OTBASI KÜNİ JARASIM MEREKESİNE AYNALSA

0 273

Bïılğı köktem erekşe. Olay bolatın sebebi, küni keşe – köktemniñ alğaşqı küninde Memleket basşısı Qazaqstanda jaña merekeni atap ötw jönindegi Jarlıqqa qol qoydı. Osılayşa, qırküyektiñ ekinşi jeksenbisi – otbası küni bolıp belgilendi.

Bul – ärïne, qwanarlıq jayt. Öytkeni, qazirgi kezde otbasın qura almay jürgen jastar köp. Jaña merekeni atap ötw arqılı ajarına aqılı say, körikti te körkem boyjetkenderdiñ kar'era jasawdı ğana oylamay, aldımen turmıs qurıp, tütin tütetwge asığwı kerektigine köz jetkize alsaq, qanday jaqsı!
Jalpı, orıstarda osığan uqsas «Rodïtel'skïy den'» degen merekeniñ barın bärimiz bilemiz. Olar bul küni ata-baba, twğan-twıstarın eske alıp, qabirlerine barıp gül qoyıp, qurmet körsetse, özbekter de däl solay: jıl sayın «Hatïra küni» jaqındarına as berip, quran bağıştap beyit basına baradı.

ÄKELER ÄSPETTELSE

Otbası – adam balasınıñ ösip-öner, qaz turıp, qanat qağar oşaq qası, altın besigi ğana emes, ol – şağın memleket. Onıñ öz zañı, öz qağïdaları boladı. Ökinişke qaray, soñğı kezderi keybir otbasındağı äkeniñ röli tömendep baradı. Ana üyde otırıp bala bağıp, äke sırtta nan tabwdıñ ornına, kerisinşe, tirlik keşip jürgender jeterlik. Endeşe, otbası merekesinde bala tärbïesindegi otbasınıñ ıqpalı jayında uzaq-sonar ängimeler örbitip qana qoymay, ulın-uyağa, qızın qïyağa qondırıp, ömirdiñ talay aşısı men tuşısın körgen önegeli otbasılardı jastarğa ülgi etip, marapattasaq, qanday ğanïbet bolar edi.

Jetimin jılatpağan elmiz

Qazaq – qaşan da jesirin jawğa bermegen, jetimin jılatpağan el. Elbasınıñ jıl sayınğı halıqqa Joldawında är qazaqstandıq otbasınıñ äl-awqatın jaqsartwğa, qazaqstandıqtardıñ ömir sapasın arttırwğa bağıttalğan is-şaralar mindetteledi. Bïıl da «Bizdiñ elimizde tolıq emes otbasılar köp. Memleket balanı jalğız tärbïelep jatqan analarğa kömekteswi kerek» dedi Memleket basşısı. Öytkeni, bügingi beybit ömirdiñ özinde bizde mıñdağan jetimder bar. Balalar üyleri tolı. «Bul, ökinişke qaray, jalpıälemdik ürdis jäne jahandanwdıñ sınağı. Biraq biz bul ürdispen küreswimiz kerek. Memleketimiz ben qoğamımız jetimderdi asırap alwdı jäne otbası tïpindegi balalar üyleri salınwın kötermelewi qajet». Bul rette «Arwjan jäne Ko» prodyuserlik ortalığınıñ dïrektorı Arwjan Saïn qazaqstandıqtardıñ jetim balalardı asırap alwın jeñildetw üşin zañnamalıq turğıdan jağday jasaw qajettigin alğa tarttı. Şeteldik azamattardıñ bala asırap alw üşin nege Qazaqstanğa keletini jaylı oylanğan ol şın mäninde osıdan 100 jıl burın şetelderde jetim balalar üyi qalıptı qubılıs bolğanın, olardıñ jetim balalardı asırap alw jönindegi jumıstı jüyeli jürgizip, jağday jasawınıñ nätïjesinde olarda qazir balalar üyiniñ joq ekenin tilge tïek etkeni de esimizde. Al, Qazaqstan Respwblïkası Eñbek jäne halıqtı älewmettik qorğaw mïnïstri Gülşara Äbdihalıqova qazaqı otbası qundılığı äli de bolsın saqtalğanın, tek onı äri qaray damıtıp, otbası qundılığın keñinen nasïhattawımız kerektigin eskertedi. Sondıqtan da, otbası qundılığı kez kelgen memlekettiñ ustanıp otırğan bastı sayasatı ekenin esten şığarmayıq.

Qayta qosılwşılardıñ qatarı köbeyse

Soñğı derekterge süyensek, elimizdegi otbasılardıñ sanı 4 mïllïonnan asıp otır. Olardıñ 70 payızğa jwığınıñ quramında 3-ten 5-ke deyin adam bar. Elordadağı Almatı, Esil jäne Sarıarqa awdandarı AHAT bölimderi baspasöz qızmetkerleriniñ mälimetterine süyensek, bïılğı jıldıñ basınan beri Astana qalası boyınşa 1200-den astam azamattıñ nekesi tirkelgen. Bügingi künge deyin olardıñ 460-sı ajırasıp ülgergen. Qayta tabısqandardıñ sanı onğa da jetpeydi. Demek, otbası küni otbasılıq jarıstar ğana emes, osınday jastardıñ jarasım tawıp ketwine arnalğan keşter de uyımdastırılsa. Qısqası, bul qazaqstandıq otbasılardıñ berekesin arttırw üşin qazaqtıñ otbasılıq dästürlerin jañğırtw küni ğana emes, ajırasqandardı qayta tabıstırar jarasım merekesi bolsa deymiz.

Gülbarşın ÖKEŞQIZI,
g.mamyraimova@astana-akshamy.kz

Pikir jazw

Poçtañız jarïyalanbaydı

18 − seventeen =