Қаңтардағы ҰБТ емтиханы

Кеше елімізде Ұлттық бірыңғай тестілеуді өткізу шаралары бас­талды.

18-20 қаңтар аралығында ҰБТ өткізудің 74 пункті базасында тестілеу жүргізіледі. Тестілеуге қатысуға 35838 бала өтініш білдірген. Оның 25615-і – қазақ тілінде, 10162-сі – орыс тілінде, 61-і ағылшын тілінде тапсырады.

ҰБТ өткізу үшін жергілікті жерлерде 444 адамнан тұратын мемлекеттік комиссия құрылды. Комиссия құрамында облыстар мен республикалық маңызы бар қалалар әкімдіктерінің қызмет­керлері, құқық қорғау органдарының, қоғам­дық ұйым­дардың, бұ­қаралық ақпарат құ­ралдарының өкілдері бар. Сынақ үшін 520 ау­дитория пайдаланылады.
Естеріңізге сала ке­тейік, биыл­дан бастап жоғары оқу ор­нына ақылы негізде түсу үшін ҰБТ-ны жылына төрт рет, атап айтсақ, қаңтарда, наурызда, маусымда және тамызда тапсыруға болады. Білім беру грантын тағайындау конкурсына қатысқысы келетін түлектер маусым айында өтетін ҰБТ-ны тапсыруы қажет. Білім және ғылым министрлігі өкілдерінің айтуынша, сынақты тапсыру форматында өзгеріс жоқ. Жаңа норма жоғары білім алуға қолжетімділікті арттыру мақсатында енгізілген.