«Астана ақшамы»
Ел жүрегі – елорда шежіресі

Өнегелі әкелерді ардақтайды

0 238

Жақында елордадағы Жамбыл Жабаев атындағы №4 мектеп-гимназиясында «Отбасы – адамзат бесігін тербеген ұя» атты ата-аналар форумы өтті.

Форумның өтуіне қалалық ата-аналар қауымдастығы мұрындық болды. Мұндай ауқымды іс-шара алғаш ұйымдастырылып отыр екен. Форумға ҚР Парламенті Мәжілісінің депутаты Ирина Смирнова, еліміздегі Болгария мен Жапония елшілігінің жа­уапты қызметкерлері, «Нұр Отан» партиясының мамандары және тағы басқа қоғамдық ұйымдар­дың өкілдері қатысты.
Форумда бүгінгі жас ұрпақтың білімі мен тәрбиесіне ата-ана мен мектеп екі жақтап ықпал жасау жайында ата-аналар қауымдастығының төрайымы Гүлнар Омарова мен Жамбыл Жабаев атындағы №4 мектеп-гимназиясының директоры Базаргүл Сағындыққызы өз ойларын ортаға салды. Басқа да азаматтар тәрбиесіз білімнің тұл екендігін сөз етті.
Сондай-ақ, жиын барысында оқушылардың өз қолдарымен жасаған бұйымдарынан көрме өтіп, балалардың білім сайыстарында қол жеткізген жетістіктері жұртшылыққа көрсетілді. Өнер­паз өрендер әуелетіп ән салып, күм­бірлетіп күй төкті.
Жапония елшілігінің маманы Кумари Харуси озат оқушыларды күншығыс елінде білім алуға шақырса, Болгария елшілігінің өкілі жеткіншектердің үш тілде еркін сөйлегені мен өнеріне ризашылығын білдірді.
Форум соңында ата-аналар қауымдастығы үндеу қабылдады. Онда жас ұрпақты ұлттық құн­дылықтармен тәрбиелеу үшін «Отбасы және мектеп» академия­сын құру, қайсарлық пен ер­мі­незді, рухты әкелерді дәріптеу мақ­са­тында «Жүз өнегелі әке» жобасын жасау, сан ғасырлық мұраға бай ұлттық өнерімізді бастауыш сыныптан бастап оқыту секілді жаңашыл идеялар көтерілді.

 

Пікір жазу

Почтаңыз жарияланбайды