ҚАРҒЫН СУДЫҢ ҚАУПІ СЕЙІЛДІ

Күн жылына бастағанда еріген қар мен жауын суы жұртты әжептәуір әбігерге салады. Жылда қайталанатын қалыпты жағдайға елорда сақадай сай. Оны біз дер кезінде орындалып жатқан су тасқынына қарсы шаралардан байқаймыз. Қаланың қай аймағы болсын, барлығы қатаң бақылауда.

Қала әкімдігі сайтының «Халықтық бақылау» бөліміне қарғын суға қатысты келіп түскен шағымдар уақытында қаралып, мәселе реттеліп отыр. Төтенше жағдай туған кезде, тез арада байланысқа шығатын тұрғындардың белсенділігі мәселені ушық­тырмай, қадағалауға көп сеп­тігін тигізеді. Қызыл су басты деген хабар түссе, қалалық қызметтер дереу жетуге даяр. Сайтқа түскен өтініштер бойынша әрекет жасалып, орындалған жұмыстардың нәтижесі фото түрінде де жолдануда. Мұның бәрі ша­руақорларға деген сенімді арттыра түседі.
Қызыл суға қатысты шағым­дардың басым бөлігі Сарыарқа және Алматы аудандарының тұрғындарынан келіп түседі. Мысалы, Константин Селезнев есімді азамат Ш.Бейсекова көшесіндегі 7/3-үйдің ауласын су басып кеткендігін айтып, хат жазған. Нәтижесінде аудан әкімдігінің нұсқауымен «Астана Тазалық» ЖШС көпке созбай, аталған мекен­жайдағы қызыл суды сору жұмыстарын жүргізді. Бұл мердігерлік ұйым осы аудан­дағы ғана емес, қаладағы қар­ғын суға қарсы шараларға белсенді атсалысуда.
Астаналықтар сын-ескерт­пелерін тек әкімдіктің сайтына ғана емес, күні-түні жұмыс істейтін, ши шыққан жерден шалынған қоңырауларға құлақ асатын Интеллектуалды Байланыс орталығына да жолдайды. Осы сәуір айының басынан бері «109» нөміріне қызыл суға қатысты мәселемен 1026 тұрғын хабарласқан.
– Көшелер мен аулалардағы су тасқыны бойынша бізге келіп түскен 1026 мәселенің бүгінде 1016-сы реттелді. Қалған 10 шағым бойынша аталған аймақтарда тас аралас құм себілу керек. Бұл шара аудан әкімдіктері жағдайды бақыла­ғаннан кейін жүзеге асады, – дейді Аталмыш орталықтың ақпараттық-талдау бөлімінің басшысы Қайыржан Қуанышбаев.
Астана қаласы Төтенше жағ­дайлар департаменті су басуы мүмкін аймақтарды жіті бақылап отыр. Тасқынға жол бермеу шаралары ұйымдастырылып, құрамында 309 адам, 49 техника бірлігі, 12 жүзу құралы және 1 тікұшақ бар арнаулы топ құрылған.
Су тасқыны кезеңі басталы­сымен, қала тұрғындарынан 1000-нан аса өтінім түсіп, барлығы мерзімінде орындалды. Осы уақытқа дейін 129 мың 630 текше метр су сорылып, 3 млн 255 мың 904 текше метр қар шығарылды. Бүгінде қала­дағы халық көп шоғыр­ланған 266 нысанда қар тазалау жұмыстары аяқталды.
Елордалық Өрт сөн­діру және апаттық-құтқару жұмыс­тарының құтқару­шылары Астанаға ғана емес, су басу қаупі төнген көрші облыстарға да көмек қолын созды. 1 сәуір күні құрамында 23 адам мен 6 техника бар құтқарушылар тобы Солтүстік Қазақстан облысы, Аққайың ауданының Смирнов ауылына және Шал ақын ауылына аттанған. Дер кезінде жетіп барған астаналық гарнизонның арқасында 14 мың 553 текше метр су тартылды.

Орынбек ӨТЕМҰРАТ