Паралимпиадашылар мектебі шақырады

Паралимпиялық жаттығу орталығында Астана қаласы әкімдігінің мүмкіндігі шектеулі спортшыларға арналған балалар мен жасөспірімдер спорт мектебі ашылды.

Салтанатты шараға қатысқан елордалық Мәдениет және спорт бас­қармасының басшысы Болат Мажағұловтың айтуынша, жаңа мектепте арбамен би билеу, пауэрлифтинг, бочча, голбол, таэквондо, жүзу, футбол дзюдо секілді 17 спорт үйірмесі жұмыс істейді. Жүзушілер мен жеңілатлеттер «Алатау» спорт кешенінде жат­тықса, басқа спортшылар Паралимпиялық жаттығу орталығында да­йындалады. Бүгін­де мұнда 24 бапкер тәлім-­тәрбие береді.
Тағы бір айта кетерлік жайт, Астана қаласында тұратын мүмкіндігі шектеулі жандар жасы мен мүгедектігінің тобына қарамастан Паралимпиялық жаттығу орталығында тегін жаттыға алады. Бұл үшін мүге­дектігі бар екендігін рас­тайтын анықтама, мекенжай анықтамасы және жеке куәлік қажет.
– Орталыққа келген мүмкіндігі шектеулі кісілер тәні мен жанын сауықтыруға арналған спорт түрлерімен емін-­еркін айналысады. Спорт нысаны күніне 600-дей адамды қабылдай алады, бірақ қазіргі келушілер саны одан әлдеқайда аз. Сондықтан бұл орта­лық туралы барынша көпшіліктің құлақтанғанын қалаймыз, – деп атап өтті қалалық Мәдениет және спорт басқармасының басшысы.