ҚОҒАМДЫҚ КӨЛІКТЕРДЕ ҚОЛЖЕТІМДІ ИНТЕРНЕТ

Бүгінде интернетке қолжетімділік күн санап артып келеді. Соның бір айғағы деп Астанада іске қосылған «Wi-Fi Bus» атты сынақ режиміндегі жаңа жоба аясында қалалық №1 автобус паркінде 12 автобус арнайы модеммен жабдықталуын айтуға болады. Жолаушыларды жол бойы ғаламтор әлемінде еш кедергісіз отыруына жағдай жасайтын автобустардың жай-күйімен газетіміздің тілшісі танысып қайтты.

Жобаның бастапқы кезеңінде интернет модемдерімен санаулы автобустар ғана қамтылған. Атап айтқанда, №10, 12, 28 және 42 автобустар. «Smart Astana» департаментінің бас менеджері Айбек Садықовтың айтуынша, жоба қала тұрғындары мен мем­лекеттік мекемелер тарапынан қолдау тапса, қаланың барлық автобустары интернетке қосылмақ.

«Wi-Fi Bus» жапсырма белгісі бар №28 бағыттағы автобусқа интернеттің қолжетімділігін бай­қау мақсатында арнайы отырған едік. Кіреберісіндегі «Wi-Fi-дың» қолдану нұсқаулығымен танысқан соң ұялы байланыс құралы арқылы қызмет сапасын тексеріп көрдік. «Wi-Fi Bus Free» желісімен ин­тернетке еркін қосылдық. Сигнал деңгейі – күшті, қосылу жыл­дамдығы – жоғары.

– Жолаушылардың көбі ав­тобустың «Wi-Fi-мен» жаб­дық­талғанынан бейхабар. Әсіресе, егде тартқан адамдар мүлдем түсінбейді. Интернет қызметін белсенді пайдаланушылар – жас­тар. Тіпті, кейбір жастар тегін интернеті бар автобусты аялдамада сарыла күтетіндіктерін жеткізеді, – дейді автобус кондукторы Қалмұрат Муминов.

Автобустың күнделікті жолаушысы Мақсат Патсабаев «Әлеуметтік желілерді көп пайда­ланатындықтан, қаламызда «Wi-Fi» нүктелерінің көбеюі мені қатты қуантты. Өзім күн сайын отыратын осы автобустың барлығы да интернетпен толық қамтылса екен деймін. Себебі, аз болғандықтан «Wi-Fi Bus-тар» арагідік кездесіп қалады» деп ризашылығымен қатар өз қалауын да білдіріп қалды.
«Wi-Fi Bus» жобасының ен­гізілуі қала тұрғындарының сапарын қызықты өткізуге мүм­кіндік береді. Бүгінде мұндай қолжетімді интернет Нұржол көшесі, «Думан», «Мега», «Хан­шатыр», «Керуен», «Са­рыарқа» СОО алдын­дағы алаңда, елордалық цирк ала­ңында, Тәуелсіздік сарайы, Бей­біт­шілік және Келісім сарайы мен Ғашықтар саябағында бар.

Орынбек ӨТЕМҰРАТ