Қазақстан қарыштап барады

Кеше Астанада Орталық коммуникациялар алаңында отандық және шетелдік сарапшылардың қатысуымен «Даму – 2050: әлемнің жаңа саяси-экономикалық картасы» баяндамасының халықаралық таныстырылымы өтті.

Аталмыш баяндаманы дайындаған – 2009 жылы Мәскеуде құрылған «Пост-кризисный мир» институты. Тәуел­сіз сараптамалық орталық зерттеу жұмыс­тарын ағымдағы жылдың ақпан-мамыр айларында жүргізген. Оған 63 елдің 303 сарапшысы тартылған. Сауалдамаға қа­тыс­қандар қатарында ТМД елдері, Ба­тыс және Шығыс Еуропа, Азия елдері, Таяу Шығыс, Аф­рика, Латын Америкасы, АҚШ, Канада, Австралияның эконо­мис­тері мен қаржылық сарапшылары, жетекші компаниялардың иелері мен топ-менеджерлері, журналистер, ғалымдар, саясаткерлер мен шенеуніктер бар.

Дөңгелек үстел мәжілісінде сөз алған «Посткризисный мир» халықаралық зерттеу қорының жетекшісі Екатерина Шипованың айтуынша, Азия 2050
жылға дейін әлемдегі ең жедел дамитын өңірге айналады.

– Біріншіден, Азия – экономикасы шоғырланған, қарқынды дамушы аймақ. Екінші жағынан алып қарағанда, кезінде Жапония бастан кешкен қауіп те бар. Азия геосаяси қақтығыстардың аймағы болғандықтан, жанжалдар азаймайтыны байқалады. Соңғы оқиғаларға қарағанда, тіпті, арта түсуі ықтимал. Алайда мұндай қатерлерге қарамастан, Азия әлемдегі жедел дамитын өңір болып қалады, – дейді ол.

Алдағы уақытта жаңадан «Азия жолбарыстары» атауы пайда болмақ. Қандай мемлекеттер басты рөл ойнайды деген сауалға келсек, зерттеушілер «Жаңа жол­барыстар» тізіміне Түркия, Индонезия, Вьетнам, Иран және Қазақстанды қосады. Халықаралық зерттеушілер Түркияны топ бастап тұрғанын көрсе­туде. Индонезия мен Вьетнамда соңғы жылдары экономикалық өсімнің арқа­сында алғашқы үштікке енген. Техно­ло­гиялық жетістіктерімен Иран мем­лекеті де тізімнен ойып тұрып орын алған. Ал, біздің ел барлық Орта Азия елдері ішінде «жаңа жолбарыстар» тізіміне енген жалғыз посткеңестік мем­лекет екен. Өнеркәсіптің қарқынды дамуы, индус­трияландыру жоспары сынды бір­қатар артықшылықтарымызды әлемдік қауымдастық жоғары бағалаған.

«Адамзатты қандай мәселелер алаң­датуы мүмкін?». Бұл мәселені шетелдік сараптамалық топ түбегейлі зерттеген. Алдағы отыз-қырық жылдықта әлемде табиғи ресурстардың тапшылығы едәуір байқалады. Экологиялық және климаттық мәселелердің де тигізер зардабы жоқ емес. Аталмыш мәселелер Президент Н.Назарбаевтың Қазақстан халқына арнаған Жолдауында қамтылғаны белгілі. «Посткризисный мир» қорының директоры, ғалым Александр Маслов Қа­зақ­станды 2050 жылға дейінгі Даму стратегиясын жасаған посткеңес кеңіст­ігіндегі жалғыз мемлекет екенін ерекше атап өтті.

Гүлмира АЙМАҒАНБЕТ