قازاقستاندا ۆولونتەرلىك داستۇرلەردى قالاي دامىتۋعا بولادى؟

0 79

قازىر ۆولونتەرلىكتىڭ ءوسىپ كەلە جاتقان الەۋمەتتىك ماڭىزىن قازاقستان دا مويىندايدى. سوندىقتان 2020 جىلعى 16 قاڭتاردا ۇكىمەت ۆولونتەر جىلىن وتكىزۋ جونىندەگى ءىس-شارالار جوسپارىن بەكىتتى. وندا جالپى العاندا 7 باعىتتا 40 ءىس-شارانى ىسكە اسىرۋ كوزدەلگەن، دەپ جازدى Elorda.info.

ەندى سول 7 باعىتقا توقتالا كەتسەك، ولار: 1. ۆولونتەرلىك قىزمەت ءۇشىن قولايلى ورتانى دامىتۋ; 2. ۆولونتەرلىك قىزمەت بويىنشا ينفراقۇرىلىمدى دامىتۋ جانە وعان قاتىسۋشىلاردىڭ الەۋەتىن ارتتىرۋ; 3. ازاماتتاردىڭ ۆولونتەرلىك قىزمەتكە قاتىسۋىن كەڭەيتۋ; 4. كورپوراتيۆتىك ۆولونتەرلىك قىزمەتتى دامىتۋ; 5. ۆولونتەرلىك قىزمەت بويىنشا حالىقارالىق ىنتىماقتاستىقتى دامىتۋ; 6. ۆولونتەرلىكتى دارىپتەۋ; 7. تۇراقتى دامۋ ماقساتتارىنا قول جەتكىزۋ ءۇشىن ۆولونتەرلىكتى دامىتۋ.

بۇل رەتتە ەلىمىزدەگى ۆولونتەرلىك ۇيىمدار مەن جوبالار تۋرالى مالىمەتتەر Qazvolunteer.kz پلاتفورماسىندا شوعىرلانعان. وسى ورايدا وعان جۋرناليستەر تاراپىنان «قازاقستاندا ۆولونتەرلىك قىزمەت قانشالىقتى دامىعان؟ قوعامنىڭ كوزقاراسى قانداي؟» دەگەن سۇراق قويىلدى.

قازىر قازاقستاندا ەندى دامىپ كەلە جاتقان باعىت – الەۋمەتتىك ۆولونتەرلىك. ولاردىڭ قوعامعا تيگىزەر پايداسى زور. ەلىمىزدەگى ەڭ ۇلكەن الەۋمەتتىك ۆولونتەرلىك جوبا «جەڭىس» دەپ اتالادى. ونىڭ اياسىندا ۆولونتەرلەر قازاقستانداعى سوعىس جانە تىل ارداگەرلەرىنە قامقور بولىپ، ءۇي شارۋاسىنا كومەكتەسىپ، ءدارى-دارمەك، ازىق-تۇلىك جەتكىزىپ بەرەدى.

ال ەلىمىزدە كورپوراتيۆتىك ۆولونتەرلىكتىڭ دامۋى قاي دەڭگەيدە دەگەنگە كەلسەك، بىلتىر جىل سوڭىنا قاراي ۇلتتىق ۆولونتەرلىك جەلى باسشىلىعى بۇل سالانىڭ وڭ تاجىريبەلەرىن زەرتتەۋ بويىنشا قورىتىندى كونفەرەنتسياسىن وتكىزدى. سوندا بەلگىلى بولعانى، زەرتتەۋگە كورپوراتيۆتىك ۆولونتەرلىكتى دامىتۋعا قاتىسى بار 100-دەن استام ءتۇرلى كومپانيا مەن 400 كورپوراتيۆتىك ۆولونتەر، 70 ۇەۇ وكىلدەرى جانە كورپوراتيۆتىك ۆولونتەرلىككە جەتەكشىلىك ەتەتىن 30-دان استام باسشى قاتىسقان.

«بۇگىندە قازاقستاننىڭ كورپوراتيۆتىك ۆولونتەرلىكتى دامىتۋدا قانداي كەزەڭدە تۇرعانىن جانە كەلەسى دەڭگەيگە ءوتۋ ءۇشىن قانداي قادامدار قاجەت ەكەنىن تۇسىنۋگە كومەكتەسەتىن بايانداملار تىڭدالدى. زەرتتەۋدىڭ قورىتىندىلارى مەن ۇسىنىمدارى مۇددەلى تۇلعالارعا پايدالى بولادى دەپ ويلايمىن. ويتكەنى بىرلەسكەن كۇش-جىگەر كورپوراتيۆتىك ۆولونتەرلىكتى دامىتۋعا جانە قازاقستانداعى ۆولونتەرلىكتىڭ جاڭا دەڭگەيىنە قول جەتكىزۋگە ىقپال ەتەدى»، – دەدى اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت.

وعان قوسا ەلوردادا ۆولونتەرلىك ۇيىم وكىلدەرى، مەملەكەتتىك ورگاندار مەن ساراپشىلاردىڭ قاتىسۋىمەن «قازاقستاندا ۆولونتەرلەر قوزعالىسىن دامىتۋ كەلەشەگى» تاقىرىبىندا رەسپۋبليكالىق دوڭگەلەك ۇستەل ءوتتى. شارا بارىسىندا ۆولونتەرلىك قىزمەتتىڭ ءال-احۋالىن تالداۋ، ۆولونتەرلەر قوزعالىسىن دامىتۋ الەۋەتىن زەرتتەۋ، سونداي-اق ادىستەمەلىك ۇسىنىستاردى ازىرلەۋ ماسەلەلەرى تالقىلاندى. سول ساتتە ساياساتتانۋشى، ءماجىلىس دەپۋتاتى ەرلان سايروۆ قازاقستاندا ۆولونتەرلەردىڭ قۇقىقتىق الەۋەتىن ارتتىرۋ مەن مەملەكەت تاراپىنان قولداۋ قاجەتتىگىن ايتتى.

«بۇل ءوز كەزەگىندە ازاماتتىق بەلسەندىلىكتىڭ وسى تۇرىنە باستاماشىلىق ەتەتىن ادامداردىڭ قۇقىعى مەن مىندەتتەرىن قامتاماسىز ەتە وتىرىپ، قوعامدىق قوزعالىستان الەۋمەتتىك ينستيتۋتقا اۋىسۋعا مۇمكىندىك بەرەدى. وسىلايشا قازاقستانداعى ۆولونتەرلىك قىزمەت بەرىك نەگىزگە جانە ءالى دە اشىلۋى ءتيىس اۋقىمدى الەۋەتكە يە» – دەدى ول.

ودان كەيىن ەلىمىزدە ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسى ازىرلەندى. بۇل قۇجاتتا ۆولونتەرلەر قوزعالىسىن قۇقىقتىق، ادىستەمەلىك جانە اقپاراتتىق قولداۋ تەتىكتەرى قاراستىرىلعان.

وسىلايشا، جۇزەگە اسىرىلعان جوعارىداعى مىسالدار نەگىزىندە كەيىن دە ۆولونتەرلىك داستۇرلەردى قالاي دامىتۋعا بولاتىنىن بىرىزدەندىرىپ العان جايىمىز بار.

پىكىر جازۋ

پوچتاڭىز جاريالانبايدى

twenty − five =