Qawipti derttiñ qateri

0 141

Mamır ayınıñ üşinşi jeksenbisi halıqaralıq JÏTS qurbandarın eske alw küni retinde belgilengen bolatın. Osığan baylanıstı Astana qalalıq JÏTS-tıñ aldın alw jäne oğan qarsı küres ortalığında basqosw ötti.

kbb_5416

Büginde älem elderin ğasır derti sanalatın JÏTS derti alañdatıp otır. Sonday-aq soñğı kezde elimizde atalğan awrw türimen awıratın azamattardıñ qatarı artıp bara jatır. Mäselen, soñğı 20 jılda Astanada AÏTV ïnfekcïyasın juqtırğan 1293 adam anıqtalğan. Al däl qazirgi tañda JÏTS ortalığında 321 adam em-dom alıp jatır. Atalğan ortalıqtıñ bas därigeri Säbït Abraïmovtıñ aytwınşa, onıñ 60 payızı soñğı bes jılda qawipti dertke dwşar bolğan.
– Jalpı sensacïya qwıp atalğan dertti asa qawipti etip körsete berwdiñ qajeti şamalı sïyaqtı. Eger nawqas der kezinde ortalıqqa tirkelip, bizden em alatın bolsa onıñ uzaq ömir sürwine mümkindik bar. Öytkeni medïcïna AÏTV ïnfekcïyasın juqtırğan azamattı emdewde joğarı tabıstarğa qol jetkizip otır. Mısalı, büginde ortalıqta em alatın 8 ana densawlığı mıqtı balanı ömirge äkeldi. Tipti, keybir analar ekinşi balasın aman-esen bosanwda. Osınday täjirïbeden keyin bizge kelip, qorıqpay emdelwşiler payda bola bastadı – deydi ol.
Mamandar JÏTS, negizinen, jınıstıq qarım-qatınas arqılı juğatının aytadı. Endeşe, qawipti dertti saw adamğa qasaqana juqtırğan adamdarğa qanday şara qaras­tırılğan? Säbït Bekmağanbetulınıñ aytwınşa, Astanada atalğan dertti qasaqana juqtırğan 5 fakti tirkelgen.

kbb_5427
– Bizdiñ ortalıqtıñ mamandarı atalğan dertti juqtır­ğan adammen jan jaqtı söylesip, tüsindirw jumıstarın jürgizedi. Osıdan keyin nawqas ortalıqpen «Men özimniñ awrwımdı eşkimge juqtırmay, barınşa saqtanamın» dep kelisim-şartqa qol qoyadı. Eger nawqas aradağı kelisim-şarttı buzatın bolsa, oğan zañ boyınşa jaza tağayındalğan. Öytkeni biz JÏTS ïnfekcïyasın juqtırğan adam anıqtalsa, onıñ kimdermen baylanıs jasağanın tekseremiz. Eger nawqas juqtırğan adam burın bizdiñ ortalıqta tirkewde turğan bolsa, onı quqıq qorğaw organdarına tapsıramız. Munday oqïğa bizdiñ ortalıqta boldı, biraq ol is sotqa deyin barğan joq. Öytkeni dertti juqtırıp alğan adam qupïyanıñ jarïya bolğanın qalamay ımırağa kelip jatadı, – deydi bas däriger.
Al epïdemïolog kömekşisi Säwle Nurğalïeva erlerge qarağanda äyelderdiñ AÏTV ïnfekcïyasın tez juqtıratının aytadı. Osı tusta atalğan derttiñ jınıstıq jolmen juğw qawpi erkekterden qarağanda äyelderde nege joğarı degen zañdı suraq twındaydı.
– Jınıstıq qatınas kezinde äyelderdiñ erkekterden juqtırw qawpi üş ese joğarı bolıp keledi. Sonday-aq, bul juqpanı tasımaldawşılar qatarında seks-bïznespen aynalısatın jäne işimdik pen esirtki qabıldaytın äyelderdi jatqızwğa boladı. Bul toptağı äyelder jınıstıq seriktesterin jïi awıstırıp, özin-özi qorğamaydı. Atap öter bolsaq, ortalığımızdağı «Dos­tıq» kabïnetinde qaralatın seks qızmetkerleriniñ 80 payızına jwığı jınıstıq jolmen beriletin dertke şaldıqqan. Sondıqtan da jınıstıq qarım-qatınas arqılı beriletin ärtürli juqpalardan aldın ala saqtanğan jön – deydi ol.
Ïä, büginde kez kelgen adamnıñ JÏTS ïnfekcïyasın juqtırıp alwı mümkin bolıp otır. Tüyindep aytqanda, näpsiñdi tıymasañ, qawipti dertti juqtırıp alasıñ.

Serik QUDAYBERGENULI

Pikir jazw

Poçtañız jarïyalanbaydı

twenty − 4 =