı «Köktal-2» turğın alabında ülken sayabaq, qala awmağında köptegen gülbaq salındı. Jaña sayabaq üş aymaqqa bölindi. Onda eresekter men balalar demalatın, sportpen aynalısatın orındar bar. Endigi josparımızda rekreacïyalıq aymaqtar qurılısı qalıp otır. Twrïstik marşrwt – atpen serwendew soqpağı qurılısın ayaqtap qaldıq. Bïıl besedkalardı, at baylaytın bağandardı salğan soñ, nısandı senimdi basqarwğa beremiz. Bul halıqtı tartatın orınğa aynalatınına senimdimiz. Qazirdiñ özinde käsipkerler qızığwşılıq tanıtıp jatır. Olar sol aymaqta qımız satıp, kïiz üyler tikpek. Osı arqılı jaqsı twrïstik baza qurmaqpız, – dedi Ä.Qojabaeva.
Onıñ mälimdewinşe, qalada teatr alleyası, zoosafarï, jaña meşit mañayında 250 gektardı quraytın ülken sayabaq, örttiñ aldın alatın hïmïyalıq stansa salınıp jatır. Buğan qosa, Sarıarqa dañğılınan Baraev köşesine deyingi awmaqta Esil özeni jağalawın jañğırtw jürgiziledi.

QOQIS JÏNAW TEHNOLOGÏYASI AVTOMATTANDIRILADI

Bïıl şahardağı qoqıs öñdew zawıtın jañğırtw da josparlanıp otır. Munda qoqıstı jïnaw tehnologïyası avtomattandırılmaq. Qazir tïisti jumıs qolmen jasalıp jatır. Jañğırtwdan keyin zawıt qwatı eki esege artıp, qoqıstı jïnaw körsetkişi jılına 250 mıñ tonnadan 450 tonnağa deyin artpaq. Büginderi bul 277,5 mıñ tonnanı quraydı. Sonıñ 35,4 mıñ tonnası öñdeledi.
– Bas qalada qoqıstı basqarw jüyesi jïnaw, tasımaldaw, surıptaw, öñdew jäne qaldıqtardı kömwden turadı. Qala boyınşa 5 mıñğa jwıq konteyner alañı men 15 mıñ konteyner ornatılğan. Buğan qosa, plastïkke arnalğan 287 torlı konteyner men sınabı bar şamdardı salw üşin 545 konteyner qoyılğan. Qoqıstı bölek-bölek jïnaw jüyesi engizildi. 2013 jıldan beri sınaptı şamdardı joyu jobası sätti jüzege asırılıp jatır. El awmağında munday zawıt basqa eş jerde joq. Bul – memlekettik-jekemenşik äriptestik arqılı iske asırılğan joba. Oğan ïnvestor 300 mïllïon teñgege jwıq qarjı saldı, – dedi basqarma basşısı.
Bıltır qaldıqtardı surıptaw körsetkişi 18 payızdı, öndew 75 payızdı quradı. Qaldıqtar qoqıstı öñdew keşenine şığarılıp, brekettelip, ekinşi uyaşıqqa kömiledi. Sebebi birinşi uyaşıq tolıp ketken. Al ekinşini äli bes jıl paydalanwğa boladı.

QURILIS QALDIQTARINA ARNALĞAN POLÏGON

Elordada memlekettik-jekemenşik äriptestik ayasında qurılıs qaldıqtarına arnalğan «Soltüstik atızı» jobası da jüzege asırılıp jatır. Onıñ awmağı – 11 ga, qwatı – jılına 400 mıñ tonna. Paydalanw merzimi – 15 jıl. Qurılıstıñ jalpı soması – 2,5 mlrd teñge. Ötken jılı 857,7 mln teñge ïgerildi. Bïılğa 1 mlrd 732,6 mln teñge qalıp otır. Jospar boyınşa nısan osı jıldıñ ayağında paydalanwğa berilwi kerek.
Qalada jıl sayın Esil özenin tazalaw jumıstarı da jürgiziledi. Ötken jılı sw tübinen 250 mıñ şarşı metrge jwıq balşıq jïnaldı. Özen jağalawı men onıñ arnalarınan qattı turmıstıq qaldıqtar men basqa da qoqıs tazalandı. Qorıtındısında 139 tonna qoqıs boldı. 350 tekşe şarşı metr awmaqta qamıs pen aramşöp kesildi.
Munıñ sırtında Esil özeniniñ kemeler jüretin awmağında (9,4 şaqırım) sw tübin tazalaw jumıstarı jürgizilip, Vyaçeslav sw qoymasında – 14400 tekşe metr, Qoyandı sw qoymasında – 864 tekşe metr, Esil özeni men onıñ arnalarında 28800 tekşe metr sw sorıldı.

SW NISANDARI TÜGENDELİP, PASPORTTALDI

– Bıltır bas qalada alğaşqı ret sw nısandarın tügendew jäne pasporttaw jürgizildi. Bul jumıstar Vernadskïy atındağı wnïversïtettiñ kömegimen jüzege astı. Osılayşa qazir Nur-Sultan qalasında tört köl, tört özen, bir arna jäne eki sw qoyması bar. Barlıq jumıstar Esil basseyn ïnspekcïyasımen kelisildi, – dedi Ä.Qojabaeva.
Qalanıñ velosïped ïnfraqurılımın damıtw turğındardı salawattı ömir saltına tartwdı ğana emes, ekologïyanı jaqsartwdı da közdeydi. Sebebi awa lastanwınıñ bir «közi» – avtokölik gazdarı bolıp otır. Bayandamaşı bul bağıttağı jumıstarmen de tanıstırdı. Onıñ aytwınşa, osı waqıtqa deyin 34 şaqırım velojol salındı. Aldağı üş jılda tağı 123 şaqırım salw josparlanğan.
Qalalıq mäslïhat depwtatı Erlan Däkenovtiñ pikirinşe, «Astana EKSPO-2017» körmesi ötkennen keyin «jasıl tehnologïyalardı» nasïhattaw toqtağan sekildi. Ol osınıñ män-jayın bayandamaşıdan suradı.
– Prem'er-mïnïstrdiñ orınbasarı Roman Sklyar Almatı jäne Nur-Sultan qalalarınıñ ekologïyalıq jağdayın jaqsartwdıñ keşendi josparın bekitti. Oğan qorşağan ortanı jaqsartw boyınşa köptegen şaralar kirgizildi. Sonıñ işinde atmosferalıq awanı jaqsartw, kögaldandırw, qattı turmıstıq qaldıqtardı oñtaylandırw jumıstarı bar, – dedi Qorşağan ortanı qorğaw jäne tabïğattı paydalanw basqarmasınıñ bölim basşısı Juldız Sasanova.

Pikir jazw

Poçtañız jarïyalanbaydı

9 − six =