مۇنارالى كوپىر سالىنادى

0 77

باس قالادا بۇرىن-سوڭدى بولماعان مۇنارالارى بار كوپىر سالىنادى. كوپىردە تۇرعىن ءۇي كەشەنى بوي كوتەرەدى. «ەلوردانىڭ ەڭ ماڭىزدى نىساندارىنىڭ ءبىرى – Triathlon Towers دەپ اتالاتىن جوبا بولماق.

بۇل نىساندى ەسىل وزەنىنىڭ جاعالاۋىنان، ترياتلون باعى مەن «جەتىسۋ» ساياباعىنىڭ اۋماعىنان سالۋ جوسپارلانىپ وتىر. Triathlon Towers باس قالاداعى ساياباقتاردىڭ دامۋىنا ەرەكشە سەرپىن بەرەدى، سونداي-اق عيمارات قالا ساۋلەتىمەن تاماشا ۇيلەسىم تابادى» دەپ حابارلادى ساۋلەت، قالا قۇرىلىسى جانە جەر قاتىناستارى باسقارماسىنىڭ وكىلدەرى.
مامانداردىڭ بولجاۋىنشا، قالانىڭ كورنەكتى نۇكتەلەرىنەن، بارلىق كولىك ماگيسترالدارىنان قولجەتىمدى جەردە سالىناتىن بىرەگەي ساۋلەتتىك جوبا ەلوردامىزداعى تۋريستىك كوز تارتارلىق نىساننىڭ ءبىرى بولماق. ول ەكى جاعالاۋداعى جاياۋ-كولىك جانە ۆەلوكولىك جۇيەلەرىن ءبىر-بىرىمەن جالعاپ، ەسىلدىڭ جاعاسىنداعى جاڭا سۋ ۆوكزالىن قالىپتاستىرادى. «تۇجىرىمدامانىڭ نەگىزىنە قالا مەن وزەننىڭ جىمداسۋى، ادام مەن تابيعاتتى بىرىكتىرەتىن جاڭا جاياۋ جۇرگىنشىلەر جانە ۆەلوسيپەدشىلەر جولاعىن قۇرۋ ءپالساپاسى تاڭداپ الىنعان. بۇل سالاۋاتتى ءومىر سالتىنىڭ جانە ەكولوگيالىق جاعىنان تازا قالانىڭ جاڭا سيمۆولى، قالالىق ءومىر ءسۇرۋ سالتىنىڭ، نۇر-سۇلتانداعى ەڭبەك ەتۋ مەن دەمالىس­تىڭ جاڭا ۇلگىسى» دەپ ءتۇسىندىردى قۇزىرلى باسقارماداعىلار.
كوپبەيىندىك تۇرعىن ءۇي كەشەنىندە جاپسارلاس سالىنعان بولمەلەرى مەن پاركينگتەرى بار ساۋلەتتى ۇلكەن ۇيلەر، قوناقۇيلەر بولادى. بۇل جوبانىڭ اۆتورى – Benoy LTD كومپانياسىنىڭ لوندونداعى ساۋلەت ونەرى بيۋروسى. Triathlon Towers-ءتىڭ بيىكتىگى 42 قاباتتان تۇرادى. جوبانىڭ تۇجىرىمداماسى قالا قۇرىلىسى جونىندەگى كەڭەستە الدىن الا كەلىسىلدى.

پىكىر جازۋ

پوچتاڭىز جاريالانبايدى

2 × 5 =