قازاق بوكسىنىڭ جارقىن جەڭىسى

0 30

سەربيا استاناسى بەلگرادتاعى بىلعارى قولعاپ شەبەرلەرىنىڭ جەڭىسى قازاق بوكسى جانكۇيەرلەرىن ءبىر جەلپىنتىپ تاستادى. جالپىكوماندالىق ەسەپتە 2 التىن، 2 كۇمىس جانە 1 قولامەن 2-ورىنعا تابان تىرەگەن بوكستان ۇلتتىق قۇرامانىڭ بۇل جەڭىسى شىنىندا توكيو وليمپياداسىنداعى ساتسىزدىكتىڭ ورنىن تولتىرعانداي.

1635882568

مەملەكەت باسشىسى قاسىم-جومارت توقاەۆ بەلگرادتاعى بوكستان الەم چەمپيوناتىندا جۇلدە العان قازاقستاندىق بوكسشىلاردى قۇتتىقتادى.

«بوكستان الەم چەمپيوناتىندا التىن العان تەمىرتاس ءجۇسىپوۆ پەن ساكەن بيبوسىنوۆتى، كۇمىس ولجالاعان ماحمۇد سابىرحان مەن سەرىك تەمىرجانوۆتى جانە ۇلتتىق قۇراما كاپيتانى، قولا جۇلدەگەر ابىلايحان ءجۇسىپوۆتى شىن جۇرەكتەن قۇتتىقتايمىن! ەلدىڭ اتىن شىعارعان ەرلەرىمىزگە تابىس تىلەيمىن!» دەپ جازدى پرەزيدەنت تۆيتتەردەىگ پاراقشاسىندا.

2 جىلدا دۇنيە ءجۇزىنىڭ ەڭ ۇزدىك بوكسشىسىن انىقتايتىن ءدۇبىرلى دوداعا قازاقستاننىڭ بوكستان ۇلتتىق قۇراماسى تولىق قۇراممەن قاتىستى. ونىڭ ىشىندە 4 بوكسشى اقتىق سىنعا شىقتى.

العاش بولىپ اقتىق سىندا 48 كەلىگە دەيىنگى سالماق دارەجەسىندە ەل نامىسىن قورعاعان تەمىرتاس ءجۇسىپوۆ قۇراما قورجىنىنا العاشقى التىن مەدالدى سالدى. ول شارشى الاڭدا تاي بوكسشىسى ۆۋتتيچاي يۋراچايدان باسىم ءتۇستى. سول سەكىلدى الەم چەم­پيونى اتانۋ ءۇشىن امەريكالىق بوكسشىمەن قولعاپ تۇيىستىرگەن ساكەن بيبوسىنوۆ تا جەڭىستىڭ بيىك تۇعىرىنان كورىندى. ءا دەگەننەن جەرەبە ءوز سالماعىندا ەڭ ۇزدىك بوكسشى سانالاتىن وزبەك حاسانبوي دۋسماتوۆپەن جۇپ ەتكەندە، قازاق جانكۇيەرلەرى ىشتەن تىنعان. بىراق مىڭ ايلالى قارسىلاسىنا قارسى جەكپە-جەكتە ءار قادامىن اڭداپ باسقان س.بيبوسىنوۆ جەڭىسكە جەتتى. العاشقى ءارى اقتىق سىنعا بەرگىسىز جەكپە-جەكتەن كەيىن-اق جانكۇيەرلەر ساكەننىڭ ءدال وسى چەمپيوناتتا جۇلدەسىز قالمايتىنىنا سەنىمدى بولعان. ونىڭ شىن مانىندە مىقتى بوكسشى ەكەنىن اقتىق سىندا وزىنە قارسىلاس اتانعان امەريكالىق روسكو ءحيللدىڭ ءوزى كۇللى الەم الدىندا مويىندادى.

اقتىق سىندا 54 جانە 57 كەلى سالماق دارەجەلەرىندە ەل نامىسىن قورعاعان ماحمۇد سابىرحان مەن سەرىك تەمىرجانوۆ كۇمىستى قاناعات تۇتتى. ال جارتىلاي فينالدا جاپون بوكسشىسى سەۆونرەتس وكادزاۆاعا جول بەرگەن ابىلايحان ءجۇسىپوۆ الەم چەمپيوناتىنىڭ قولا جۇلدەگەرى اتاندى. ابىلايحان ءجۇسىپوۆ 2019 جىلى ەكاتەرينبۋرگتە وتكەن الەم چەمپيوناتىندا دا قولا جۇلدەگە يە بولعان ەدى. سول جولى، كەيىننەن توكيو وليمپياداسىندا قولانى قاناعات ەتكەن ساكەن بيبوسىنوۆ بەلگرادتا جەڭىستىڭ ەڭ بيىك تۇعىرىنا كوتەرىلدى.

كەشە ەلوردا اۋەجايىندا بوكس جانكۇيەرلەرى الەم چەمپيوناتىنىڭ جۇلدەگەرلەرىن قۇرمەت-قوشەمەتپەن كۇتىپ الدى.

پىكىر جازۋ

پوچتاڭىز جاريالانبايدى

three × 2 =