Qanday käsipkerler salıqtan bosatıladı?

0 29

Memleket basşısı Qasım-Jomart Toqaevtıñ Jarlığına säykes mïkro, şağın bïznes salasındağı jäne ar­nawlı salıq rejïmderin töleytin kom­panïya­lar üş jılğa tabıs salı­ğınan jäne tekserwden bosatıldı. Bul sanatqa respwblïka boyınşa 1,2 mln käsipkerlik swb'ektisi kirdi.2019 jıldıñ 11 ayınıñ esebi boyınşa elimizde 8 trln 514 mlrd tg salıq tüsti. Memlekettik kiris byudjetiniñ josparı 101,3 payız orındaldı. Respwb­lïkalıq byudjettiñ taza tabısı 6 trln 219 mlrd tg quradı. Endi moratorïy jarïyalanğannan keyin mem­­lekettik byudjetke 200 mïllïard teñge kem jïna­lwı mümkin. Bul twralı Prem'er-mïnïstrdiñ birinşi orınbasarı – Qarjı mïnïstri Älïhan Smayılov mälim etti.
– Ötken jılı mïkro jäne şağın bïznesten byudjetke 190 mïllïard teñge salıq jïnaldı. 2020 jılı bul kompanïyalardı jäne jeke käsipkerlerdi salıqtan bosatatın bolsaq, byudjet 200 mïllïard teñge joğaltwı mümkin. Biraq biz onıñ ornın salıqtıq jäne kedendik äkimdewdi jetildirw arqılı toltırwdı közdep otırmız, – dedi Ä.Smayılov.
Endi bïznes swb'ekti­le­riniñ jiktelwine az-kem anıqtama bere keteyik. QR Käsipkerlik kodeksiniñ erejelerine säykes, jumıs­kerleriniñ jıldıq ortaşa sanı 15 adamnan aspaytın nemese jıldıq ortaşa kirisi aylıq eseptik körsetkiştiñ 30 mıñ eselengen mölşerinen aspaytın jeke käsipkerlik pen zañdı tulğalar mïkrokäsipkerlik swb'ek­tileri bolıp tabıladı. Zañdı tulğa qurmağan jeke käsipkerler jäne jumıskerleriniñ jıldıq ortaşa sanı 100 adamnan aspaytın jäne jıldıq ortaşa kirisi aylıq eseptik körsetkiştiñ 300 mıñ eselengen mölşerinen aspaytın (bul – jılına şamamen 757 mïllïon teñge), käsipkerlikti jüzege asıratın zañdı tulğalar şağın käsipkerlik swb'ektileri bolıp tabıladı. Atalğan uyımdar jeke jäne korporatïvtik tabıs salığınan bosatılatın boldı.
Bıltır bas qalada 100 mıñğa tarta bïznes swb'ektileri tirkelgen. Bul ötken jılmen salıstırğanda 18 payızğa artıq. Sonımen qatar käsipkerlik salası qalada jıldan-jılğa ösip kele jatqanı bayqaladı. Keyingi segiz jılda onıñ sanı bes esege ulğayğan. Bul salada 300 mıñnıñ üstinde adam jumıs isteydi. YAğnï ärbir üşinşi astanalıq turğın käsippen aynalısadı degen söz. Salıq tüsimderiniñ 53 payızın şağın jäne orta bïznes berdi. Ol – aqşağa şaqqanda 560 mïllïard teñge (1,5 mïllïard dollar).
Moratorïy kezinde şağın käsipkerlikti tekserw tıyım salınğanmen, bïznestiñ özin-özi rettewin, qoğamdıq baqılaw küşeytiletin bolmaq. Biraq şağın käsipkerlik swb'ektileri zañ buzsa, şara qoldanıladı.
Ötken jılı memlekettik kirister organdarı käsipkerlik swb'ektilerine qatıstı 27187 salıqtıq tekseris jürgizgen. Ol munıñ aldındağı jıldıñ uqsas merzimimen salıstırğanda 28,7 payızğa az. Tekserwdiñ 6957-si keşendi jäne taqırıptıq bağıtta örbidi, onıñ 5089-ı şağın bïznes swb'ektilerine qatıstı (barlıq tekseristiñ 73 payızı).
Memleket basşısınıñ Jarlığına säykes moratorïy nawqanına ilikken swb'ektiler tek osı üş jıldıq merzim işinde payda bolğan salıqtıq mindettemelerdi tölewden ğana bosatıladı. Sonday-aq 2020 jılğa deyin, yağnï tıyım jarïyalanbay turıp bastalıp ketken tekserister waqıttıq şektew­ge qaramastan tolıqtay ayaqtalwı eskeriledi.

Pikir jazw

Poçtañız jarïyalanbaydı

eleven + 9 =