QALA BYUDJETİ QAYTA QARALDI

0 79

Küni keşe bas qosqan besinşi şaqırılımnıñ halıq qalawlıları kezekten tıs segizinşi sessïyasın ötkizdi. Kün tärtibine jeti mäsele qoyıldı. Mañızdı jïınğa qala äkimi Ïmanğalï Tasmağambetov, onıñ orınbasarları – A.Balaeva, E.Qojağapanov, Esil awdanınıñ äkimi S.Mustafïna men Sarıarqa awdanınıñ äkimi E.Ospanov, barlıq basqarma basşı­ları jäne qoğamdıq birlestik ökilderi qatıstı. Depwtattardıñ deni jïnalıp, qordalanğan mäselelermen tanısıp, şeşw joldarın qarastırdı.

Alğaşqı mäseleni Ekonomï­ka jäne byudjettik josparlaw basqarmasınıñ bastığı Janat Nurpeyisov ortağa saldı. Ol jïnalğan qawım nazarına 2011 jılğı 7 jeltoqsanda bekitilgen «Astana qalasınıñ 2012-2014 jıldarğa arnalğan byudjeti twralı» şeşimine özgerister men tolıqtırwlar engizw twralı usınısın mälim etti. Jiti dayındalğan ekonomïkalıq saraptawdan byudjetti qayta naqtılaw qajettiligi twındağanın tüsindik. Oğan qaladağı älewmettik-ekonomïkalıq öristew men salıqtıq äkimşilendirw tetikteriniñ qunttı jumıs atqarwı negiz bolğan. Osı sebeptiñ arqasında üstimizdegi jıldıñ qañtar-tamız ayları aralığında 111,5 payızdıq mejege jetken kiristiñ artıqşılığı ayqındalıp otır. Onıñ 60 payızdan astamın qosımşa qun salığı men älewmettik salıq esebinen tügendelgenine bas ekonomïst basa nazar awdardı. So­nımen qala kirisi 7 mïllïard 219,4 mïllïon somanı qurap otır. Bul öz kezeginde byudjetti qayta eseptep, ulğaytıp, suranısqa ïe salalarğa qosımşa qarjı bölwdi qarastırwğa murındıq bolğan. Bas esepşiniñ sözine süyensek, birneşe basqarma muqtaj qarajatqa qol jetkizip otır. Depwtattar usınılğan jo­spar kestesimen tanısa otırıp, eşqanday sawal joldamadı. Eñ köp qarajat Qarjı basqarmasına tïesili bolsa, eñ azı İşki sayasat basqarmasınıñ enşisine tïipti.

Bölinip otırğan qarjınıñ esebinen Ïl'ïnka awılındağı 200 orınğa arnalğan mekteptiñ jaña ğïmaratı, Almatı-Aqmeşit köşeleriniñ qïılısındağı jaña balabaqşa qurılısı, «Jwravwşka» baqşasınıñ qosımşa böligi salı­nıp bitpek. Oñtüstik-şığıs ıqşam awdanında jaña ambwlatorlıq emha­na qurılısın ayaqtaw josparlanğan. Odan bölek är salanıñ özine tïesili maqsattı jumıstarı jüyeli türde bappen orındala beredi.

«Ädilet» tutınwşılar quqığın qorğaw qoğamınıñ törağası Qabıken Zakar'yanovtıñ jan jaqtan qısqan qımbatşılıqtı jeñildetw üşin osınday kiristi zeynetaqını nemese jalaqını köbeytwge jumsawğa, yakï qalalıq kommwnaldıq tarïfterdi tömendetwge bolmas pa degen sawalına Janat Nurpeyisov qımbattawğa qaramastan, munday ötinişter tek respwblïkalıq deñgeyde şeşiletini, sondıqtan bul sawaldıñ şeşimi äkimşilik quzırına tïesili emestigin alğa tarttı.

Kün tärtibinde qoyılğan mañızdı sawaldıñ biri memleket qajetine bay­lanıstı qaytarılğan jer telimderi twralı boldı. Bügingi künniñ kezek küttirmes oqïğası retinde Zañdılıq, quqıq tärtibi jäne köpşilikpen jumıs jasaw mäseleleri jönindegi turaqtı komïssïyanıñ törağası Nï­kolay Meşeryakov osı taqırıptı köterdi. Bul sala boyınşa irgeli jumıstar jasalıp jatqandığın, jüzege asqan jobalar az emestigi ay­tılıp, Mïrzoyan köşesi boyındağı 10 jer teliminiñ qojayını jäne qala äkimdiginiñ ekewara kelisimimen memleket muqtajdığı üşin satıp alınğanı twralı aqpar berdi. Kelisimge könbegen turğındar sotqa şağımdanw arqılı ortaq mämilege keletini bayandaldı.

Astana qalası äkimi apparatı basşısınıñ orınbasarı Erlan Ka­nalïmov qala basqarw täsilin özgertw twralı usınıs-sawalın joldadı.

Jumıspen qamtw jäne älewmettik bağdarlamalar basqarmasınıñ bastığı jeñildikpen däri-därmekti tegin taratw tizimderi twralı ayta otırıp, osı däri ülestirw mäselesin atalmış basqarmağa qayta qaytarw jönindegi usınısın maquldattı.

İşki sayasat basqarması bastığı Bolat Tilepovtiñ usınwımen Astana äkimdigi janındağı Jastar isteri jönindegi keñestiñ quramı özgerdi. Qala äkimi keñes törağası bolıp bekitildi. Keñes müşeligine qala basşısınıñ orın­basarları, depwtattar men jastar birlestikteriniñ ökilderi saylandı. Tötenşe jağdaylar departamenti bastığınıñ orınbasarı Beybit Sadıqov jaña evakwacïyalıq komïssïyanıñ quramın jarïyaladı. Käsipkerlik jäne önerkäsip basqarması bastığınıñ orınbasarı Rısgül Qawğabaeva käsipkerlik mäseleleri jönindegi saraptaw keñesiniñ jaña quramın usındı.

Sessïyağa törağalıq etken Bawırjan Ïsabaev barlıq mäsele jiti qaralıp, birawızdan qabıldanğanın mälimdedi. Depwtattar tarapınan eş qarsılıq bolmadı.

Şınar ÄBİLDA

Pikir jazw

Poçtañız jarïyalanbaydı

2 + 17 =