Қазақша сөйлеп жүрсіз бе?

0 38

Тіл мәселесі қашанда өзектілігін жоймайды. Көптеген жастарымыз қазақ тіліне шорқақ болып жатқаны бәріне мәлім. Осы мақсатта «Шайсұлтан Шаяхметов атындағы «Тіл-Қазына» ұлттық ғылыми-практикалық орталығы «Мен қазақша сөйлеймін» атты акцияны қолға алып жатыр. Оның ерекшелігі – еліміздегі өзге этнос өкілдерінің арасында қазақ тілін дәріптеу.

Орталық директорының орынбасары Айдос Тұрсынбайұлының айтуынша жобаның басты мақсаты – еліміздегі басқа ұлт өкілдерінің арасында қазақ тілін кеңінен дәріптеу. Орталық бұл іс-шараны жыл сайын ұйымдастырады. Мұндағы қатысушылар – тек оқыту тілі қазақ тілі емес орта мектептер, техникалық колледждер мен ЖОО-ның студенттері және әртүрлі саладағы тұлғалар. Байқаудың шартына жыл сайын өзгерістер енгізіледі. Мысалы, өткен жылдары қатысушылар батырлар жырын жатқа айтып жарысқан болатын. Биыл тәуелсіздігіміздің 30 жылдығына орай бұл жолғы жоба тәуелсіздікке арналмақ. Отан, туған жер, мемлекеттік тіл тақырыптары қамтылады. Аталған жоба үш кезеңнен тұрады. Бірінші кезең – 5-8 сынып оқушылары, екінші кезең – 9-10 сынып оқушылары, үшінші кезең колледж және ЖОО-ның студенттері мен ересек азаматтардан тұрады. Әрі қарай төртінші кезеңге құқық қорғау органдарының, Ішкі істер органдары қызметкерлері қатысады. Әр кезеңнің жұмыстары белгіленген мерзім бойынша қабылданады. Мысалы, бірінші кезең – 5 мамыр-10 маусым, екінші кезең – 10 маусым-1 шілде, үшінші кезең – 5 шілде-5 тамыз, төртінші кезең – 6 тамыз-6 қыркүйек. Бірінші кезең бойынша қазір қызу жұмыстар жүріп жатыр. 24-25 мамыр аралығында осы кезең байқауды ресми түрде бастаған болатын. Қатысушылар өздерінің ұялы телефондары арқылы әлеуметтік желіге қазақ әдебиетіндегі белгілі тұлғаларымыздың шығармашылығынан екі минуттан аспайтын видео салады. Қатысушы Instagram желісіне #менқазақшасөйлеймін2021 хештэгін белгілеп, жүктеуі керек. Салып қана қоймай, оны кеңінен насихаттап, қазіргі тілмен айтқанда, көп «лайк» жиналуы ескеріледі. Төрт кезеңге әр өңірден 5-8 адамнан кем емес қатысушылар бақ сынайды.
Орталық өткен жылдары да осы «Мен қазақша сөйлеймін» атты акцияны өткізген. Бірақ ол кезде жас ерекшелігіне шектеу қойылмаған еді. Барлық этнос өкілі батырлар жырынан үзінді оқып қатысты. Өңірлерден жалпы саны 20 этнос өкілінен құралған 243 үміткер бақ сынаған. Қатысушылардың жас ерекшелігіне көз жүгіртсек, ең жасы – Нұр-Сұлтан қаласы «Бәйтерек» балабақшасының тәрбиеленушісі 5 жасар Мария болса, үлкені – Шымкент қаласының тұрғыны, зейнеткер Насима Фаткульбаянова екен.
«Мен қазақша сөйлеймін» секілді жобалардың осындай жоғары деңгейде өтіп жатқаны – үлкен құптарлық іс. Алдағы уақытта да жалғасын тауып, дами берсін деген тілектеміз!

Жәнел ҚҰТТЫБАЙ,
Л.Гумилев атындағы Еуразия
ұлттық университетінің студенті

Пікір жазу

Почтаңыз жарияланбайды

4 × 4 =