وليمپياداعا 3 كۇن قالدى

0 26

ەلىمىزدىڭ وليمپيادالىق كومانداسىنىڭ نەگىزگى بولىگى توكيوعا بارىپ، جايعاسىپ ۇلگەردى. «اقبۇلاق» وليمپيا­دالىق بازاسى ەكى اپتالىق كارانتيندە بولعاندىقتان، سپورتشىلار وليمپيادا الدىنداعى جاتتىعۋ جيىندارىن الماتى قالاسى مەن الماتى وبلىسىندا وتكىزگەن.ۇلتتىق قۇرامانىڭ قالعان 43 مۇشەسى توكيوعا 28 شىلدە كۇنى اتتانباق. ءوز تاريحىندا تۇڭعىش رەت كورەرمەنسىز وتەتىن دۋى باسىم دودادا كارانتين تالاپتارى قاتاڭ ساقتالادى. سپورتشىلار جايعاسقان وليمپيادا اۋىلىندا دا سانيتارلىق نورمالار باستى نازاردا. اتلەتتەرگە وليمپيادالىق اۋىل مەن جاتتىعۋ جانە سپورت زالدارىنىڭ اراسىنداعى مارشرۋتتان اۋىتقۋعا تىيىم سالىنعان. سونداي-اق ولار كۇن سايىن پتر تەست تاپسىرادى. ءارى سپورتشىلار جۇرگەن ورنى مەن دەنساۋلىق جاعدايىن باقىلايتىن بىرنەشە قوسىمشانى ۇيالى تەلەفونىنا ورناتۋعا مىندەتتى.
توكيوداعى ۇلتتىق قۇرامانىڭ شەف-دە-ميسسيونى ەلسيار قاناعاتوۆ دا وليمپيادانى ۇيىمداستىرۋ كوميتەتى قىزۋ تىرشىلىككە كىرىسكەنىن العا تارتادى.
– جاپونيا وليمپياداعا جاقسى دايىندالعان ەكەن. دايىندىق كەزىندە پالەندەي ءبىر قيىندىق تۋدىرعان جوق. سپورتشىلارعا جاقسى جاعداي جاسالعان دەۋگە ابدەن بولادى.
دەلەگاتسيا مۇشەلەرىنىڭ دە قالادا قىدىرۋىنا دا رۇقسات جوق، – دەيدى ە.قاناعاتوۆ.
سوعان قاراماستان، وليمپياداعا قاتىسى بار 10 ادامنىڭ كوروناۆيرۋستىق ينفەكتسيا جۇقتىرعانى انىقتالدى. ونىڭ ىشىندە 3 ناۋقاس وليمپيادا اۋىلىندا تۇرادى.

پىكىر جازۋ

پوچتاڭىز جاريالانبايدى

seven + 11 =