НАҚТЫ МЕКЕНЖАЙ БОЙЫНША ТІРКЕЛУ КЕРЕК

0 124

Бейсенбі күні Астанадағы №1 қалалық емхананың бас дәрігері Күлжан Насырқызы Анасова қала тұрғындарымен тікелей тілдесуге шықты. Бір сағатқа созылған байланысты ықшамдап, оқырмандар назарына ұсынып отырмыз.

– Сәлеметсіздер ме! Күлжан Насыр­қызы, менің білуімше, жүрек ауруына шалдыққандар сіз­дің емханада электрлі кардиограмма жа­сата алады. Жүректі тексеретін басқа да­ құрал-жабдықтар бар ма?

– Иә, бар. 2012 жылдың басынан бас­тап функционалды анықтау кабинетінде жа­ңа ме­дициналық құрал-жабдықтардың кө­ме­гі­мен­ тұрғындарға төмендегідей зерттеулер: қан­ қысымының тәулік бойы тексерілуі, эхо­кардиограмма немесе жүректі ультрады­быс­пен тексеру және холтер мониторингі жү­р­гізіледі.

– Мен, Ба­қыт Дос­болаева №1 емханаға тіркел­ген­­мін. Жыл сайын қала­мыз­дағы басқа ем­ха­налардағы секілді сіздерде де скри­нинг­тік­ тексерулер жүргізіліп келеді. Бұдан ха­­ба­р­да­р­мыз. Ай­ты­ңыз­шы,­ биыл бұл бағытта қандай жаңалықтар бар,­ тағы да­ басқа қандай скринингтік тек­­се­­ру­лер­ден­ өте аламыз?

– Жыл сайын тұрғындар арасында­ он­ко­ло­гиялық ауруларды, жүректің ишемиялық ау­руын,­ қант­ диа­бе­тін,­ глаукоманы, сүт без­­­де­­рі­­ обы­рын,­ жатыр мойыны обырын ер­­те­ анық­тау­ мақсатында скринингтік тек­се­ру­ле­рі жүргізіліп келеді. Ал, биылдан бас­тап­ скринигтік тексерулер толықтырылды. Со­ның ішінде, енді емханамызда бауыр обы­рын,­ асқазан, өңеш обырын, колоректалды­ обыр­ды, қуықастыбезінің обырын ерте анық­тау мақсатында қосымша тексерулер ен­гі­зіл­ді.­

– Біз жас ата-анамыз. Жақында ба­ла­мыз бір жасқа толды. Мынаны бі­лгі­міз келеді: біздің қандай ме­ди­циналық тексерулерден өтуіміз керек?

– Жалпы, кез келген 1 жастағы бала барлық ма­мандарға қаралуы қажет. Сонымен қатар ба­­лаға қанның, зәрдің, нәжістің жалпы тал­дауы­ бойынша зертханалық тексерулер жа­са­туларыңыз керек.

– Баламның қарны аша береді. Қа­лада қосымша тамақты тегін алу­ға болады дегенді естідім. Сонда­ қан­дай­ жағдайларда емшектегі балаға рецепт бой­ынша тегін тамақ алуымызға болады?

– Қазақстан Республикасы Денсаулық сақ­тау министрлігінің 2011 жылғы 4­-қа­ра­ша­да­ғы­ № 786 бұйрығына сәйкес, асы­ран­ды балалар,­ егіз­­дер, үшемдер, студент ана­лар­дың ба­­ла­ла­ры, сондай-ақ, эндокриндық, ал­лер­­гия­лық ау­рулары бар, туберкулезге шал­дық­­қан, он­­ко­ло­гиялық аурулары бар, бо­сан­ған­нан­­ кейінгі күйзеліске ұшыраған және ВИЧ­ жұқпасы бар науқас аналардың бір жас­қа­ дейінгі балалары жасанды тамақпен қам­та­ма­сыз етіледі. Яғни, осы категорияға жататын­ ана­лар­дың балала­ры­на тегін құрғақ сүт та­ғам­да­ры беріледі.

– Күлжан Насырқызы, біз от­ба­­сымызбен сіздің емханаға қа­ра­­ламыз. Дәрігерлеріңіз сондай сы­­па­­йы әрі олардың көбінің тәжірибелі ма­­мандар екенін көріп жүрміз. Мықты ма­­мандарды жинапсыз, қуаныштымыз. Ең­­бек­­те­­рі­­ңіз­­ табысты болсын!

– Хабарласқаныңызға рахмет, ең бастысы – ауырмаңыздар. Нақты сұрағыңыз бар ма?

– Алдымен ем­ха­на­ңыз­да­ғы ақ халатты аб­зал­ жан­дарға алғыс ай­тай­ын деп­ едім. Сұрағым: дә­рі­гер­ле­рі­ңіз­ бі­ліктілігін көтеру үшін оқуға жиі­ ба­рып­ тұра ма?

– Емхананың дәрігерлері заң бо-йынша 5 жылда бір рет біліктілігін көтеру курстарына оқуға барады. Мүм­кіндік болса жылда оқуға ба­ру­ға болады. Біздің емхананың дә­рі­гер­лері соңғы уақытта заман талабына сай жылына бір, қажет бол­ған жағдайларда екі рет оқуға ба­рады. Оның –игілігін өздеріңіз көріп жүрсіздер.

– Күндізгі стационарда ем­делуіме бола ма?

– Болады. Учаскелік дә­­рі­ге­­рі­ңіз­ жолдама берсе,­ күн­діз­гі стационар дәрігері қарап, тексереді. Онда барлық дәрілерді тегін ала аласыз. Мұнда көбіне жүрек, жүйке ауруларымен жатады. Бұрын пне­в­­мониямен ауырғандарды ау­ру­ханаға жатқызатынбыз, қазір оларды да өзіміз емдейміз. Көп адам­дар жылына екі рет күндізгі ста­ционарда емделеді. Сонда әр­түр­лі асқынулар болмайды. Осыны ескере отырып, біз де алдағы уа­қытта күндізгі стационардағы тө­сек санын көбейтуді жоспарлап отырмыз.

– Тұрғылықты мекен­жа­йым бойынша №6 ем­ханаға қарай­мын, бірақ, №1 емхананың ауданында жұмыс істейтіндіктен, жүктілігім бойынша осы емха­наға тіркелсем деп едім. Бұл мүмкін бе?

– Негізі жүктілік бойынша жұ­мыс­қа жақын жерге тіркелу дұрыс емес. Оның үстіне алғашқы 12 ап­таға дейін сіз міндетті түрде жүк­ті­лігіңіз бойынша есепке тұруыңыз ке­рек. Бұл сіздің де, бөпеңіздің де ден­сау­лығын қадағалап отыру үшін өте маңызды. Сондықтан жүкті әйелдер жұмысына жақын жерге емес, өзінің нақты тұратын мекенжайы бойынша есепке тіркелуі керек.

Гүлбаршын ӨКЕШҚЫЗЫ

Пікір жазу

Почтаңыз жарияланбайды

20 − 18 =