قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ قازاقستان حالقىنا ۇندەۋى

0 27

قىمباتتى وتانداستار!
قادىرلى دوستار!
وزدەرىڭىز بىلەتىندەي، كوروناۆيرۋس ينفەكتسياسىنىڭ قاتەرلى پاندەمياسى الەمنىڭ كوپتەگەن ەلدەرىن، سونىڭ ىشىندە قازاقستاندى دا شارپىدى. ميلليونداعان ادام وسى اۋىر دەرتپەن سىرقاتتاندى، ول مەنى دە اينالىپ وتكەن جوق. بىرقاتار شەت مەملەكەتتەر مەن ۇكىمەتتەر باسشىلارىنىڭ، كورنەكتى ساياساتكەرلەر مەن قوعام قايراتكەرلەرىنىڭ شىنايى جاناشىرلىعىن تانىتىپ، ماعان مورالدىق قولداۋ كورسەتكەنى كوڭىلىمدى تەبىرەنتتى. بارشاسى قالتقىسىز نيەتتەستىگىن جەتكىزىپ، سەرگەكتىك تىلەپ، تەزىرەك ساۋىعىپ كەتۋىمە تىلەكتەستىگىن جولدادى، سول ءۇشىن بارىنە زور ريزاشىلىعىمدى بىلدىرەمىن.
ولاردىڭ قاتارىندا رەسەي پرەزيدەنتى ۆلاديمير پۋتين، قىتاي حالىق رەسپۋبليكاسىنىڭ توراعاسى سي تسزينپين، قىرعىزستان پرەزيدەنتى سوورونباي جەەنبەكوۆ، وزبەكستان پرەزيدەنتى شاۆكات ميرزيوەۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى گۋربانگۋلى بەردىمۋحامەدوۆ، تۇركيا پرەزيدەنتى رەدجەپ تايپ ەردوعان، امەريكا قۇراما شتاتتارىنىڭ مەملەكەتتىك حاتشىسى مايكل پومپەو، بىرىككەن اراب امىرلىكتەرىنىڭ پرەزيدەنتى حاليفا زايد ءال ناحايان، ءۇندىستاننىڭ پرەمەر-ءمينيسترى نارەندرا مودي، جاپونيا پرەمەر-ءمينيسترى سيندزو ابە، يوردانيا كورولى ءىى ابداللا بەن ءال-حۋسەين، ازەربايجان پرەزيدەنتى يلحام اليەۆ، ارمەنيا پرەزيدەنتى ارمەن ساركيسيان، ۋكراينا پرەزيدەنتى ۆلاديمير زەلەنسكي، كورەيا رەسپۋبليكاسىنىڭ پرەزيدەنتى مۋن چجە ين، پاكىستان پرەزيدەنتى اريف الۆي، يزرايل پرەزيدەنتى رەۋۆەن ريۆلين، سەربيا پرەزيدەنتى الەكساندر ۆۋچيچ، حورۆاتيا پرەزيدەنتى زوران ميلانوۆيچ جانە ت.ب. بار. ءبارىن تۇگەل اتاپ شىعۋ مۇمكىن ەمەس، بىراق مەن ولاردىڭ بارلىعىنىڭ جولداعان حات-حابارىمەن تانىستىم. قىمباتتى دوستار، سىزدەردىڭ شىن كوڭىلدەن شىققان تىلەكتەرىڭىز، ىستىق ىقىلاستارىڭىز ماعان كۇش بەرىپ، ومىرگە قۇلشىنىس-قۋاتىمدى ارتتىردى. بارشاڭىزعا باسىمدى ءيىپ، زور دەنساۋلىق پەن تابىس تىلەيمىن.
مەن ەلىمىزدىڭ كوپتەگەن ءوندىرىس ۇجىمدارىنان، ەڭبەك ارداگەرلەرىنەن، اسكەري قىزمەتشىلەردەن، ستۋدەنتتەر مەن وقۋشىلاردان – ءوز قولداۋى مەن تىلەكتەستىكتەرىن جەتكىزىپ، ماعان مىقتى دەنساۋلىق تىلەپ، تولىق ساۋىعىپ كەتۋىمە نيەتتەستىك بىلدىرگەن كوپ قازاقستاندىقتاردان حاتتار مەن جەدەلحاتتار، سونداي-اق الەۋمەتتىك جەلى ارقىلى جولدانعان حات-حابارلار الدىم.
ماعان شىنايى جاناشىرلىعى مەن قولداۋىن عىلىمي قوعامداستىق پەن شىعارماشىلىق زيالى قاۋىمنىڭ وكىلدەرى دە بىلدىرگەنىن ريزاشىلىقپەن ايتا كەتكىم كەلەدى. ولاردىڭ اراسىندا سەرىك قيراباەۆ پەن ءاليا بەيسەنوۆا، بيبىگۇل تولەگەنوۆا، تورەگەلدى شارمانوۆ، مىر­زاتاي جولداسبەكوۆ، سۇلتان ورازالين، عاريفوللا ەسىم، نەسىپبەك ايتۇلى، جانداربەك مالىبەكوۆ، تالعات تەمەنوۆ جانە باسقا دا قازاقستانعا كەڭىنەن تانىمال قايراتكەرلەر بولدى.
مەنىڭ اتىما ولگا رىپاكوۆا، دميتري بالاندين، يليا يلين، ءاليا يۋسۋپوۆا، زارينا دياس سياقتى بەلگىلى سپورتشىلارىمىز ىزگى تىلەكتەرىن ءبىلدىردى. بارشاڭىزعا كوپ راحمەت ايتامىن! مەن ءبارىڭىزدى دە بىلەمىن. سىزدەر جانە باسقا دا جاستار – تاۋەلسىزدىك پەرزەنتتەرىسىزدەر. دەنساۋلىق پەن باقىت تىلەيمىن!
دارىگەرلەردىڭ كۇش-جىگەرى جانە ولاردىڭ تالاپتارىن مۇلتىكسىز ورىنداۋدىڭ، سونداي-اق بارشانىڭ قولداۋى مەن جىلى سوزدەرىنىڭ ارقاسىندا مەن سىرقاتتان ساۋىعىپ شىقتىم، قازىر ءوزىمدى جاقسى سەزىنەمىن، تولىققاندى جۇمىسقا كىرىسكەلى وتىرمىن. حالقىممەن بىرگە بۇل سىرقاتتىڭ بۇكىل اۋىرتپاشىلىعىن سەزىندىم، قازىر ەمدەلىپ جاتقانداردىڭ بارىنە ءتوزىم مەن قاجىر-قايرات جانە تەزىرەك ساۋىعىپ كەتۋلەرىن تىلەيمىن.
ءبىز وتكەرىپ جاتقان كۇردەلى كەزەڭ – بۇكىل ادامزاتتىڭ باسىنا تۇسكەن سىن-سىناق. سىر­قاتپەن كۇرەستىڭ ەڭ الدىڭعى شەبىندە جۇرگەن دارىگەرلەر ادامداردى امان الىپ قالۋ ءۇشىن بارلىق كۇشىن جۇمساۋدا. بۇل رەتتە مەديتسينا قىزمەتكەرلەرىنىڭ ەڭبەگىنە باعا جەتپەيدى – مۇنى قازىرگى ۋاقىت ايقىن كورسەتىپ وتىر. بولاشاقتا دا وتاندىق دەنساۋلىق ساقتاۋ سالاسىنا باسا كوڭىل اۋدارىپ، ونى دامىتۋعا قاجەتتى قارجىلىق جانە ماتەريالدىق رەسۋرستار ءبولۋ كەرەك. وسى ورايلى ساتتە ەلىمىزدىڭ مەديتسينا قىزمەتكەرلەرىنە ەرەكشە ريزاشىلىعىمدى بىلدىرەمىن.
ەستەرىڭىزدە بولار، تاۋەلسىزدىكتىڭ باستاپقى جىلدارى مەنىڭ شەشىمىممەن ارناۋ­لى ۇلتتىق قور قۇرىلىپ، التىن-ۆاليۋتا رەزەرۆى جاسالدى. بۇل بىزگە الەمدىك ەكى بىردەي داعدارىستى جەڭىپ شىعۋعا سەپتىگىن تيگىزدى جانە سول قاراجات قازىر ۇكىمەتكە پاندەمياعا قارسى اۋقىمدى جۇمىس پەن تۇرمىسى تومەندەرگە قولداۋ كورسەتۋ بارىسىندا كومەگىن تيگىزۋدە. ەگەر الداعى ۋاقىتتا ونى اقىلمەن، ۇنەمدەپ پايدالانا بىلسەك، وزگە سىن-قاتەرلەردى دە ءتيىمدى ەڭسەرە الامىز. قازاقستاننىڭ باسقا ەلدەر الدىندا قارىزى ەڭ تومەن مەملەكەتتىڭ ءبىرى ەكەنى دە ءبىزدىڭ ارتىقشىلىعىمىز.
ەلىمىزدىڭ پرەزيدەنتى مەن ۇكىمەتى قالىپتاسقان جاعدايدى تۇزەتۋ ءۇشىن قاجەتتى بارلىق شارانى قابىلداۋدا. الايدا كوپ نارسە وزىمىزگە بايلانىستى. دارىگەرلەر ءبىز ءۇشىن قولدارىنان كەلگەننىڭ ءبارىن جاساپ جاتىر. الايدا بۇل اۋرۋدى جۇقتىرۋدان ساقتانۋ كوبىنەسە ءار ادامنىڭ وزىنە بايلانىستى. ءتوزىمدى بولۋ كەرەك، اسىرەسە، جاستارعا. قاجەتتى گيگيەنا تالاپتارىن ورىنداپ، تەزىرەك ۆاكتسينا پايدا بولارىنا ۇمىتتەنە وتىرىپ، اۋرۋ جۇقتىرۋدان بارىنشا ۇزاعىراق ۋاقىت ساۋ بولۋعا تىرىسقان ءجون. ءتارتىپ ساقتاپ، ءوز دەنساۋلىعىمىزدى، تۋعان-تۋىستار مەن جاقىنداردىڭ اماندىعىن ويلاۋىمىز قاجەت، دارىگەرلەرگە سەنۋ كەرەك.
حالقىمىز باسقا تۇسكەن قيىندىقتى ءوزىنىڭ قايرات-جىگەرى، ۇيىمشىلدىعى، بولاشاققا دەگەن ۇمتىلىسى ارقىلى بۇكىل حالىقارالىق قوعامداستىقپەن بىرگە لا­يىقتى تۇردە ەڭسەرىپ، امان-­ەسەن شىعارىنا سەنىمدىمىن. ءبىز تاعى دا جەڭىمپاز بولامىز. ەلىمىزدىڭ جاقسى كۇندەرى الدا. ءبىز بىرگەمىز! ءبىز جەڭەمىز! ءبىزدىڭ ۇرانىمىز وسى.
بارلىق وتانداستارىمىزعا مىقتى دەنساۋلىق پەن يگىلىك، ەلىمىزگە باق-بەرەكە تىلەيمىن!

پىكىر جازۋ

پوچتاڭىز جاريالانبايدى

2 × 2 =