مۇگەدەكتەر جاتتىعۋ ورتالىعىنا قالاي جەتەدى؟

0 158

ءبىر جىل بۇرىن ەلوردادا ەلىمىزدە تەڭدەسى جوق پاراليمپيادالىق جاتتىعۋ ورتالىعى اشىلدى. قازىرگى كۇنى اتالمىش نىسان جۇمىسىنا قاتىستى بىرقاتار تۇيتكىلدەر انىقتالىپ وتىر. نۇر-سۇلتان قالاسى ءماسليحاتىنا مۇمكىندىگى شەكتەۋلى جاندار تاراپىنان ورتالىقتىڭ قىزمەت كورسەتۋ ساپاسىنا بايلانىستى ارىز-شاعىمدار كەلىپ تۇسكەن. كەشە ءماسليحاتتىڭ تۇراقتى كوميسسيالارىنىڭ بىرلەسكەن وتىرىسىندا وسى ماسەلە قارالىپ، جاۋاپتى ورگان باسشىلارىنىڭ ەسەپتەرى تىڭدالدى.

الدىمەن بايانداما جاساعان قالالىق ورتانى رەگەنەراتسيالاۋ باسقارماسىنىڭ باسشىسى ارجان بۇعىباەۆ پاراليمپيادالىق جاتتىعۋ ورتالىعى مەملەكەتتىك-جەكەمەنشىك ارىپتەستىك اياسىندا سالىنعانىن ايتىپ، ورتالىق قىزمەتىن پايدالانۋشىلاردىڭ سانى كۇننەن-كۇنگە ارتىپ كەلە جاتقانىن جەتكىزدى. ماسەلەن، وتكەن ايدا نىسانعا 3 مىڭعا جۋىق كەلۋ تىركەلگەن. ال جارتى جىلدا قىزمەتتى پايدالانۋ 13 مىڭنان اسىپ كەتكەن. سونىڭ ىشىندە مۇمكىندىگى شەكتەۋلى سپورتشىلارعا ارنالعان بالالار-جاسوسپىرىمدەر سپورت مەكتەبىنىڭ تاربيە­لەنۋشىلەرى، «شاراپات»، «نۇرلى جۇرەك» ورتالىقتارىنىڭ ەمدەلۋشىلەرى، تاعى وسى سياقتى ارناۋلى مەكەمەلەردە ەمدەلەتىندەر ورتالىق قىزمەتىنە جۇگىنگەن.ورتالىققا باراتىندار نەگىزىنەن ترەناجەر زالىنا كوبىرەك بارعاندى قالايدى. سونداي-اق، وتىرىپ ۆولەيبول ويناۋ، پارا-تاەكۆوندو، پارا-ۇستەل تەننيسى سياقتى سپورت تۇرلەرىمەن اينالىساتىن ءبىراز ادام بار. كەيىنگى كەزدە يوگامەن اينالىساتىنداردىڭ سانى دا ارتقان.
الايدا اتالمىش ورتالىققا جەتۋ مۇمكىندىگى شەكتەۋلى جاندارعا قيىندىق تۋدىرادى. ورتالىق قاراوتكەل-3 كەنتىندە ورنالاسقان. قالانىڭ ءبىر شەتىندە تۇراتىن مۇگەدەكتەر وعان بارۋ ءۇشىن قانشاما ۋاقىت جوعالتادى. نىسانعا قاتىنايتىن اۆتوبۋستار دا از. ءتيىستى بىلىكتىلىگى بار جاتتىقتىرۋشىلار مەن نۇسقاۋشىلاردان دا تاپشىلىق سەزىلىپ وتىر. وتىرىستا وسى تۋرالى ايتىلىپ، قالالىق ءماسليحات دەپۋتاتتارى مەن جينالىسقا قاتىسقان مۇمكىندىگى شەكتەۋلى جاندار تاراپىنان ۇسىنىستار ايتىلدى. اتاپ ايتقاندا، ورتالىققا ارنايى اۆتو­بۋستاردى جىبەرۋ، نىسانداردىڭ قولجەتىمدىلىگىنە قاتىستى كارتا جاساۋ سىندى ۇسىنىستار قولداۋ تاپتى.

پىكىر جازۋ

پوچتاڭىز جاريالانبايدى

three + 9 =