ОҢДЫ ІСТЕР ОРТАЛЫҒЫ

0 85

росс

Екі елдің рухани байланыстарын жаңғыртып, халықтар арасындағы достықтың алтын арқауын жалғап жүрген халықаралық орталықтардың дені елордамызда орналасқан.

«Бармасаң, келмесең, жат бола­сың» деп, ағайын арасындағы сый­лас­тықтың да, бауырлас халық­тар арасындағы байланыстың да мәнін бір сөзбен бейнелеген қазақтың жолымен Ресей мәдениет және ғылым орталығында болған едік. О бастан іргесі сөгілмеген екі елдің гумани­тария саласындағы ат­қа­рып жат­қан жұмыс барысымен Қазақстан Рес­публикасындағы «Россотрудни­чество» өкілдігінің жетекшісі Виктор Шулика таныс­тырып берді.

– Біздің қызметіміз халықтар арасындағы достық байланысты сақтап, нығайтуға бағытталған. Негізгі мақсатымыз – екі мемлекет арасындағы гуманитарлық қарым-қатынастарды жаңғырту болып табылады. Мәдениет, әдебиет, ғылым, білім беру және отандастарды қолдау аясында осы міндетті атқарып келеміз. Осы орайда түрлі тақырыптық кештер, кездесулер мен концерттік бағдарламалар ұйымдастырамыз. Сонымен бірге Ресей, Қазақстан және ТМД елдері тарихындағы ма­ңызды даталар мен уақиғаларды осы орталықта бірлесе атап өтеміз. Ресей Федерациясының мем­ле­кеттік мерекелері қарса­ңын­дағы ресми қабылдаулар, соғыс және еңбек арда­герлерін марапаттау да осы орта­лық­та бар сән-сал­тана­тымен өтеді, – деді Виктор Николаевич.

Ол осында өткізілген фотоэкспозициялар, ғылыми-техникалық, көркемөнер туындыларының көрмелері және танымал сазгерлер мен жазушылардың, өнер қай­рат­керлерінің қатысуымен өткен әдеби-сазды кештер жайында кеңінен әңгімелеп берді.

– Бүгінгіміз бен өткеніміздің  нақты дәйегі – фотоөнер барлық өңірде дамып келеді. Талантты суретшілердің туын­дылары астаналықтар назарына ұсы­нылып қана қоймай, ондай кеш­­тің соңы концерттік бағдар­ла­маға ұласып жатады. Сондай көр­­ме­лер­дің бірі Мәскеу қаласының тарихына қатысты өтті. Өмірінде бір рет ұлы шаһарда болып, осында өткізген кезеңдерін еске салатын фотокөрмені астаналықтар жылы қабылдады. Жасамыс қазақ әйелі келіп әсерімен бөліскен еді. Оның әкесі Ұлы Отан соғысы кезінде Мәскеу түбіндегі шайқастарға қатысып, сонда қаза тапқан екен. «Әке­ме топырақ бұйырған бауырластар зиратына кезінде ұлымды апарып тұрушы едім. Жаныма жақын қасиетті орынның суреті көзіме оттай басылды. Енді  немерелерімді де аталарының басына апарып қайтқым келеді» деді. Әрине, ортақ тарихымыз бізді жақындастырады. Мұндай шаралардың бәрі тарихқа тағзым, жастарға өнегесі болсын деген ниет­ті жадымызда сақтайтынымыз да сондықтан, – дейді Виктор Шулика.

Қазіргі заманғы мультимедиялық және дыбыс күшейткіш құралдардың және видеопроекторлар мен үлкен экран арқылы Ресейдің алдыңғы қатарлы жоғары оқу орындарынан, РФ аймақтарынан видео семинарлар, таныстырылымдар өткізуге  мүмкіндік береді екен. Арнаулы мамандармен бірге түрлі оқу бағ­дарламалары талданып, ресейлік жаңа фильмдердің тұсаукесерлері де осында өтеді.

Орталықтың ғылыми бағыты ауқымды көрінді. Дөңгелек үстел отырыстары, ғылыми-тәжірибелік конференциялар, орыс тілі маман­дарының күздік сессиясы осында өтеді. Қазақ және Ресей ғалым­дары бас қосып, екі елдің іскер азамат­та­рының ортақ мәселелерді талдап ше­шетін орны да осында екен.

Ресейліктердің Елдік үйлестіру кеңесінің отырыстары мен журналистерге арналған брифинг, баспасөз мәжілістері, үкіметтік емес ұйымдар өкілдерінің жиындары мұнда тұ­рақты түрде  ұйымдастырылады.

Жақында Астана қаласы Білім беру басқармасымен бірлескен жас ақындардың «Поэзия, бейбітшілік, тіл!» деп аталатын поэтикалық кеш өтті. Өлеңге таласы бар жас­тарды бастап келген Б.Хамзина осы кештің  жүргізушісі болды. Кеш қонақтары қатарында орыс тілі мен әдебиеті бойынша олимпиада жеңімпаздары болды. Кештің ар­наулы қонағы М.В.Ломоносов атын­дағы Мәскеу мемлекеттік уни­вер­ситеті филиалының профессоры Г.Власов пен Қазақстан қорғаныс күштерінің ардагері, ақын В.Петров құттықтау сөз айтып, оқушыларға алғысын білдірді.

– Қазақстан – тәуелсіз мемлекет. Ресей мен Қазақстан арасын­дағы байланыс тату көршілік, ынты­мақ­­тық келісімшарттары арқылы айқын­далған. Одан бөлек, халық­тарды жақындастырып, ортақ құн­дылықтарын дәріптеуде әлем классикасымен қатар орыс әдебиетінің орны бөлек дер едім. Жастар арасында ақыл-ой кемеңгерлерінің мұ­ра­­сын насихаттау арқылы, жалпы адам­затқа тән рухани байлыққа қол жеткіземіз. Жадымда қалған әдеби кездесу Толстойдың әдеби мұра­сына қатысты болды. Балалар шығар­машылығына ерік берген осы кезде­суге ұлы жазушының ұрпағы қа­тысты, – дейді Виктор Николаевич.

Халықаралық мәдени-гумани­тарлық ынтымақтастықтың түрлі пішімдерін дамыту – біздің ел сая­сатының да басымдық берген бағыт­тарының бірі. Білім беру, ғы­лымды дамыту және жаңа техноло­гиялармен алмасу кеңістігін аша отырып, халықтар арасындағы достықтың діңгегін нығайтуда аталмыш орталықтардың қызметі зор екеніне көзіміз жетті.

 

Пікір жазу

Почтаңыз жарияланбайды

three × three =