«مىڭجىلدىقتار توعىسىنداعى استانا»

0 130

«مىڭجىلدىقتار توعىسىنداعى استانا» اتتى بابالار وركەنيەتىنىڭ فەستيۆالى ءتورت كۇن بويى ەلوردا تويىنىڭ كوركىن اسىرىپ، سالتاناتىن جاراستىردى. شاتىر استىنداعى شاتتىق، وتاۋ ىشىندەگى ويىن-ساۋىق، جارمەڭكەدەگى ساۋدا-ساتتىق، كيىز ۇيلەردەگى تاعىلىمدى دارىستەر، دۋلىعا-ساۋىتتى دۇلەي باتىرلار، قۇسبەگى، اتبەگىلەردىڭ ونەرى… ءبارى-ءبارى وسى اۋىلدىڭ ەنشىسىندە.

مىڭجىلدىقتار توعىسىنداعى استانا5

الماتىلىقتاردىڭ استانا تويىنا تارتۋى. اعاش شەبەرى نۇرجان ءدىلمانوۆ شاكىرتتەرىمەن شەبەرلىك سىنىبىن وتكىزدى. ۇلتتىق اسپاپتىڭ 53 ءتۇرىن جاسايتىن شەبەر جۇمىستى شەبەرحانادا جاساعان ءبىر بولەك، حالىقتىڭ الدىندا جاساعان ءبىر بولەك ەكەنىن ايتادى.
كۇي كۇمبىرىمەن ورتەكەنى ويناقتاتقان دومبىراشىنىڭ ونەرى كوپشىلىكتى ءتانتى ەتتى.

مىڭجىلدىقتار توعىسىنداعى استانا6

«ات جالىندا» اتتى شاباندوزدار دۋمانى. تۇلپار تىزگىندەگەن جىگىتتەر شاپقىنشىلىق جىلدارىنداعى قازاق باتىرلارىنىڭ ەرلىگىن ايشىقتادى. نايزالاسۋدىڭ، قىلىشتاسۋدىڭ، جامبى اتۋدىڭ عاجاپ ۇلگىلەرىن كورسەتتى. اۋىزدىقپەن الىسقان سايگۇلىك ۇستىندەگى قىناما بەلبەۋ بايلاپ، بەس قارۋىن تۇگەل اسىنعان ايبوز ۇلداردىڭ ايقاسى دەلەبەمىزدى قوزدىرىپ، سوناۋ ءبىر عاسىردى كوز الدىمىزعا اكەلگەنى راس.

مىڭجىلدىقتار توعىسىنداعى استانا4

ەلوردا مەرەكەسىنە ات شالدىرىپ كەلگەن وزبەك، تاجىك ۇلتتارى وكىلدەرىنىڭ ونەرى تويدىڭ شاتتىعىن ارلەدى. «ۇزىن سيراقتارىنا» قاراماي سەكىرە بيلەپ، دابىل قاعىپ دۋمانداتقان الا شاپاندىلاردى قىزىقتاعان قوناقتار دا از ەمەس. ءان ىرعاعىمەن بەلدەسىپ، الىسقان اعايىندارىمىزدىڭ ونەرىن كورەرمەن فوتوسۋرەتكە ءتۇسىرىپ الەك.

مىڭجىلدىقتار توعىسىنداعى استانا2

وڭتۇستىك قازاقستان ءوڭىرىنىڭ قولونەرشىلەرى كيىز باسۋدان شەبەرلىك سىنىبىن وتكىزدى. ولار تۇتىلگەن قوي ءجۇنىن شي بەتىنە ورنالاستىرا ءجۇرىپ، كيىزدىڭ پايدالى قاسيەتتەرى جايىندا اڭگىمەلەدى. قىزىعۋشىلىق تانىتقان ەلوردالىقتار قازاق اۋىلىنداعى تىرشىلىككە ءبىر ءسات ەنىپ كەتكەندەي كۇي كەشتى. شەبەر تاڭشولپان ءىبىجانوۆا بۇل ونەردىڭ اجەسىنەن دارىعانىن ايتادى.

مىڭجىلدىقتار توعىسىنداعى استانا

قولونەر بۇيىمدارىنىڭ كورمە-جارمەڭكەسىنىڭ ساۋداسى قىزۋ ءجۇردى. «قازاقى تاقيانىڭ ورنەگى قانداي ادەمى!» دەپ تامسانادى ارۋلار.

مىڭجىلدىقتار توعىسىنداعى استانا3

«بۇلعارى ساداق، بۇقار جاي،
تارتا الماسام ماعان سەرت!»
بەل كۇشىمە شىداماي،
بەلىڭنەن كەتسەڭ ساعان سەرت!
دەگەن قازاق باتىرى ادىرنانى كەرە تارتىپ، سۇر جەبەنى نىساناعا دالدەي قادادى.

مىڭجىلدىقتار توعىسىنداعى استانا1

مەرەكەنىڭ دۋمانىن اسىرعان – بۇلدىرشىندەر. ۇلتتىق ناقىشپەن ارلەنگەن الاڭقاي بالالاردىڭ كۇلكىسىمەن، ويىنىمەن دۋمانعا تولدى.

ازىرلەگەن: اسحات رايقۇل

پىكىر جازۋ

پوچتاڭىز جاريالانبايدى

15 + fifteen =