ون ەكى مىڭ اتتىڭ كۇشى بار

0 146

قازاق قاۋقارلى ەلەكتروۆوزدىڭ دا يەسى اتاندى. بۇرىن مۇنداي تەگەۋرىندى تەمىر كولىكتى قۇراس­تىرۋ وزگەلەردىڭ عانا قولىنان كەلەتىندەي كورىنۋشى ەدى. جاقىنداعى رەسەي، ۋكراينانىڭ وندىرىسىنە جالتاقتايتىنبىز. ءتىپتى، قوسالقى بولشەكتەردىڭ ءوزى سولاردان تاسىمالداناتىن. ەندى، كەرىسىنشە، تمد مەملەكەتتەرى قازاققا قىزىعا قارايتىن بولدى.

KZ8ا سەريالى تەمىرجول كولىگىندە 12 مىڭ اتتىڭ كۇشى بار. ءبىر تارتقاندا 9 مىڭ توننا جۇكتى ەڭسەرە الادى. كومىر، جانار-جاعار ماي، باسقا دا تاۋارلاردى تاسىمالداۋعا تاپتىرمايتىن كولىك. ءوزى جۇردەك. جىلدامدىعى ساعاتىنا – 120 شاقىرىم. وتىندى دا 27 پايىزعا ۇنەمدەيدى، ەكولوگيالىق تالاپتارعا دا سايما-ساي.

قازاقستاننىڭ تاپسىرىسىمەن فرانتسيانىڭ «الستوم ترانسپورت» كومپانياسى جاساپ شىعارعان قۋاتتى لوكوموتيۆ ءوزىمىزدىڭ جانە تمد مەن بالتيكا ەلدەرىنىڭ تابيعاتىنا بەيىمدەلە جاسالعان. ەلۋ گرادۋس اپتاپ ىستىق پەن ەلۋ گرادۋس شىڭىلتىر ايازعا توتەپ بەرە الادى.
ەلەكتروۆوز جۇرگىزۋشىنىڭ كابيناسى دا زاماناۋي ۇلگىدە جابدىقتالعان. جىلى دا جايلى كىشىگىرىم ءۇي دەرسىڭ: ميكروتولقىندى پەش، توڭا­زىتقىش، جۇمساق ورىندىق، ءبارى بار. ەدەنىنىڭ ءوزى ارنايى جىلىتىلادى.

مۇنداي قۋاتتى ەلەكتروۆوزدى قۇراستىرىپ شىعاراتىن استاناداعى زاۋىتتىڭ اۋماعى 27 522 شارشى مەتردى قۇرايدى. ىرگەتاسى 2010 جىلدىڭ ماۋسىم ايىندا قالانعان. جىلىنا ەكى سەكتسيالىق 50 ەلەكتروۆوز شىعارا الادى.

بۇعان دەيىن ەلىمىزدىڭ جۇك جانە جولاۋشىلار تاسىمالىنا تەمىر جول ۆاگوندارى جەتىسپەي، بارىنىڭ ءوزى ەسكىرگەن بولاتىن. ەندى، مىنە، وسى قاجەتتىلىكتىڭ ورنىن ەلەكتروۆوز قۇراستىرۋ زاۋىتى تولتىراتىن بولدى. تەحنولوگيالىق تۇرعىدان ونىمدىلىگى وتە جوعارى ءوندىرىس وشاعى­نىڭ بالاماسى ازىرگە الەمنىڭ وزىندە از. شويىن جولداردا جوسيتىن قازاقستاندىق كولىكتەرگە قازىردىڭ وزىندە سۇرانىس بار. ەلەكتروۆوز قۇراستىراتىن زاۋىت كەلەشەكتە كەدەن وداعى ەلدەرىن تەمىرجول كولىگىمەن قامتاماسىز ەتەتىنىن ەسكەرسەك، بۇل زاۋىت ەكونوميكامىزعا تىڭ سەرپىن بەرەتىن ءىرى جوبا بولارى انىق. ازىرشە بۇل تەمىرجول كولىكتەرى تەك جۇك تاسىمالداسا، 2014 جىلدان باستاپ زاۋىت جولاۋشىلارعا ارنالعان ەلەكتروۆوزدار شىعارۋدى جوسپارلاپ وتىر.

قىمبات توقتامۇرات

پىكىر جازۋ

پوچتاڭىز جاريالانبايدى

one × 1 =