ҚАРУ ТАПСЫРҒАНДАР ҚАРАЖАТҚА КЕНЕЛЕДІ

0 184

e09ec989996b4851c39283f4480

Астана қаласында заңсыз сақталған қару-жарақты сатып алудың кезекті акциясы өткізіледі. Біздің осы шара жайлы сауалымызға ІІД Әкімшілік полиция басқармасының лицензиялау және қару айналымына бақылау жасау бөлімшесінің аға инспекторы, полиция майоры Бағлан Қазбеков жауап берді.

Қару-жарақтарды тапсыру акциясының мақсатын айтып өтсеңіз.

– Қоғамдық қауіпсіздікті қамтамасыз ету мақсатында 21 сәуір күні қала тұрғындарынан заңсыз сақталған атыс қаруларын, қару-жарақтарды, жарылғыш заттарды сатып алу бой­ынша акция өтеді. Бұл шара қару-жарақтарды пайдаланумен байланыс­ты қылмыстардың алдын алу мақ­са­тында ұйымдастырылып отыр.

– Акцияға қатысқан, яғни, қару-жарақ тапсырған тұрғындар жауап­кершілікке тартылмай ма?

– Керісінше, оларға өтемақы төле­неді. Тіркелмеген атыс қаруын, оқ-дәрілерді және жарылғыш заттарды ерікті тапсырған адамдар қылмыстық және әкімшілік жауапкершіліктен босатылады. Сол себепті, полиция қызметкерлері заңсыз сақталған қару­лар болса, олардың иелері өз ерік­терімен тапсыруларын немесе заңды түрде тіркетуін сұрайды. Ал, тапсырылған қару-жарақтар түрлі деңгейдегі тексерулерден өткен соң жойылатын болады.

– Төленетін өтемақының мөлшері қандай болмақ?

– Сыйақы мөлшерін белгілеу кезінде алдымен қару-жарақтың  техникалық жай-күйі және оның атуға жарамдылығы ескерілетін болады.

Егер тапсырылған қару атуға жарамды болған жағдайда ұсыны­латын құнынан 100 пайыз төлем жүргізілетін болады. Ең бастысы, заңсыз қару-жарақты өз еркімен тапсырған адамдар алдымен өзде­рі­нің, сонымен қатар, қоғамның қауіп­сіздігіне пайдалы іс жасайды деп ойлаймын.

Еркежан СӘТІМБЕК

 

Пікір жазу

Почтаңыз жарияланбайды

three × 4 =