Qazaqstan Respwblïkasınıñ Tuñğış Prezïdenti – Elbası N.Ä.Nazarbaevtıñ Qazaqstan halqına Ündewi

0 27

Qımbattı otandastar!
Qadirli dostar!
Özderiñiz biletindey, koronavïrws ïnfekcïyasınıñ qaterli pandemïyası älemniñ köptegen elderin, sonıñ işinde Qazaqstandı da şarpıdı. Mïllïondağan adam osı awır dertpen sırqattandı, ol meni de aynalıp ötken joq. Birqatar şet memleketter men ükimetter basşılarınıñ, körnekti sayasatkerler men qoğam qayratkerleriniñ şınayı janaşırlığın tanıtıp, mağan moral'dıq qoldaw körsetkeni köñilimdi tebirentti. Barşası qaltqısız nïettestigin jetkizip, sergektik tilep, tezirek sawığıp ketwime tilektestigin joldadı, sol üşin bärine zor rïzaşılığımdı bildiremin.
Olardıñ qatarında Resey Prezïdenti Vladïmïr Pwtïn, Qıtay Halıq Respwblïkasınıñ Törağası Sï Czïn'pïn, Qırğızstan Prezïdenti Sooronbay Jeenbekov, Özbekstan Prezïdenti Şavkat Mïrzïeev, Täjikstan Prezïdenti Emomalï Rahmon, Türikmenstan Prezïdenti Gwrbangwlı Berdımwhamedov, Türkïya Prezïdenti Redjep Tayïp Erdoğan, Amerïka Qurama Ştattarınıñ Memlekettik hatşısı Maykl Pompeo, Birikken Arab Ämirlikteriniñ Prezïdenti Halïfa Zaïd Äl Nahayan, Ündistannıñ Prem'er-mïnïstri Narendra Modï, Japonïya Prem'er-mïnïstri Sïndzo Abe, Ïordanïya Koroli İİ Abdalla ben äl-Hwseyn, Äzerbayjan Prezïdenti Ïl'ham Älïev, Armenïya Prezïdenti Armen Sarkïsyan, Wkraïna Prezïdenti Vladïmïr Zelenskïy, Koreya Respwblïkasınıñ Prezïdenti Mwn Çje Ïn, Päkistan Prezïdenti Arïf Alvï, Ïzraïl' Prezïdenti Rewven Rïvlïn, Serbïya Prezïdenti Aleksandr Vwçïç, Horvatïya Prezïdenti Zoran Mïlanovïç jäne t.b. bar. Bärin tügel atap şığw mümkin emes, biraq men olardıñ barlığınıñ joldağan hat-habarımen tanıstım. Qımbattı dostar, sizderdiñ şın köñilden şıqqan tilekteriñiz, ıstıq ıqılastarıñız mağan küş berip, ömirge qulşınıs-qwatımdı arttırdı. Barşañızğa basımdı ïip, zor densawlıq pen tabıs tileymin.
Men elimizdiñ köptegen öndiris ujımdarınan, eñbek ardagerlerinen, äskerï qızmetşilerden, stwdentter men oqwşılardan – öz qoldawı men tilektestikterin jetkizip, mağan mıqtı densawlıq tilep, tolıq sawığıp ketwime nïettestik bildirgen köp qazaqstandıqtardan hattar men jedelhattar, sonday-aq älewmettik jeli arqılı joldanğan hat-habarlar aldım.
Mağan şınayı janaşırlığı men qoldawın ğılımï qoğamdastıq pen şığarmaşılıq zïyalı qawımnıñ ökilderi de bildirgenin rïzaşılıqpen ayta ketkim keledi. Olardıñ arasında Serik Qïrabaev pen Älïya Beysenova, Bïbigül Tölegenova, Töregeldi Şarmanov, Mır­zatay Joldasbekov, Sultan Orazalïn, Ğarïfolla Esim, Nesipbek Aytulı, Jandarbek Mälibekov, Talğat Temenov jäne basqa da Qazaqstanğa keñinen tanımal qayratkerler boldı.
Meniñ atıma Ol'ga Rıpakova, Dmïtrïy Balandïn, Ïl'ya Ïl'ïn, Älïya YUswpova, Zarïna Dïas sïyaqtı belgili sportşılarımız izgi tilekterin bildirdi. Barşañızğa köp rahmet aytamın! Men bäriñizdi de bilemin. Sizder jäne basqa da jastar – täwelsizdik perzentterisizder. Densawlıq pen baqıt tileymin!
Därigerlerdiñ küş-jigeri jäne olardıñ talaptarın mültiksiz orındawdıñ, sonday-aq barşanıñ qoldawı men jılı sözderiniñ arqasında men sırqattan sawığıp şıqtım, qazir özimdi jaqsı sezinemin, tolıqqandı jumısqa kiriskeli otırmın. Halqımmen birge bul sırqattıñ bükil awırtpaşılığın sezindim, qazir emdelip jatqandardıñ bärine tözim men qajır-qayrat jäne tezirek sawığıp ketwlerin tileymin.
Biz ötkerip jatqan kürdeli kezeñ – bükil adamzattıñ basına tüsken sın-sınaq. Sır­qatpen kürestiñ eñ aldıñğı şebinde jürgen därigerler adamdardı aman alıp qalw üşin barlıq küşin jumsawda. Bul rette medïcïna qızmetkerleriniñ eñbegine bağa jetpeydi – munı qazirgi waqıt ayqın körsetip otır. Bolaşaqta da otandıq densawlıq saqtaw salasına basa köñil awdarıp, onı damıtwğa qajetti qarjılıq jäne materïaldıq reswrstar bölw kerek. Osı oraylı sätte elimizdiñ medïcïna qızmetkerlerine erekşe rïzaşılığımdı bildiremin.
Esteriñizde bolar, täwelsizdiktiñ bastapqı jıldarı meniñ şeşimimmen arnaw­lı Ulttıq qor qurılıp, altın-valyuta rezervi jasaldı. Bul bizge älemdik eki birdey dağdarıstı jeñip şığwğa septigin tïgizdi jäne sol qarajat qazir Ükimetke pandemïyağa qarsı awqımdı jumıs pen turmısı tömenderge qoldaw körsetw barısında kömegin tïgizwde. Eger aldağı waqıtta onı aqılmen, ünemdep paydalana bilsek, özge sın-qaterlerdi de tïimdi eñsere alamız. Qazaqstannıñ basqa elder aldında qarızı eñ tömen memlekettiñ biri ekeni de bizdiñ artıqşılığımız.
Elimizdiñ Prezïdenti men Ükimeti qalıptasqan jağdaydı tüzetw üşin qajetti barlıq şaranı qabıldawda. Alayda köp närse özimizge baylanıstı. Därigerler biz üşin qoldarınan kelgenniñ bärin jasap jatır. Alayda bul awrwdı juqtırwdan saqtanw köbinese är adamnıñ özine baylanıstı. Tözimdi bolw kerek, äsirese, jastarğa. Qajetti gïgïena talaptarın orındap, tezirek vakcïna payda bolarına ümittene otırıp, awrw juqtırwdan barınşa uzağıraq waqıt saw bolwğa tırısqan jön. Tärtip saqtap, öz densawlığımızdı, twğan-twıstar men jaqındardıñ amandığın oylawımız qajet, därigerlerge senw kerek.
Halqımız basqa tüsken qïındıqtı öziniñ qayrat-jigeri, uyımşıldığı, bolaşaqqa degen umtılısı arqılı bükil halıqaralıq qoğamdastıqpen birge la­yıqtı türde eñserip, aman-­esen şığarına senimdimin. Biz tağı da jeñimpaz bolamız. Elimizdiñ jaqsı künderi alda. Biz birgemiz! Biz jeñemiz! Bizdiñ uranımız osı.
Barlıq otandastarımızğa mıqtı densawlıq pen ïgilik, elimizge baq-bereke tileymin!

Pikir jazw

Poçtañız jarïyalanbaydı

four × 4 =