پاتريوتتىق تاربيە پارىزى

0 117

جاس ۇرپاققا ونەگە كورسەتۋ، پاتريوتتىق تاربيە بەرۋ قوعام الدىنداعى اسا ماڭىزدى مىندەتتەردىڭ ءبىرى ەكەنى انىق.
وسى ورايدا، اۋعانستان سوعىسىن باستان كەشكەن جاۋىنگەر-ينتەرناتسيوناليستەر ۇيىمدارى بەلسەندىلىك تانىتىپ جۇرگەنى بەلگىلى. جاقىندا وتكەن اۋعانستان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ كەزەكتەن تىس سەزى بارىسىندا اتالمىش ۇيىمنىڭ ماقسات-مۇددەسىن ءبىلىپ قايتتىق.

ەلىمىزدىڭ بارلىق ايماقتارىنداعى اۋعانستان سوعىسى ارداگەرلەرى ۇيىمدارىنىڭ جۇمىسىن ۇيلەستىرۋشى قاۋىمداستىقتى باسقارىپ كەلگەن حالىق قاھارمانى، ءماجىلىس دەپۋتاتى باقىتجان ەرتاەۆ كەزەكتى سەزدە وزىنىڭ قازاقستان رەسپۋبليكاسى ارداگەرلەر ۇيىمدارىنىڭ ۇيلەستىرۋ كەڭەسىنە توراعا بالىپ سايلانۋىنا بايلانىستى قاۋىمداستىق باسشىسى مىندەتىنەن بوساتىلاتىنىن ءمالىم ەتتى. وسىعان بايلانىستى قاۋىمداستىقتىڭ ەسەپ بەرۋى تىڭدالىپ، جاڭا توراعانى سايلاۋ ءوتتى. قاۋىمداستىققا مۇشە وبلىس ۇيىمدارىنان كەلگەن دەلەگاتتار بۇل مىندەتتى اتقارۋدى اۋعانستان سوعىسىنىڭ ارداگەرى، پارلامەنت ماجىلىسىنىڭ دەپۋتاتى باقىتبەك سماعۇلعا سەنىپ تاپسىردى.

 

قاۋىمداستىقتىڭ بولاشاقتاعى باعىت-باعدارىن ايقىنداعان جيىن بارىسىندا اۋعانستان سوعىسىندا قازا بولعان جاۋىنگەرلەردىڭ انالارىنا قۇرمەت كورسەتىلىپ، ماتەريالدىق كومەك بەرىلدى. سەزد جۇمىسىنا قاتىسقان دەلەگاتتار مەن قاۋىمداستىقتىڭ جاڭادان سايلانعان باسقارما مۇشەلەرى جاس ۇرپاققا پاتريوتتىق تاربيە بەرۋ جونىندەگى ويلارىن ورتاعا سالىپ، وسى باعىتتا جۇمىس جۇرگىزۋدىڭ جوسپارىن ايقىندادى.

«اۋعانستان سوعىسى ارداگەرلەرى ۇيىمدارى قاۋىمداستىعىنىڭ ەڭ نەگىزگى ماقساتتارى، بۇل – ەلىمىزدە بولاتىن ساياسي-الەۋمەتتىك شارالارعا بەلسەندىلىكپەن قاتىسۋ، وتان الدىنداعى انتىنا ادالدىق تانىتىپ، سوعىستا قازا بولعان قارۋلاس دوستاردىڭ اتا-انالارىنا قولداۋ كورسەتۋ، حابار-وشارسىز كەتكەن قازاقستاندىق جاۋىنگەرلەردىڭ تاعدىرىن انىقتاۋ بولادى. سونىمەن قاتار، بىزدىڭ قاۋىمداستىق ءۇشىن جاستاردى وتاندىق پاتريوتيزمگە تاربيەلەۋ – ەڭ باستى مىندەتىمىز بولىپ قالا بەرەدى. بۇل ءبىزدىڭ پارىزىمىز»،– دەدى جيىن قورىتىندىسىندا قاۋىمداستىق باسشىسى، جاۋىنگەر-جازۋشى، حالىق قالاۋلىسى باقىتبەك سماعۇل.

عالىم قوجابەكوۆ

پىكىر جازۋ

پوچتاڭىز جاريالانبايدى

13 − 3 =