مۇعالىمدەردى ارتىق جۇمىسقا تارتقاندارعا – 120 اەك ايىپپۇل

«پەداگوگ مارتەبەسى تۋرالى» زاڭ تاعى قانداي قۇقىقتاردى قورعايدى؟

0 105

ۇكىمەت وتىرىسىندا «پەداگوگ مارتەبەسى تۋرالى» زاڭ جوباسى بەكىتىلدى. ول مۇعالىمدەردىڭ جۇكتەمەسىن ازايتۋدى، ولاردى وزدەرىنە ءتان ەمەس جۇمىستاردى ورىنداۋدان بوساتۋ ارقىلى ءوز-وزدەرىن دامىتۋىنا جانە شىعارماشىلىقپەن اينالىسۋىنا مۇمكىندىك بەرۋدى، ماتەريالدىق جانە ماتەريالدىق ەمەس ىنتالاندىرۋدى، سونداي-اق باسەكەگە قابىلەتتىگىن ارتتىرۋدى كوزدەيدى.

پرەمەر-مينيستر اسقار مامين ءبىلىم جانە عىلىم مينيسترلىگىنە اتالعان زاڭ جوباسىن پارلامەنت ماجىلىسىنە 1 قىركۇيەككە دەيىن ەنگىزۋدى تاپسىردى. ۇكىمەت باسشىسىنىڭ ورىنباسارى بەردىبەك ساپارباەۆتىڭ ايتۋىنشا، جاڭا زاڭ جوباسى ەلىمىزدە 500 مىڭداي ۇستازدىڭ مۇددەسىن قورعايدى دەگەن بولجام بار. بۇگىندە «پەداگوگ مارتەبەسى تۋرالى» زاڭ جوباسى قارجىمەن تولىق قامتاماسىز ەتىلگەن: وعان ءۇش جىلعا 930 ملرد تەڭگەگە جۋىق قارجى بولىنەدى.

«پەداگوگ مارتەبەسى تۋرالى» زاڭ جوباسىندا ۇستازدارعا بىرنەشە قوسىمشا اقى تولەۋ قاراستىرىلعان.

«سىنىپ جەتەكشىلىگى ءۇشىن – 173 مىڭ مۇعالىمنىڭ، ال داپتەرلەردى تەكسەرگەنى ءۇشىن 165 مىڭ مۇعالىمنىڭ قوسىمشا اقىسى ەكى ەسەگە كوبەيەدى. 212 مىڭنان استام قىزمەتكەردىڭ بىلىكتىلىك ساناتى ءۇشىن ايلىق جالاقىدان 30-دان 50 پايىزعا دەيىنگى مولشەردە قوسىمشا اقى الۋىنا مۇمكىندىك بەرىلەدى. 7 مىڭ قىزمەتكەرگە ماگيستر دارەجەسى ءۇشىن 10 اەك مولشەرىندە قوسىمشا اقى تولەنەدى. 18 مىڭ قىزمەتكەر تالىمگەرلىگى ءۇشىن 1 بازالىق لاۋازىمدىق مولشەرىندە قوسىمشا اقى الادى» – دەدى ءبىلىم جانە عىلىم ءمينيسترى اسحات ايماعامبەتوۆ.

سونداي-اق جاڭا زاڭنىڭ ارقاسىندا 100 مىڭنان استام پەداگوگ قوسىمشا 14 كۇن جازعى دەمالىس الىپ، ەندى جالپى ۇزاقتىعى 56 كۇن دەمالاتىن بولادى. ال ماتەريالدىق ەمەس ىنتالاندىرۋعا كەلسەك، مۇعالىمدەردىڭ بالالارى ەندى بالاباقشاعا ءبىرىنشى كەزەكتە ورنالاسادى.

ءبىلىم جانە عىلىم ءمينيسترى پەداگوگتىڭ جۇكتەمەسىن قىسقارتۋ بويىنشا دا شارالار قابىلداناتىنىن جەتكىزدى. بۇل ورايدا مۇعالىمنىڭ كاسىبي فراكتسياسىنا كىرمەيتىن مىندەتتەردى جۇكتەۋگە، شامادان تىس ەسەپ بەرۋگە، نەگىزسىز تەكسەرۋلەر جۇرگىزۋگە تىيىم سالىنادى. قۇقىق بۇزۋشىلىق سۋبەكتىسىنە بايلانىستى مۇعالىمدەردى وزىنە ءتان ەمەس فۋنكتسيالارعا جانە ارتىق ەسەپ بەرۋگە تارتقانى ءۇشىن 20-دان 120 اەك-كە دەيىن ايىپپۇل سالۋ زاڭ جوباسىندا قاراستىرىلعان.

البەتتە، مۇعالىمگە قويىلاتىن تالاپتار دا جاڭا زاڭ جوباسىنان تىس قالعان جوق.

«پەداگوگ مارتەبەسىن ارتتىرۋ ارقىلى مۇعالىمنىڭ قىزمەتىنە قويىلاتىن تالاپتار دا كۇشەيمەك. سوندىقتان زاڭ جوباسىنا سايكەس، 2021 جىلعى 1 قاڭتاردان باستاپ ۋنيۆەرسيتەت تۇلەكتەرى پەداگوگ بىلىكتىلىگىنە سايكەستىگىن راستايتىن بولادى. مۇنىمەن قوسا قولدانىستاعى شەكتەۋلەردەن باسقا پسيحيكالىق جانە مىنەز-قۇلىقتىق اۋىتقۋى بار، ارەكەتكە جارامسىزدىعىنا بايلانىستى دارىگەردىڭ باقىلاۋىندا تۇرعان ادامدارعا پەداگوگ قىزمەتىمەن اينالىسۋعا تىيىم سالىنادى» – دەدى اسحات ايماعامبەتوۆ.

مەملەكەت باسشىسىنىڭ تاپسىرماسى بويىنشا جاڭا زاڭ جوباسى جىل سوڭىنا دەيىن قابىلدانۋى ءتيىس.

پىكىر جازۋ

پوچتاڭىز جاريالانبايدى